АСЕМ нь Ази, Европ хоёр тивийн уялдаа холбоо, хамтын ажиллагаанд ихээхэн ач холбогдолтой юм. Мөн уг хурлыг өөрийн эх орондоо зохион байгуулахын ач холбогдолыг мэргэжилтүүд ийнхүү тайлбарлаж байна.

АСЕМ-ын дээд хэмжээний уулзалтад оролцохоор 12 орны Ерөнхийлөгч, 25 орны Ерөнхий сайд нар хүрэлцэн ирсний зэрэгцээ 4000 гаруй зочид төлөөлөгч морилон саатаад байна.

АСЕМ нь Ази, Европын орнуудын эрх тэгш харилцаанд суурилсан улс төр, эдийн засаг, нийгэм соёлын нийтлэг тулгамдсан асуудлыг хэлэлцдэг Засгийн газар хоорондын албан бус яриа хэлэлцээний хамтын ажиллагаа бөгөөд 2 жил тутамд хуралддаг.

Одоогоос 20 жилийн өмнө буюу 1996 онд 26 гишүүнтэй үйл ажиллагаагаа эхэлж байсан Ази-Европын яриа хэлэлцээний чуулган эдүгээ 51 орон, 2 олон улсын байгууллагыг эгнээндээ нэгтгэн өргөжөөд байна. БНХАУ-ын нийслэл Бээжин хотноо 2008 онд чуулсан 7 дахь удаагийн чуулга уулзалтаар Монгол Улс АСЕМ-ын гишүүнээр элссэн.

Төрийн тэргүүн нар гарын үсгээ үлдээлээ

Ази-Европын дээд хэмжээний 11 дүгээр уулзалт өнөө өглөө Улаанбаатар хотноо албан ёсоор эхэллээ. “АСЕМ-ын 20 жил: Уялдаа холбоогоор өртөөлөн ирээдүйн түншлэлийн төлөө” сэдвээр зохион байгуулагдаж байгаа энэхүү Дээд хэмжээний уулзалтад АСЕМ-ын гишүүн 51 орон, үүнээс Европын 30, Азийн 21 орон, хоёр олон улсын байгууллагаас өндөр түвшний төлөөлөгчид оролцож байна. Эдгээрээс Төрийн тэргүүний түвшинд 10 орон оролцож буй. Тухайлбал Болгар, Кипр, Латви, Мьянмар, Өмнөд Солонгос, Хорват, Чех, Швейцарь Улсын Төрийн тэргүүн, Индонези, Энэтхэг Улсын Дэд Ерөнхийлөгч нар хүрэлцэн ирээд байгаа юм.

Япон, Хятад, Финланд, Бельги, ОХУ, Нидерланд зэрэг 23 орон Засгийн газрын тэргүүний түвшинд, Австрали, Франц, Швед зэрэг 16 орон Гадаад хэргийн сайдын түвшинд тус тус оролцож байна. Мөн Европын холбоог төлөөлөн Европын Зөвлөлийн Ерөнхийлөгч эрхэмсэг ноён Дональд Туск, АСЕАН-ыг төлөөлж АСЕАН-ы Ерөнхий нарийн бичгийн дарга эрхэмсэг ноён Лэ Лоунг Минь тэргүүтэй төлөөлөгчид оролцож байна.

МОНГОЛ УЛСЫН ЕРӨНХИЙЛӨГЧ ЦАХИАГИЙН ЭЛБЭГДОРЖ АЗИ ЕВРОПЫН ДЭЭД ТҮВШНИЙ 11 ДҮГЭЭР УУЛЗАЛТЫГ НЭЭЖ ХЭЛСЭН ҮГ
Administrator 2016-07-15 08:55:00

Монгол Улс Улаанбаатар хот

Эрхэм хүндэт төр засгийн тэргүүн нар аа,

Хүндэт төлөөлөгчид өө,

Хатагтай ноёд оо,

Монголын сайхан оронд Та бүхнийг тавтай морилон саатахыг хүсье. АСЕМ-ын гишүүн орнуудын төр, засгийн тэргүүн, түнш байгууллагын удирдлага, өндөр түвшний төлөөлөгчид – тус бүрийн зорьсон хэрэг сэтгэлчлэн бүтэхийн өлзийтэй ерөөл өргөе. Та бүхнийг манай улсын нийслэл Улаанбаатар хотод хүрэлцэн ирсэнд Монголын ард түмэн, төр засаг нэн талархан хүлээн авч байна.

