-
2016 оны 11 сарын 11
УИХ-ын гишүүн З.Нарантуяа Монгол Улсын Ерөнхий сайд Ж.Эрдэнэбатад асуулга тавьжээ.
-
2016 оны 11 сарын 10
Ерөнхийлөгчийн зарлигаар Монгол Улсад инженер, технологийн дээд боловсролтой мэргэжилтэн бэлтгэсний 55 жилийн ойг тохиолдуулан ШУТИС-ийг Хөдөлмөрийн гавьяаны улаан тугийн одонгоор шагналаа.
Шагналыг Ерөнхийлөгчийн Тамгын газрын дарга Ц.Баярсайхан өнөөдөр гардуулан өгч үг хэллээ.
Тэрбээр хэлсэн үгэндээ:
“Эрхэм хүндэт эрдэмтэн багш нар, оюутнууд аа!
Хүндэт зочид, төлөөлөгчид; хатагтай, ноёд оо!
Та бүхэнд энэ сайхан өдрийн мэндийг өргөн дэвшүүлье.
Монгол Улсын Ерөнхийлөгч Цахиагийн Элбэгдорж 2016 оны 10 дугаар сарын 10-ны өдөр 136 дугаар зарлиг гаргаж, Монгол Улсад инженер, технологийн дээд боловсролтой мэргэжилтэн бэлтгэсний 55 жилийн ойг тохиолдуулан Шинжлэх Ухаан Технологийн Их Сургуулийг Хөдөлмөрийн гавьяаны улаан тугийн одонгоор шагнаж байна.
Монгол Улсын орчин үеийн аж үйлдвэрийн салбарын хөгжил, их бүтээн байгуулалт өрнөж асан цаг үе Аж үйлдвэрийн комбинат, Дулааны цахилгаан станц, Дархан-Эрдэнэтийн үйлдвэрийн цогцолборууд, Шарын гол, Багануур, Таван толгойн уулын үйлдвэрүүд, Үндэсний радио телевиз болон бусад хөнгөн, хүнд үйлдвэрүүд баригдаж эхэлсэн 1950-аад оны сүүл 1960-аад оны эхээр Монгол Улсын Их Сургууль дэргэдээ Инженерийн салбар нээж олон зуун инженер техникийн ажилтан, ажилчдыг сурган бэлтгэж эхэлсэн.
Шинжлэх Ухаан Технологийн Их Сургууль нь хөгжлийнхөө үе шат, үүрэг зорилдоо нийцүүлэн Политехникийн Дээд Сургууль, Техникийн Их Сургууль, Шинжлэх Ухаан, Технологийн Их Сургууль болж нэр, бүтэц, зохион байгуулалт, үйл ажиллагаагаа тухай бүрт өөрчлөн шинэчилж ирсэн бөгөөд дэлхийн жишигт хүрсэн сургалт, судалгаа явуулж, төгсгөсөн мэргэжилтнээ мөн тийм түвшинд хүргэх зорилт тавин амжилттай ажиллаж байгаад төр засаг, түмэн олон талархаж байдаг юм.
Монгол Улстаа төдийгүй олон улсад нэр хүндтэй тус их сургууль өнөөдөр манай улсын шинжлэх ухаан, технологийн эрдэм мэдлэг, оюуны чадамжийн хөгжлийн гол тулгуур болж, өнгөрсөн 55 жилийн хугацаанд эх орондоо 140 гаруй мэргэжлээр 70 мянган дээд боловсролтой боловсон хүчнийг бэлтгэн гаргаж улс орны хөгжилд үнэтэй хувь нэмэр оруулсан баялаг түүхтэй, бахархам амжилттай, түүхэн гавьяатай их сургууль болсон байна.
Сүүлийн жилүүдэд дээд боловсролын салбарыг хөгжүүлэх чиглэлд өрнүүлсэн олон ажлуудыг Та бүхэн амжилттай хэрэгжүүллээ. Сургалтын кредит систем, их сургуулийн удирдлагын мэдээллийн систем зэргийг анх удаа их сургуулийнхаа үйл ажиллагаанд амжилттай нэвтрүүлсэн төдийгүй бусад их, дээд сургуулиудад хэрэгтэй олон сайн туршлагыг хуримтлуулж чаджээ.
