Ерөнхий сайд асан, УИХ-ын гишүүн Р.Амаржаргалын зарчимын байр суурь олон түмэнд таалагдах болоод удлаа. Тэрээр эдийн засгийн одоогийн хүндрэлийг үнэнээр нь хэлж байгаа АН-ын цөөн гишүүдийн нэг. АН-ынхан улс оронд бас намдаа юу болоод байгааг бүгдээрээ сайн мэдэж байгаа. Гэхдээ Р.Амаржаргал, Х.Баттулга, З.Энхболд  шиг үнэнийг хэлж, зааж зөвлөж байгаа хүмүүс маш ховор. Олонхи нь асуудлыг нуух болсон. Хамгийн сүүлд УИХ-ын гишүүн Р.Амаржаргал улс орны эдийн засаг, ард түмний амьдрал, санаа бодлын талаар байр сууриа илэрхийллээ. Түүний харж байгаагаар бол улс орны эдийн засагт томоохон өөрчлөлтүүд хийх хэрэгтэй байгаа гэнэ. "Өнгө зассан, эмэгтэйчүүдийн хэллэгээр косметик засварын өнгөлөн далдалсан арга хэмжээнүүд" хийгээд байвал улс орондоо, ирээдүйдээ хохиролтой аж. Тэрээр "2011 онд ДНБ-ий 52 хувьтай тэнцэж байсан гадаадын хөрөнгө оруулалт 2013 онд 14 хувьд унасан. Уйлмаар байгаа биз. 2014 онд долоон хувьд хүрсэн. Хоёр дахин буурсан. 52 хувьтай байсан хөрөнгө оруулалтыг 14, долоо хувь руу оруулсан “гавьяатай” хүмүүс чемодоноо бариад хурдан алга болох ёстой" гэж анхааруулан учирлаж байна. Харин "өмнөхөөс боллоо", "эдийн засгаа унагаагүй" гэж гүрийх намынх нь гишүүдэд Р.Амаржаргалын үг сайхан санагдахгүй л болов уу?

   Ер нь сүүлийн үед АН-ын рейтинг илт буурах болсныг олон судалгааны дүн харуулна. Энэ нь ард түмний итгэлийг алдсантай шууд холбоотойг судлаачид нотлон ярьж эхэлсэн. Тэдгээр судлаачдын байр суурьтай Р.Амаржаргал гишүүний санаа бодол нэг хэвэнд цутгасан юм шиг таарж байна. Тэрээр "2012 оны сонгуулийн дүн иргэдийн зүгээс бидэнд хүлээлгэсэн асар том дэмжлэг байсан. Урд нь болохгүй бүтэхгүй байсан зүйлсийг шинэчлээч, өөрчлөөч гэсэн мэссэж өгсөн. Ард түмний хүлээлт дээр тоглосон хэрэг болсон л доо. Шинэчилье үг ч гарч ирсэн биз дээ. Тэгээд юу болов. Их санасан газар есөн шөнө хоосон хононо гэдэгтэй адилхан болов. Иргэд хоёр жил дэмжлээ, итгэлээ, найдлаа, харлаа, хүлээлээ, тэвчээр алдлаа, одоо арга тасарсан байна. Улстөрийн нам, улстөрч хүн улс орон, эдийн засаг, ард түмэн, бизнесийн итгэлийг алдана гэдэг бол үнэндээ том нүгэл гэж би ойлгодог. Ер нь ард иргэдийн ам эргэчихсэн байна лээ. Тэдний итгэл найдварыг сэргээх хэрэгтэй. Энэ нь хувь хүний бус эдийн засгийн, Засгийн газар цаашлаад улс төрийн намын эрх ашиг хөндөгдөнө. Намын үүднээс авч үзвэл иргэдийн итгэл сэтгэлийг сэргээх асуудал чухал байна... Ардчилсан нам илүү их ачаа үүрч, тэр хэмжээгээр хариуцлагатай байх шаардлагатай. Алдаа байхгүй, дутагдалгүй юм шиг царайлж, эх орны эрх ашиг, эв нэгдэл гэх гоё нэр томъёо ашиглаад халхавч хийгээд өөрийн хариуцлагагүй, замбараагүй, мэдлэггүй, чадахгүй буйгаа нуух хаах байдлаар ажиллах хэрэггүй гэж үздэг учраас би намынхаа төлөө намаа үе үе хатуу шүүмжилдэг" хэмээн олон түмний санаа бодлын талаар байр сууриа тодорхой илэрхийлэв. Ард түмэн 2012 онд үнэхээр АН-д итгэсэн. АН-ыг шинэчлэлтийг авчирна гэж итгэсэн. Харин АН-ынхан шинэчлэлийг биш сүйрлийг бүтээж байна. Тийм учраас л ард түмний итгэл алдарч эхлэв. "Аль ч нам ялсан адилхан" гэсэн ойлголт нийгэмд түгээмэл болов. Олон түмний итгэлийг ингэж алдана гэдэг бол улс төрийн намын хувьд ихээхэн бэрхшээлтэй тулгарч байна гэсэн үг л дээ. Үүнийг ч АН дотор асуудлыг учрыг олж, алсыг хардаг хүмүүс нь мэдчихээд өдөр бүр бухимдлаа илэрхийлж шүүмжлэлттэй байр сууринаас ханддаг болоод удлаа.
   Энэхүү нуман тулгуураасаа гарахын тулд АН-ынхан хамгийн түрүүнд хоёр жилд алдсан ард түмнийхээ итгэлийг эргүүлж сэргээх ёстой гэж Р.Амаржаргал гишүүн зарлав. Намынхандаа хандаж ингэж хэлж байна. Харин түүнийг АН дотроо цөөнх гэж үздэг гишүүд хүлээн зөвшөөрөхгүй л болов уу? гэдэг эргэлзээтэй асуудал тавигдах боллоо.