Сүү сүүн бүтээгдэхүүний үйлдвэр, цехүүдэд  Мэргэжлийн хяналтын ерөнхий газраас шалгалт хийсэн байна. Энэхүү шалгалтад нийтдээ 77 үйлдвэр цех  хамрагдахаас нийслэлд үйл ажиллагаа явуулж буй сүү сүүн  бүтээгдэхүүний 11 үйлдвэр хөдөө орон нутгийн  42 үйлдвэр цех хамрагджээ.  Харин 24  иргэн, аж ахуйн нэгж байгууллагын  үйл ажиллагаагааг түр  болон бүрмөсөн зогсоосон гэсэн шалтгааны улмаас шалгалтад хамрагдаагүй байна. Шалгалтаар үйлдвэр эрхлэгчдийн 58,5 хувь нь үйлдвэрийн барилга байгууламж нь зураг төслийн дагуу баригдаагүй, 30,2 хувь бүтээгдэхүүнийг бохирдуулахгүй нөхцлийг бүрдүүлж, хүнсний зориулалтын хөргүүртэй  тээврийн хэрэгслээр хангагдаагүй байжээ. Мөн сүүн дэх бичил биетийн тоог тодорхойлох тоног төхөөрөмж багаж хэрэгсэлгүй байсан бөгөөд дотоод хяналтын журам боловсруулж  ажилладаггүй зэрэг зөрчил илэрсэн байна.

    Мэргэжлийн хяналтын ерөнхий газрын үйлдвэр үйлчилгээний хяналтын хэлтсийн дарга Л.Гэрэлмаагаас дараах зүйлийг тодрууллаа.

-Сүү сүүн бүтээгдэхүүний компанид хийсэн шалгалтаар шаардлага хангахгүй хүнсний бүтээгдэхүүн байсан уу?
-Нийслэлийн ”Сүүн сондор”, “Тайширын хүлэг” ХХК гэсэн хоёр хүнсний үйлдвэр их эрсдэлтэй гарсан байгаа. Эдгээр үйлдвэрүүдэд дотоод хяналт байхгүй  байсан. Хүнсний аюулгүй байдлын тухай хуулиар буцаан татсан хүнсний бүтээгдэхүүнийг хэрхэн устгах талаар журам боловсруулж ажиллах ёстой. Гэтэл дээрх үйлдвэрт ийм зүйл байхгүй байсан.

-Ер нь хүнсний бүтээгдэхүүнийг буцаан татаж устгасан уу?
-Шалгалтын явцад 37 төрлийн бүтээгдэхүүнийг лаборторийн шинжилгээнд хамруулсан. Лаборторийн шинжилгээнд хамруулсан бүтээгдэхүүнээс 1,7 хувь нь нянгийн бохирдолтой гарсан байгаа. 

-Үйлдвэрүүдэд эрүүл ахуйн зохистой дадлыг нэвтрүүлж ажиллах ёстой байдаг гэсэн. Шалгалтанд хамрагдсан үйлдвэрүүд үүнийг хэр хэрэгжүүлж ажиллаж байна вэ?
-Өнгөрсөн оны нэгдүгээр сарын 1-нээс эхлэж хууль мөрдөгдөж эхэлсэн байгаа. Энэхүү хуулинд зохиостой дадлыг хэрхэн мөрдөж ажиллах тодорхой тусгаж өгсөн. Гэтэл одоо үйл ажиллагаа явуулж байгаа үйлвэрүүд зохистой дадлыг нэвтрүүлж ажиллахгүй байгаа. Мөн энэ чиглэлийн гэрчилгээг ч аваагүй байна.

-Яагаад авахгүй байгаа вэ?
-Энэхүү гэрчилгээг олгодог байгууллага одоо болтол тодорхой болоогүй  байна. Одоогоор энэ гэрчилгээ олгох төрийн бус байгууллага ч байхгүй байгаа. Харин манайхаас хамрагдах төрийн байгууллага руу нь хоёр удаа албан бичиг явуулж асуудлыг шийдвэрлэх хүсэлт гаргасан. Гэвч одоо хүртэл шийдэгдээгүй байна. Харин  чанарын удирдлагын тогтолцоог нэвтрүүлсэн 20-иод үйлвэр байгаа.

-Сүүн бичил биетэн тодорхойлох тоног төхөөрөмж байхгүй гэсэн. Эдгээр үйлдвэрүүдэд ямар арга хэмжээ авсан вэ?
-Жижиг үйлдвэрүүд хэрэгжүүлэхгүй байна. Харин томоохон үйлвэрүүд харьцангуй сайн мөрдөж ажилладаг. Сүүний бичил биетэн тодорхойлох тоног төхөөрөмжгүй үйлдвэрүүд торгуулын арга хэмжээ авсан. Мөн зөрчил арилгах албан бичгийг өгсөн.
Ер нь үйлдвэрлэж байгаа бүтээгдэхүүн дээж шинжилгээтэй холбоотой асуудлыг нарийн тусгаж өгөх хэрэгтэй байгаа юм. Мөн эрсдэлтэй гэж байгаа үйлдвэрийн нарийн  үзүүлэлтээр дүгнэх шаардлагатай. Одоо үйлдвэрлэж байгаа сүүнүүд нь бүгд цэвэр сүүгээр хийгдэж байна уу гэдэг дээр нарийн анхаарч ажиллах хэрэгтэй байна. Мөн ажлын байрны нөхцөл байдал, барилга байгууламжийг ч  стандартын хэмжээнд барьж байгуулах шаардлагатай байна.