Шинжлэх Ухаан Технологийн Их Сургуулийн төгсөгчид болон ажилчид, оюутнуудаас Монгол Улсын хөдөлмөрийн баатар, ардын болон гавьяат цолтон, төрийн дээд шагналтан; төр, нийгмийн нэрт зүтгэлтнүүд, эрдэмтэн мэргэд хэдэн зуугаараа төрөн гарсан бөгөөд эх орныхоо уул уурхай, зам тээвэр, харилцаа холбоо, эрчим хүч, үйлдвэр, барилга зэрэг инженер хүний уураг тархи, уран гар шаардсан салбар бүхэнд ажиллаж, хөтөлж, удирдаж явааг тэмдэглэхэд таатай байна.
Та бүхний энэхүү их гавьяат үйл хэргийг Монголын төр өндрөөр үнэллээ. Энэ одон Та бүхний хийж бүтээсэн их ажлын үнэлгээ, цаашид улам ихийг бүтээх амжилтын уриа болно гэдэгт итгэж байна.
Та бүхэнд дахин халуун баяр хүргэж, амжилт хүсье” гэлээ.
-
2016 оны 11 сарын 10
Улсын Их Хурлын Байгаль орчин, хүнс, хөдөө аж ахуйн байнгын хороо өчигдөрийн үдээс хойш хуралдаж, “Монгол Улсын эдийн засаг, нийгмийг 2017 онд хөгжүүлэх үндсэн чиглэл батлах тухай” Улсын Их Хурлын тогтоолын төслийн анхны хэлэлцүүлгийг хийж санал, дүгнэлтээ Эдийн засгийн байнгын хороонд хүргүүлэхээр шийдвэрлэлээ.
Үндсэн чиглэлийн төсөлд макро эдийн засгийн бодлогын хүрээнд 2017 онд эдийн засгийн хүндрэлийг даван туулах, үйлдвэрлэл, дэд бүтцийн томоохон төслүүдийг эрчимжүүлж, эдийн засгийн өсөлтийг нэмэгдүүлэх; инфляцийг зорилтот түвшинд байлгах; ажлын байрыг нэмэгдүүлэх замаар ажилгүйдлийн түвшинг бууруулах; нэгдсэн төсвийн тэнцлийн алдагдлыг өмнөх оны түвшнээс бууруулах замаар дунд хугацаанд төсвийн үндсэн тэнцлийг эерэг болгох нөхцөлийг бүрдүүлэх; Засгийн газар, Хөгжлийн банкны гадаад бондыг эргүүлэн төлөх эх үүсвэрийг шийдвэрлэж, дунд хугацаанд өрийн дарамтыг бууруулах бодлого хэрэгжүүлэх; валютын орох урсгал түр зуур нэмэгдэх үед төгрөгийн нийлүүлэлтийг огцом нэмэгдүүлэхгүй, валютын нөөцийг хамгаалах зарчим баримтлах зэрэг арга хэмжээнүүдийг хэрэгжүүлэхээр төлөвлөсөн байна.
Хэлэлцүүлгийн шатанд Байнгын хорооны эрхлэх асуудлын хүрээн дэх салбарын яамдын үндсэн чиглэлд тусгасан зорилтын талаарх танилцуулгыг сонслоо. Байгаль орчин, аялал жуулчлалын салбарын хууль, эрх зүйн орчныг сайжруулж, байгаль орчныг хамгаалах, нөхөн сэргээх ажлыг эрчимжүүлэн, орчны бохирдол, доройтлыг бууруулж, экосистемийн тэнцвэрт байдлыг хадгалах зорилтын хүрээнд тодорхой арга хэмжээ авч хэрэгжүүлэхээр үндсэн чиглэлд оруулсан байна. Мөн Казиногийн тухай хуулийн төслийг боловсруулах, улсын тусгай хамгаалалттай газрын сүлжээг 600.0 мянган га-гаар өргөжүүлэх, цасны усыг хуримтлуулах хөв цөөрмийг гурваас доошгүй газарт байгуулан, 100-аас доошгүй булаг шандын эхийг хашиж хамгаалахаар тусгажээ. Түүнчлэн түүхий нүүрсний хэрэглээг бууруулж, сэргээгдэх эрчим хүч, цэвэр түлшний хэрэглээг нэмэгдүүлэх, ойн экосистемийг хамгаалах, аялал жуулчлалын дэд бүтцийг сайжруулах зэрэг зургаан зорилт, 11 арга хэмжээг улсын болон орон нутгийн төсвийн нийт 117.7 тэрбум төгрөгийн хөрөнгийг зарцуулан хэрэгжүүлэхээр тусгасан байна.