Монгол Улс бол Ази, Европ тивийн дунд нь оршдог өвөрмөц байршилтай орон. Бөмбөрцөгийн энэ их хоёр тивийг уулзуулж, холбож ирсэн түүхтэй, уламжлалтай улс. Европ Азийн энэ удаагийн дээд түвшний уулзалт нь “Уялдаа холбоотой байж ирээдүйн төлөө түншлэх нь” сэдвийг хэлэлцэх гэж байна. Бас ийм хэлэлцүүлэг өрнөж буй нь олон зуунаас улбаатай юм.

Найман зууны өмнө Монголын эртний нийслэл Хархорумд Ази, Европ тивийн элчүүд уулздаг байсан. Тэд хоёр тивийн улсуудын хэлхээ холбоог нэмэгдүүлэх, шашин хоорондыг ойлголцлыг бий болгох, худалдааны чөлөөт, аюулгүй байдлыг хангах, шинэ мэдлэг ололтоо солилцох, шуудан холбооны өртөө сүлжээ байгуулах талаар ярилцдаг байжээ. Энэ тухай түүхийн эх сурвалжуудад тодорхой өгүүлсэн байдаг.

Эрхэм нөхөд өө,

АСЕМ-ын дээд түвшний уулзалтыг эх орондоо хүлээн авах нь Монголчуудын хувьд нэр төрийн хэрэг юм. Өнгөрөгч 2 жилийн хугацаанд АСЕМ-ын олон талт хамтын ажиллагааг бэхжүүлэх, дээд хэмжээний уулзалтыг зохион байгуулахад санхүү, эд материал, хүний нөөц, мэргэжлийн туслалцаа дэмжлэг үзүүлсэн, хамтран ажилласан улс орон, байгууллага, хамт олонд Монгол Улсын нэрийн өмнөөс гүн талархал илэрхийлье.

Европ, Ази тивийн улс орнуудад мөн манай хоёр тивийн хувьд ижил төстэй, бас өөр өөрийн онцлог бүхий хэлэлцэж ярилцах, тодорхой шийдэл шаардсан, тулгамдсан олон асуудал байна. Энэхүү уулзалтын чухам зорилго нь дээрхид чиглэж байгаа юм. Мөн дээд түвшний энэхүү арга хэмжээний үеэр олон талын болон хоёр талын ажил хэрэгч уулзалтууд болно. Гишүүн орон, түнш байгууллагыг төлөөлсөн ажлын хэсэг, албаны хүмүүс дээрхийн бэлтгэлийг сайн хангаж ажиллаж ирснийг энд зориуд тэмдэглэе.

Ази Европын энэ удаагийн – 11 дэх уулзалтын үр дүнгээр “Улаанбаатарын Тунхаглал”, “Даргын мэдэгдэл” гэсэн баримт бичиг гаргахаар төлөвлөж байна. Эдгээрт АСЕМ-ын өнгөрсөн үйл ажиллагааг дүгнэж, ирээдүйн төлөвийг тодорхойлж, өнөөгийн тулгамдсан асуудлыг хэлэлцсэн байдал, шийдлүүд тусгалаа олох нь гарцаагүй. Мөн эндээс гарсан тодорхой шийдэл, хэлцлүүдийг дагалдаж хийх төлөвлөгөө болон дараагийн ажлуудын дүр зургууд тодорно гэж итгэж байна. Талууд ч энэхүү уулзалтад хүндэтгэлтэй хандаж, ажил хэрэгчээр оролцоно хэмээн найдаж байгаагаа Ази Европын дээд түвшний уулзалтыг даргалагчийн хувьд онцлон хэлье.