Хүнс, хөдөө аж ахуй, хөнгөн үйлдвэрийн яам салбарын хэмжээнд нийт 11 зорилт, арга хэмжээг хэрэгжүүлэхэд 114.8 тэрбум төгрөг тусгажээ. Үүнд мал аж ахуйн үйлдвэрлэлийг хөгжүүлэх хүрээний гурван зорилт, арга хэмжээнд 23.9 тэрбум, газар тариалангийн үйлдвэрлэлийг хөгжүүлэх хүрээний гурван зорилт, арга хэмжээнд 30.6 тэрбум, хүнсний үйлдвэрлэлийг хөгжүүлэх хүрээний нэг зорилт арга хэмжээнд 340 сая, хөнгөн үйлдвэрлэлийг хөгжүүлэх хүрээний гурван зорилт арга хэмжээнд 40.0 тэрбум, жижиг дунд үйлдвэрлэлийг хөгжүүлэх хүрээний нэг зорилт арга хэмжээнд 20.0 тэрбум төгрөг тусгасан байна. Эдгээр арга хэмжээг хэрэгжүүлснээр хүнс, хөдөө аж ахуй, хөнгөн үйлдвэрийн салбарт жилд 18.0 мянга орчим ажлын байр нэмэгдэж, ДНБ-ий 35 орчим хувийг хангахаар тооцоолжээ.
Танилцуулгатай холбогдуулан Улсын Их Хурлын гишүүн Х.Баделхан, Д.Тэрбишдагва, Б.Батзориг, Ж.Бат-Эрдэнэ нар асуулт асууж санал хэлсэн. Тухайлбал, Улсын Их Хурлын гишүүн Х.Баделхан малыг эрүүлжүүлэх чиглэлээр яамны зүгээс ямар бодлого барьж байгаа талаар тодруулсан юм. Салбарын яамнаас Малын эрүүл мэндийн тухай болон Малын генетик нөөцийн тухай хуулийн төслүүдийг боловсруулж байна. Энэ хүрээнд мал эмнэлгийн үйлчилгээг улс хариуцах зохицуулалтыг тусгасан. Мөн ОХУ-тай малын эрүүл ахуйн чиглэлээр нягт хамтран ажиллахаар яриа, хэлцэл хийгдэж байна гэсэн тайлбарыг салбарын сайд өгөв. Улсын Их Хурлын гишүүн Б.Батзориг агаарын бохирдлыг бууруулах үйл ажиллагааны талаар үндсэн чиглэлд тусгагдаагүй байгааг сануулаад, хоёрдугаарт 1.0 сая гаруй иргэнтэй нийслэл хотынхоо орчин, хөрс, усны бохирдлын асуудлыг орхигдуулахгүй байхад анхаарах ёстой талаар санал хэллээ. Уг асуудлуудтай холбогдуулан Байгаль орчин, аялал жуулчлалын сайд Д.Оюунхорол өгсөн хариултдаа, агаарын бохирдлын асуудал тун хүнд, төсөвт тусгагдсан таван тэрбум төгрөгийн санхүүжилт хүрэлцэхгүй. Салбарын эрх зүйн баримт бичгүүдийн хүрээнд дөрвөн төрлийн татвараар 2017 оны улсын төсөвт 25 тэрбум төгрөг төвлөрнө. Хуулийн хүрээнд зөвхөн агаарын бохирдлыг бууруулах чиглэлээр зарцуулагдах ёстой дээрх хөрөнгөнөөс ердөө таван тэрбум төгрөгийг л зориулалтын дагуу зарцуулах төслийг Сангийн яам боловсруулсан. Гэхдээ төсөвт төвлөрөх татварын хэмжээ нэмэгдэх магадлалтай хэмээн Байгаль орчин, аялал жуулчлалын яам үзэж байгаа учир төсөвт төлөвлөснөөс давж төвлөрсөн хөрөнгийг зориулалтын дагуу ашиглах зохицуулалтыг хийх бололцоотой хэмээн үзэж байна гэв. Нийслэлийн агаарын бохирдлын шалтгаан нь гэр хорооллын 300.0 мянган өрх, 32000 орчим нам даралтын зуух ажиллуулан үйл ажиллагаа явуулдаг аж ахуйн нэгжүүд байна. Мөн гурван цахилгаан станц, 675.0 мянга гаруй тээврийн хэрэгслийн утаа агаарыг бохирдуулж байна. Тиймээс олон жил эдэлсэн хуучин тээврийн хэрэгслийг Монгол Улсын хилээр нэвтрүүлэх зохицуулалтыг эргэн харах, татварыг нэмэгдүүлэн, бодлогоо шинэчлэх шаардлагатай. Агаарын чанарыг сайжруулах бүсийн гэр хорооллын халаалтаа цахилгаанаар шийдсэн 40 мянгаас доошгүй өрхөд халаалтын улиралд шөнийн цахилгааны урамшууллыг олгоход 5 тэрбум төгрөг зарцуулагдахаар байгаа. Мөн аж ахуйн нэгжүүдийн хэрэглэж буй нам даралтын зуухуудыг сэргээгдэх эрчим хүчний хэрэглээгээр солих ажлыг хэрэгжүүлэх боломжтой хэмээн салбарын яамнаас төлөвлөөд байгаа аж.
Улсын Их Хурлын гишүүн Ж.Бат-Эрдэнэ, монгол чацарганыг экспортлох боломж, олон улсын зах зээл дэх эрэлтийн талаарх судалгаа болон салбарын яамнаас энэ чиглэлийн аж ахуйг өргөжүүлэх талаар ямар бодлого, хөтөлбөр хэрэгжүүлэхээр төлөвлөж байгааг тодрууллаа. Жимс, жимсгэний аж ахуйг хөгжүүлэх, тэр дундаа чацарганы тариалалтыг нэмэгдүүлэн, экспортыг дэмжин, энэ хүрээнд ядуурал, ажилгүйдлийг бууруулан, иргэдийн нийгмийн асуудлыг шийдвэрлэх боломж байгаа талаар Ж.Бат-Эрдэнэ гишүүний саналыг дэмжиж буйгаа П.Сэргэлэн сайд хэлэв.
”Монгол чацарганы чанар олон улсын хэмжээнд өндрөөр үнэлэгддэг бөгөөд эрэлт хэрэгцээ их байдаг. Саяхан Тайваний дэд сайдтай уулзахад Монгол Улсаас их хэмжээний чацаргана худалдан авах санал тавьсан. Тэдний худалдан авах хэмжээ манай улсын чацарганы нийт ургацаас давсан. Ирэх дөрвөн жилд хэрэгжүүлэх “Чацаргана” хөтөлбөрийг манай яамнаас боловсруулсан, энэ хүрээнд ядуурлыг бууруулах, иргэдийг ажлын байраар ханган, орлоготой болгох боломжийг нэмэгдүүлэхэд онцгой анхаарсан. Жижиг, дунд үйлдвэрлэлийг хөгжүүлэх зээл, хөтөлбөрүүддээ ч чацаргана тариалалтыг онцгойлон дэмжихээр төлөвлөөд байна. Засгийн газрын 2016-2020 оны үйл ажиллагааны хөтөлбөрт ч тусгагдсан байгаа. Өнөөдрийн байдлаар Увс аймгийн чацарганыг Франц Улсын холбогдох байгууллагуудаар дамжуулан газарзүйн баримжаатай бүтээгдэхүүнээр бүртгүүлээд, Европ руу экспортлохоор эхний шатны ажлууд явагдаж байна. Зарим аж ахуйн нэгж чацарганы тосыг Япон Улс, АНУ-д бага хэмжээгээр экспортолж байгаа, мөн экспортыг нэмэгдүүлэх яриа хэлцэл хийгдэж байгаа. Тиймээс салбарын яам үүн дээр бодлогын дэмжлэг үзүүлэх бүрэн бололцоо бий. Ирэх онд чацарганы тариалалт, эрэлт хэрэгцээтэй холбоотой асуудлуудыг хэлэлцэхээр олон улсын томоохон хурлыг Монгол Улсад зохион явуулах хүсэлт ирсэн” хэмээн яамнаас дэлгэрэнгүй мэдээлэл өгөв.