Эрхэм зочид оо,

Энэ жил АСЕМ-ын 20 жилийн ой тохиож байгаа юм. Ази Европ тивийн дээд хэмжээний энэхүү 11 дэх удаагийн уулзалтын агуулга ч бидний хамтын байгууллага - АСЕМ-ын өнгөрсөн 20 жилээ дүгнэх, ирээдүйн 20 жилээ төсөөлөхөд чиглэж байна. Монгол Улсын хувьд ч энэ жил түүхт ойнууд тохиож байгаа. Монголын төр улс үүсэн байгуулагдсаны болон Их Монгол Улсыг тунхагласны тэгш ойг бид тэмдэглэж байна.

АСЕМ-ын уулзалт нь манай Үндэсний их баяр наадмын өдрүүдтэй давхцаж, бас үргэлжлэл нь болон өрнөж байгаагаараа билэгдэлтэй юм. Монголчуудын баяр наадамтай цуг энх амгалан ирдэг гэж эрт цагт ярилцдаг байсан. Манай үндэсний наадам бол Монголчуудын их түүх, амар амгалан хосгүй өв соёл, уламжлал заншил, бахархал цэнгэл, өнөөгийн хөгжил цэцэглэлийн өвөрмөц хослол байдгаараа онцлог юм. Та бүхэнд бид наадам бэлдсэн байгаа. Тэнгэр болгоож таалалд тань нийцнэ гэдэгт итгэлтэй байна.

Монголчууд бид АСЕМ-ын энэхүү дээд түвшний уулзалтыг Монгол газар шороон дээр бүтэн зуунд тохиох чухал үйл явдал гэж үзэж байгаа. Бас Та бүхнийг хүсэн хүлээж хичээнгүйлэн бэлдсэн. Монгол бол хүн нь зочломтгой, байгаль нь тансаг, үндэснийхээ түүх ололтоор бахархдаг, өрнүүн хүсэл тэмүүлэлтэй, нээлттэй, найрсаг улс. Эрхэм дээд зочид гийчид Та бүхнийг Монгол Улсад тавтай морилон саатахыг дахин урья.

Ийнхүү Ази Европын дээд түвшний 11 дүгээр уулзалт Монгол Улсын нийслэл Улаанбаатар хотод эхэлж байгааг баяртайгаар тунхаглан зарлая.

Ази Европын түмэн олон амгалан найрсаг байг ээ!

Анхааран сонссонд талархал илэрхийлье.

2016 оны 7 дугаар сарын 15

Ази-Европын Дээд түвшний 11 дүгээр уулзалт 7 дугаар сарын 15-ны өглөөний 9.10 цагт Улаанбаатар хотноо “Шангри Ла” зочид буудлын хурлын танхимд албан ёсоор эхэллээ. Уулзалтад оролцох зочдыг угтан авах ажиллагаа 07.00 цагт /Улаанбаатарын цагаар/ Шангри-Ла цогцолборын угтах талбайд албан ёсоор эхэлж, Монгол Улсын Ерөнхийлөгч Ц.Элбэгдорж төлөөлөгчдийн тэргүүн нарыг өөрийн биеэр хүндэтгэл үзүүлэн угтан авлаа.

Олны танил эрхмүүдийн наадмын гоёлыг хамтдаа сонирхоцгооё.