Хуралдаанд оролцсон гишүүд малыг эрүүлжүүлэх, ойн санг нэмэгдүүлэх, Туул голын бохирдлыг бууруулах болон бэлчээрийн асуудлаар салбар яамдын чиглэлээр хийж хэрэгжүүлж байгаа асуудлыг хөндөж, өөрсдийн байр сууриа илэрхийллээ. Ийнхүү хэлэлцэж буй асуудалтай холбогдуулан Байнгын хорооны гишүүдээс гаргасан зарчмын зөрүүтэй саналын дөрвөн томъёоллоор санал хураалт явуулан шийдвэрлэв гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 11 сарын 10
Засгийн газраас Сангийн сайдад
-Улаанбаатарт үйл ажиллагаа явуулж байгаа гадаадын Элчин сайдын яамдыг визийн хураамжаа Монгол Улсын үндэсний мөнгөн тэмдэгтээр авдаг болох
-Арилжааны банкуудыг Монголбанкны зарласан ханшаас өндөр үнээр валют арилжиж байгаад зохицуулалт хийж болох эсэхийг судлах
-Валютын хадгаламж, валютын зээлийн үйл ажиллагаанд зохицуулалт хийж, Монгол Улсын үндэсний мөнгөн тэмдэгтийн ханшийг өсгөх ямар боломж байгааг судалж, шаардлагатай бол холбогдох шийдвэрийн төслийг боловсруулах гэсэн гурван чиглэлийг өгсөн.
-
2016 оны 11 сарын 10
УИХ-ын нэгдсэн чуулганаар 2017 оны Монгол Улсын төсвийн хуулийг баталсан. Монгол Улсын 2017 оны төсвийн тухай хууль батлагдсантай холбогдуулан авах арга хэмжээний тухай” УИХ-ын тогтоолын төслийн анхны хэлэлцүүлгийг хийлээ. Уг төсөлд төрийн өмчийн аж ахуйн нэгжүүдийн үйл ажиллагааг сайжруулах, хөрөнгө оруулалтыг нэмэгдүүлэх, хуулийн хэрэгжилтэд анхаарах талаар тусгажээ. Тогтоолын төсөлтэй холбогдуулан асуулт тавьж,үг хэлэх гишүүн байсангүй. Тиймээс эцсийн хэлэлцүүлэгт бэлтгүүлэхээр байнгын хороонд шилжүүлэв.
Дараагаар нь Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төсөл, Төрийн албаны тухай хуульд нэмэлт оруулах тухай хуулийн төслийн хэлэлцэх эсэхийг шийдэж байна. Дээрх хуулийн төслийг ХЗДХ-ийн сайд С.Бямбацогт танилцуулсан юм.
“Сүүлийн жилүүдэд олон нийтийн дунд төрийн албан хаагчдыг оффшор бүсэд компаний хувьцаа эзэмшсэн тохиолдолд авлига, албан тушаалын хэрэгтэй холбоотой гэх хардлага эрс нэмэгдэж, төрд итгэх иргэдийн итгэл буурч байна. Иймд Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн зорилтыг хангах, төрд итгэх иргэдийн итгэлийг нэмэгдүүлэх, нийтийн албаны үйл ажиллагааг хувийн ашиг сонирхлын зөрчлөөс хамгаалах зорилгоор Авлигатай тэмцэх газарт хөрөнгө орлогын мэдүүлэг гаргадаг төрийн албан хаагчдын хувьд оффшор бүс буюу гадаад улсад данс эзэмших, мөнгөн хөрөнгө байршуулах, хуулийн этгээд үүсгэн байгуулах асуудлыг хориглох талаар зохицуулалт хийх зайлшгүй шаардлага тулгарч байна.
Тиймээс Авлигын эсрэг хуульд заасны дагуу хөрөнгө, орлогын мэдүүлэг гаргадаг албан тушаалтан албан үүргээ гүйцэтгэх үедээ, эсхүл нийтийн албан тушаалд томилогдохоор нэр дэвших үед гадаад улсын нутаг дэвсгэрт өөрийн нэр дээр банкинд данс эзэмших, мөнгөн хөрөнгө байршуулах, хуулийн этгээд үүсгэн байгуулахыг хориглох асуудлыг тодорхой зохицуулсан Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төслийг боловсрууллаа.
Хуулийн төслийг боловсруулахдаа хуульд заасны дагуу хөрөнгө, орлогын мэдүүлэг гаргадаг албан тушаалтан Монгол Улсын хууль тогтоомжийг дагаж мөрдөх, ёс зүйн хэм хэмжээг баримтлах нөхцөлийг бүрдүүлэх зорилгоор эдгээр албан тушаалтныг гадаад улсын нутаг дэвсгэрт өөрийн нэр дээр банкинд данс эзэмших, мөнгөн хөрөнгө байршуулах, хуулийн этгээд үүсгэн байгуулахыг хориглох тухай зохицуулалтыг шинээр тусгалаа. Түүнчлэн уг хориглосон зохицуулалттай холбогдуулан нийтийн албан тушаалд томилогдохоор нэр дэвшсэн этгээд болон албан тушаалтан урьдчилан мэдүүлэх үүрэгтэй байх, хууль зөрчсөн тохиолдолд хүлээлгэх хариуцлага зэргийг тодорхой тусгасан болно.
Түүнчлэн нийтийн албан тушаалтаны гадаад улсад суралцах, эмнэлгийн тусламж, үйлчилгээ авах эрхийг хөндөхгүй байх, бусад хуулиар хүлээсэн албаны чиг үүргээ хэрэгжүүлэх хугацаанд тухайн нутаг дэвсгэрт оршин суух, зорчих зэрэг хэрэгцээ шаардлагыг харгалзан тухайн улсын банкинд өөрийн нэр дээр данс нээлгэх, мөнгөн хөрөнгө байршуулах асуудлыг хориглохгүй байхаар зохицуулсан хэмээлээ.
Гишүүд хэлэлцэж байгаа асуудалтай холбогдуулан асуулт тавьж хариулт авч бай
-
2016 оны 11 сарын 10
МАН-ын Бага хурал энэ сарын 20-нд болох тов гарчээ. Тус хурлаар орон нутгийн сонгуулийн үр дүн болон Ерөнхий нарийн бичгийг даргыг томилох асуудлыг хэлэлцэхээр төлөвлөөд байгаа бөгөөд одоогийн үүрэг гүйцэтгэгч Д.Амарбаясгаланг жинхлэж магадгүй гэсэн мэдээлэл байгаа юм.
УИХ-ын сонгуулийн дараа намын Бага хурлыг товлоод байсан ч орон нутгийн сонгуулийн дараа хуралдуулах саналыг гишүүдээс гаргасан тул ийнхүү хойшлуулаад байсан юм.
-
2016 оны 11 сарын 10
УИХ-ын Нийгмийн бодлого, боловсрол, соёл, шинжлэх ухааны байнгын хорооны өчигдөрийн хуралдаан Монгол Улсын эдийн засаг, нийгмийг 2017 онд хөгжүүлэх үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийлээ.
Салбарын сайд нарын танилцуулгатай холбогдуулж УИХ-ын гишүүн Б.Баттөмөр, Ц.Цогзолмаа, М.Оюунчимэг, Н.Учрал нар асуулт асууж, байр сууриа илэрхийлсэн юм. Гишүүдийн хувьд боловсролын чанар, хүртээмжийн ирэх жилийн нөхцөл байдал, боловролын зээлийн санд хамрагдах оюутны тоо, цар хүрээ, шинжлэх ухааны салбарт үзүүлэх бодитой дэмжлэг, Монгол Улс дэлхийн жишигт хүрсэн эмчилгээ үйлчилгээний түвшинд хэдийд хүрэх талаар болон амьжиргааны түвшин тогтоох судлагааг хэр бодитой явуулах гэж байгаа талаар илүүтэй тодруулж байв.
Боловсрол, соёл, шинжлэх ухаан спортын сайд Ж.Батсуурь боловсролын зээлийн санд 2017 оны төсвийн төсөлд 100 тэрбум төгрөг туссан байгаа. Энэ нь нийт оюутны 50 хувьд хүрэлцээтэй. Үлдсэн 50 хувь нь сургалтын төлбөрөө төлөх боломжтой гэсэн судлагаа байгаа. Оюутны сургалтын зээл хүссэн суралцагчдад Боловсролын зээлийн сангаас төлбөрийг нь тухайн их дээд сургуулийн дансанд шууд шилжүүлнэ. Харин шинжлэх ухаан технологийн санд 10.5 тэрбум төгрөг төсөвлөгдсөн. Үүнийг эрдэм шинжилгээний томоохон бүтээл туурвигчдад зохих дэмжлэг үзүүлэхэд зарцуулна. Мөн 45 нас хүртлэх эрдэм шинжилгээний ажилтан БНХАУ-ын зардлаар тухайн салбарын эрдэм шинжилгээний төвд ажиллуулах зэргээр энэ салбарт бид тодорхой зорилт тавин ажиллаж байгаа гэж хариулаа. Харин Эрүүл мэндийн сайд А.Цогцэцэг 2020 он гэхэд бид дэлхийн түвшинд хүрсэн эмчилгээ үйлчилгээг ард иргэддээ үзүүлэх зорилтыг тавьж ажиллаж байгаа. БСШУСЯ-тай хамтран гадаадын их дээд сургуульд эмч мэргэжилтэн, боловсон хүчнээ түлхүү бэлтгэх талаар ажиллаж байна гэж байсан бол Хөдөлмөр, нийгмийн хамгааллын сайд Н.Номтойбаяр ирэх жил Монгол Улсын хэмжээнд амьжиргааны түвшин тогтоох судлагааг хийнэ. Эхний ээлжинд Үндэсний статистикийн газартай хамтран амьжиргааны түвшин тогтоох аргачлалыг гаргахаар ажиллаж байна хэмээн хариулж байлаа.