2016 оны 07 дугаар сарын 15-наас 07 дугаар сарын 19-нийг хүртэлх

цаг агаарын урьдчилсан төлөв:

16-нд баруун аймгуудын хойд, зүүн аймгуудын зүүн хэсгээр, 17-нд нутгийн хойд хэсгээр, 18-19-нд зарим газраар түр зуурын бороо орно. Дуу цахилгаантай. Борооны өмнө салхи түр зуур ширүүснэ. Алтай, Хангай, Хөвсгөл, Хэнтэйн уулархаг нутгаар шөнөдөө 8-13 градус, өдөртөө 20-25 градус, Их нууруудын хотгор болон говийн бүсийн нутгаар шөнөдөө 16-21 градус, өдөртөө 30-35 градус, бусад нутгаар шөнөдөө 13-18 градус, өдөртөө 25-30 градус дулаан байна.

Өдрийн сайн цаг нь бар, луу, могой, бич, тахиа, гахай болой

2016 оны 07 дугаар сарын 14-ний 21 цагаас 07 дугаар сарын 15-ны 21 цаг

хүртэлх цаг агаарын урьдчилсан мэдээ:

БАРУУН АЙМГУУДЫН НУТГААР: Солигдмол үүлтэй. Бороо орохгүй. Салхи баруун өмнөөс секундэд 6-11 метр. Шөнөдөө Алтай, Хангайн уулархаг нутгаар 4-9 градус, Алтайн өвөр говиор 14-19 градус, бусад нутгаар 8-13 градус, өдөртөө Хангайн уулархаг нутгаар 16-21 градус, Их нууруудын хотгор болон Алтайн өвөр говиор 29-34 градус, бусад нутгаар 22-27 градус дулаан байна.

ТӨВИЙН АЙМГУУДЫН НУТГААР: Үүлэрхэг. Шөнөдөө ихэнх нутгаар, өдөртөө нутгийн зүүн хэсгээр бороо орно. Дуу цахилгаантай. Салхи зүүн хойноос секундэд 6-11 метр. Хангай, Хөвсгөл, Хэнтэйн уулархаг нутгаар шөнөдөө 5-10 градус, өдөртөө 18-23 градус, бусад нутгаар шөнөдөө 9-14 градус, өдөртөө 23-28 градус дулаан байна.

ЗҮҮН АЙМГУУДЫН НУТГААР: Үүлэрхэг. Ихэнх нутгаар бороо орно. Дуу цахилгаантай. Салхи зүүн хойноос секундэд 7-12 метр. Сэрүүсч шөнөдөө 11-16 градус, өдөртөө 20-25 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Шөнөдөө түр зуурын бороо орно, өдөртөө бороо орохгүй. Салхи зүүн хойноос секундэд 7-12 метр. Шөнөдөө 12-14 градус, өдөртөө 22-24 градус дулаан байна.

ГОВИЙН АЙМГУУДЫН НУТГААР: Үүлэрхэг. Шөнөдөө ихэнх нутгаар, өдөртөө нутгийн зүүн хэсгээр бороо орно. Дуу цахилгаантай. Салхи баруун хойноос секундэд 7-12 метр. Дорноговийн нутгаар шөнөдөө 13-18 градус, бусад нутгаар 10-15 градус, өдөртөө бүх нутгаар 21-26 градус дулаан байна.

УЛААНБААТАР ХОТ: Шөнөдөө үүлэрхэг, бороо орно. Өдөртөө үүл багасна, бороо орохгүй. Салхи зүүн хойноос секундэд 7-12 метр. Сэрүүсч шөнөдөө 11-13 градус, өдөртөө 21-23 градус дулаан байна.

Монгол Улсын Ерөнхийлөгч Ц.Элбэгдорж Бүгд Найрамдах Индонез Улсын Дэд Ерөнхийлөгч Мухаммед Юсуф Каллаг хүлээн авч уулзлаа

Монгол Улсын Ерөнхийлөгч Ц.Элбэгдоржид ОХУ-ын Ерөнхий сайд Д.Медведев бараалхав

Монгол Улсын Ерөнхийлөгч Ц.Элбэгдорж Бүгд Найрамдах Хорват Улсын Ерөнхийлөгч Колинда Грабар Китаровичтай уулзлаа