Монгол Улсын эдийн засаг, нийгмийг 2017 онд хөгжүүлэх үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийсэн талаархи байнгын хорооны санал, дүгнэлтийг УИХ-ын гишүүн С.Чинзориг Эдийн засгийн байнгын хороонд танилцуулахаар болов.
-
2016 оны 11 сарын 10
УИХ-ын үдээс өмнөх чуулган эхлэх үеэр УИХ-ын гишүүн Л.Болд Сонгуулийн дүнг УИХ-аар хэлэлцэх саналыг хэлэв. Тэрбээр хуралдааны хэлэлцүүлэг эхлэхээс өмнө сонгуулийн дүнтэй холбоотой дахин нэг баримт дэлгэв. Тодруулбал, Орон нутгийн сонгуулийн дараа СХД-ийн IX хорооноос Сүхбаатар аймгийн түвшин ширээ сумын 30 саналын хуудалс илэрчээ.
-
2016 оны 11 сарын 10
2017 оны төсвийн тухай хуульд ирэх онд орлого нэмэгдүүлэх чиглэлд хийгдэх хэд хэдэн ажлууд тусгагдсан байсан. Үүн дотор “Монгол шуудан” ТӨХК-ийг 20, “Эрдэнэт-Булганы цахилгаан түгээх сүлжээ” ТӨХК-ийг 30 тэрбум төгрөгөөр хувьчлахаар тооцон, өмч хувьчлалын орлогыг 50 тэрбум төгрөгөөр нэмэгдүүлэх асуудал тусгагдсан.
Өнөөдөр болсон УИХ-ын чуулганы үдээс өмнөх нэгдсэн хуралдаанаар ТӨХК-ийг 2016-2017 онд хувьчлах Их хурлын тогтоолын төслийг үргэлжлүүлэхтэй холбогдуулан гишүүд байр сууриа илэрхийллээ. Дээрх асуудлыг Т.Аюурсайхан гишүүн эсэргүүцэж буй юм. Гишүүдийн байр суурийг хүргэж байна.
УИХ-ын Т.Аюурсайхан: ТӨХК-ийг хувьчлахдаа ШӨХТГ-аас санал авсан байх ёстой
“Өнгөрсөн 4 жилд их хурлын даргыг сонгохоос эхлээд хууль тогтоомж маш шүүмжлэлтэй хандаж ирсэн. Энэ алдааг засах гэж байдгаараа ажиллаж байна. Үүнээс болж ард иргэдийн итгэлийг алдуулсан. УИХ-аас гарч байгаа тогтоолын төслийг хуульд нийцүүлэх шаардлагатай гэж үзэж байгаа юм. Төрийн өмчийн эд хөрөнгө хуульчлагдах төсөл авахдаа ШӨХТГ-аас санал авсан байх ёстой. Төр хэдэн хувийг нь өмчлөх үү гэх мэт энэ тогтоолын төслийг батлавал үндсэн хуульд заасан 2 заалтыг зөрчиж байна. Эргэж Үндсэн хуульд нийцүүлэх санал гаргаж байна”
УИХ-ын гишүүн Төсвийн байнгын хорооны дарга Ч.Хүрэлбаатар: Шуудангийн салбарт анхаарал хандуулж ажиллахгүй бол болохгүй