Монгол Улсын Ерөнхийлөгч Ц.Элбэгдорж Бүгд Найрамдах Болгар Улсын Ерөнхийлөгч Росен Плевнелиевтэй уулзлаа

Монгол Улсын Ерөнхийлөгч Ц.Элбэгдорж Бүгд Найрамдах Чех Улсын Ерөнхийлөгч Милош Земантай уулзав

улс төрийн байдлаас үл хамааран Япон-Монголын харилцаа хэвээр үргэлжилнэ

ЯПОН УЛСЫН ЕРӨНХИЙ САЙД Ш.АБЭ МОНГОЛ УЛСАД АЛБАН ЁСНЫ АЙЛЧЛАЛ ХИЙЖ БАЙНА
Administrator 2016-07-14 16:45:00

Монгол Улсын Ерөнхийлөгч Ц.Элбэгдоржийн урилгаар Япон Улсын Ерөнхий сайд Шинзо Абэ Монгол Улсад албан ёсны айлчлал хийж, АСЕМ-ын Дээд түвшний 11 дэх удаагийн уулзалтад оролцохоор өнөөдөр хүрэлцэн ирлээ.

Төрийн ёслолын журмын дагуу Эзэн Хаант, Парламентын засаглалтай орны Ерөнхий сайдыг Ерөнхийлөгчийн хүндэт зочноор хүлээн авдаг уламжлалтай.

Монгол Улсын Ерөнхийлөгч Ц.Элбэгдорж хүндэт зочныг Эзэн Чингис хааны талбайд хүндэтгэн угтаж, Төрийн хүндэт харуул жагслаа. Үүний дараа Эзэн Чингис хааны хөшөөнд хүндэтгэл үзүүлснээр Япон Улсын Ерөнхий сайд Ш.Абэгийн албан ёсны айлчлал эхэллээ.

Энэхүү айлчлал нь Япон Улсын Ерөнхий сайд Ш.Абэгийн Монгол Улсад хийж буй гурав дахь удаагийн айлчлал бөгөөд 1990 оноос хойшхи Японы Ерөнхий сайдын 6 дахь удаагийн айлчлал болж байгаа юм.

Угтах ёслолын дараа Монгол Улсын Ерөнхийлөгч Ц.Элбэгдорж Японы Ерөнхий сайд Шинзо Абэтэй албан ёсны хэлэлцээ хийв.

Албан ёсны хэлэлцээний үеэр Монгол Улсын Ерөнхийлөгч Ц.Элбэгдорж Ерөнхий сайд Ш.Абэтэй дахин уулзсандаа баяртай байгаагаа тэмдэглэж, АСЕМ-ын Дээд түвшний уулзалтад оролцож, Монгол Улсад гурван удаа айлчилсан Япон улсын анхны Ерөнхий сайд болж байгаад нь баяр хүргэж, талархал илэрхийлэв.

Хэлэлцээний үеэр Монгол, Японы харилцаа Стратегийн түншлэлийн зарчимд тулгуурлан эрчимтэй хөгжиж, хамтын ажиллагаа улам гүнзгийрч, итгэлцэл бэхжиж, хоёр талын төдийгүй бүс нутаг, олон улсын тавцанд идэвхтэй хамтран ажиллаж байгаад сэтгэл ханамжтай байгаагаа тэмдэглэхийн зэрэгцээ Япон Улстай найрсаг харилцаа, хамтын ажиллагаа хөгжүүлэх нь Монгол Улсын гадаад бодлогын тэргүүлэх чиглэлийн нэг болохыг нотлов.

Мөн Монгол Улсын ардчилал, шинэчлэлийг гүнзгийрүүлэх, орчин үеийн хөгжлийн суурийг тавихад Япон улсын дэмжлэг, зээл, тусламж онцгой үүрэг гүйцэтгэж ирсэн. Цаашид ч энэхүү дэмжлэг, тусламж Монгол Улсын хөгжилд зайлшгүй шаардлагатай байгааг дурдаад харилцан ашигтай, урт хугацааны эдийн засгийн түншлэлийг хөгжүүлэхийн төлөө байгааг тэмдэглэлээ.

Ерөнхий сайд Ш.Абэгийн дэвшүүлсэн “Эрч”, “Эрч нэмэх” санаачилга болон Стратегийн түншлэлийн Дунд хугацааны хөтөлбөр амжилттай хэрэгжиж байгааг мөн тэмдэглэж, Ерөнхий сайд Ш.Абэгийн зүгээс Монголд Улстай харилцах асуудалд онцгой ач холбогдол өгч ирсэнд гүн талархал илэрхийлсэн юм.

Энэхүү айлчлал нь Монгол, Японы уламжлалт найрсаг харилцаа, хамтын ажиллагааг өргөжүүлэн хөгжүүлэх, стратегийн түншлэлийг бататган бэхжүүлэх дээд хэмжээний яриа хэлэлцээрийн давтамжийг хадгалахад ач холбогдолтой юм.

Монгол Улсын Их Хурлын дарга М.Энхболдод өнөөдөр /2016.07.14/ Япон Улсын Ерөнхий сайд Шинзо Абэ бараалхлаа.

Улсын Их Хурлын дарга М.Энхболд Япон Улсын Ерөнхий сайд Шинзо Абэтай уулзсандаа баяртай байгаагаа илэрхийлээд АСЕМ-ын дээд түвшний уулзалтад оролцохоор хүрэлцэн ирсэнд талархаж буйгаа уламжилсан юм.

Тэрбээр, хэдхэн хоногийн өмнө Японы Парламентын Зөвлөхүүдийн танхимын ээлжит сонгуульд Либерал Ардчилсан нам ялалт байгуулсанд баяр хүргээд энэ нь Ерөнхий сайд Шинзо Абэгийн хэрэгжүүлж байгаа бодлогыг японы ард түмэн өндрөөр үнэлж, дэмжиж байгаагийн илрэл хэмээн тэмдэглэн хэллээ. Түүнчлэн Улсын Их Хурлын дарга Бүгд Найрамдах Бангладеш Ард Улсын Дакка хотноо гарсан террорист халдлагын улмаас Японы Олон улсын хамтын ажиллагааны байгууллага /ЖАЙКА/-ын долоон зөвлөх ажилтны амь нас эрсэдсэнд гүнээ харамсаж буйгаа илэрхийлээд Монгол Улс терроризмын бүхий л хэлбэрийг эрс буруушаахаас гадна Япон Улс болон Олон улсын хамтын нийгэмлэгтэй терроризмын эсрэг хамтран ажиллах болно хэмээлээ.

Япон Улсын Ерөнхий сайд Шинзо Абэ Улсын Их Хурлын даргатай уулзаж байгаадаа баяртай байгаагаа илэрхийлээд хоёр улсын харилцаа, хамтын ажиллагааг хөгжүүлэхийн төлөө ажиллах болно гэлээ.

Ноён Ерөнхий сайд Шинзо Абэ, Монгол Улсад Ерөнхий сайдын хувиар гурав дахь удаагаа айлчилж байна гээд эдгээр айлчлал хоёр орны харилцааг өргөжүүлэхэд ач холбогдолтой болохыг тэмдэглэв. Тэрбээр, “Хоёр улс дипломат харилцаа тогтоосны 45 жилийн ой удахгүй болох гэж байна. Энэхүү харилцааг бэхжүүлэхийн тулд нягт хамтран ажиллана гэдэгт итгэлтэй байна” гэж хэллээ.

Улсын Их Хурлын дарга М.Энхболд, Япон Улстай найрсаг харилцаа, хамтын ажиллагаа хөгжүүлэх нь Монгол Улсын гадаад бодлогын тэргүүлэх чиглэлийн нэг гээд УИХ-ын сонгуулиар Монгол ардын нам ялалт байгуулж, шинэ Засгийн газар эмхлэн байгуулагдах гэж байна. Япон Улстай харилцах манай бодлого, үйл ажиллагаанд сонгуулийн дүн нөлөөлөхгүй. Стратегийн түншлэлийн харилцааг цаашид бэхжүүлэхэд монголын төр, засаг тууштай анхаарч ажиллана гэв.

Түүнчлэн тэрбээр, Монгол Улсын ардчилал, шинэчлэлийг гүнзгийрүүлэх, орчин үеийн хөгжлийн суурийг тавихад Япон Улсын дэмжлэг, зээл, тусламж онцгой үүрэг гүйцэтгэж ирсэн. Цаашид ч энэхүү дэмжлэг, тусламж Монгол Улсын хөгжилд зайлшгүй шаардлагатай. Үүний сацуу харилцан ашигтай, урт хугацааны эдийн засгийн түншлэлийг хөгжүүлэхийн төлөө байгаа хэмээсэн.

Хоёр орны харилцаанд Япон Улсын Парламентын хоёр танхимын дарга нар, Парламентын гишүүд, Япон Улсын Парламентын Зөвлөхүүдийн болон Төлөөлөгчдийн танхим дахь Япон, Монголын найрамдлын бүлгийн гишүүд үнэтэй хувь нэмэр оруулж буйг Улсын Их Хурлын дарга дурдаад Японы Парламент дахь Япон, Монголын бүлэг Эдийн засгийн түншлэлийн хэлэлцээр /ЕРА/-г соёрхон батлуулах, монгол иргэдийн Японд зорчих визийн нөхцлийг хөнгөвчлөх асуудлыг шийдвэрлүүлэхэд дорвитой үүрэг гүйцэтгэсэнд талархаж байгаагаа мөн илэрхийллээ.

Улсын Их Хурлын дарга М.Энхболд, “Эдийн засгийн түншлэлийн хэлэлцээр хүчин төгөлдөр болж, саяхан тус хэлэлцээрийн Хамтарсан хороо анхдугаар хурлаа зохион байгуулсан. Цаашид энэхүү хэлэлцээрийг хэрэгжүүлэхэд японы талтай нягт хамтран ажиллах хүсэл эрмэлзэлтэй байна. Эдийн засгийн түншлэлийн хэлэлцээр байгуулагдсанаар хоёр орны худалдаа, хөрөнгө оруулалт тууштай өснө гэдэгт эргэлзэхгүй байна” гэлээ. Мөн “Монгол, Японы Стратегийн түншлэлийн Дунд хугацааны хөтөлбөр”-ийн биелэлт 90 хувьтай байгааг дурдаад дараагийн шатны Дунд хугацааны шинэ хөтөлбөрт Японтой хамтран хэрэгжүүлэх төслүүд, нэн ялангуяа төмөр зам, нүүрс, химийн аж үйлдвэр, аж үйлдвэрийн кластер байгуулах зэрэг мега төслүүдийг хэрэгжүүлэх асуудлыг тусгах хүсэлтэй байгаагаа илэрхийлсэн.

Японы Ерөнхий сайд Шинзо Абэ хоёр улсын харилцааг улам өргөжүүлэн хөгжүүлэх хүсэлтэй байгаагаа дахин илэрхийлж, хоёр улсын олон жилийн мөрөөдөл байсан эдийн засгийн түншлэлийн хэлэлцээр хүчин төгөлдөр болсонд баяртай байна гээд АСЕМ-ын дээд хэмжээний уулзалтад амжилт хүслээ хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

ГАДААД ХЭРГИЙН САЙД Л.ПҮРЭВСҮРЭН ЯПОН УЛСЫН ЕРӨНХИЙ САЙД Ш.АБЭ-Г УГТАН АВЛАА

МОНГОЛ УЛСАД ИТАЛИЙН ЭЛЧИН САЙДЫН ЯАМ НЭЭГДЛЭЭ