“ Төсвийн байнгын хорооноос ажлын хэсэг гаргаад ТӨХКд шалгалт хийсэн. Шалгалтаар 187 ТӨХК 11 тэрбум төгрөгийн алдагдалтай ажиллаж 5000 орон тоо нэмэгдсэн. Аж ахуй нэгжийн захирлууд нэмэгдсэн. Хувьчлахгүй энэ байдлаар явбал 94 сая төгрөгийн ашигтай байж болно. Харилцаа холбоо өнөөдөр хэчнээн ирээдүйтэй чухал болохыг тооцож ирээдүйгээ харах хэрэгтэй. Өнөөдөр дэлхий дээр 205 тэрбум имэйл бие рүүгээ явж байна. Тиймээс Шуудангийн салбарт анхаарал хандуулж ажиллахгүй бол болохгүй. Зөвхөн өнөөдөр ч анх удаагаа ТӨХК-ийг хувьчилах гээд байгаа юм биш. 34 хувь нь саяхан хэлэлцсэн асуудал. Бид энэ тал дээр бодлогод тууштай байх ёстой гэж үзэж байна. Ирэх 4 жилд ТӨХК-д анхаарал хандуулах хэрэгтэй Хувийн хэвшил рүү Төр хамраа цухуйлгаад хэрэггүй. Энд бид зарчимтай байх ёстой. Ирээдүйд орж ирж байгаа хөрөнгийг сайн харах хэрэгтэй Засгийн газар ажлаа сайн зохион байгуулах хэрэгтэй багаа юм”
УИХ-ын гишүүн Занданшатар: Эрдэнэт Булганы сүлжээг хувьчлах асуудал нь Засгийн газраар оруулж ирсэн юм уу
“Монгол шуудан бол ОУ-ын жишиг хувьчлагдах нь зүйтэй. Харин Эрдэнэт булганы сүлжээ, Эрдэнэтийн үйлдвэрийн асуудал. Эрдэнэт булганы сүлжээ 120 тэрбум төгрөгийн үндсэн хөрөнгөтэй стратегийн бодлоготой асуудал. Эрдэнэт булганы сүлжээ хамгийн ашигтай салбар юм. Хувьчлах асуудал нь Засгийн газраас оруулж ирсэн юм уу”
УИХ-ын гишүүн Төсвийн байнгын хорооны дарга Ч.Хүрэлбаатар: ТӨХК-ийг хувьчлан үндсэн гурван жил байна
“ Энэ асуудлыг хэлэлцэхдээ төрийн өмөчийн Ням-Осортой хэлэлцээд 3 асудлыг авч үзсэн. 2016-2020 онд төрийн өмчийг хувьчлах үндсэн 3 жил байна. Үргэсэн хөрөнгө оруулагч нарыг эргээд татах , Монголыг сонирхох нэг хэсэг болгох шаардлагатай байна гэж үзэж байгаа. Өмч хувьчлалаар төрийн банкаар 75 тэрбум төгрөгөөр хувьчилна гээд байдаг үнэндээ 300 тэрбум төгрөгөөр хувьчилна. Энэ дүнгээр хувьчилна гэсэн үг биш”
УИХ-ын гишүүн Оюунчимэг: ТӨХК 10.8 их наяд төгрөгийн алдагдалтай ажиллаж байна
Оюунчимэг “ Төрийн өмчит үйлдвэрийн газрын алдагдлын асуудлууд олны анхаарлыг татаж байгаа. ТӨХК 10.8 их наядын алдагдалтай ажиллаж байна. Хэмнэлт гэж ярьж байгаа тохиолдолд үр ашиг авчрах уу. Хувьчлах орон тоог эрхзүйгээр цуг зохицуулах асуудал орж ирэх үү”
УИХ-ын гишүүн Төсвийн байнгын хорооны дарга Ч.Хүрэлбаатар: Өнгөрсөн 4 жилд ТӨХК-ийн захирлууд төрд ашигтай орлого өгөөгүй
“Нямдоржийн саналаар ажлын хэсэг гаргасан. Төсвийн байнгын хорооноос хэд хэдэн дүгнэлт гаргасан. Ням-Осортой уулзсан. Даргаар очиж байгаа хүмүүс ТӨХК-иас чиглэл өгч байгаа. Шинээр очсон Төрийн өмчит компаний захирал ажлаа сайжруулж чадахгүй бол дараагийн алхам руу орох хэрэгтэй гэдгийг сайтар ярилцсан. Өнгөрсөн 4 жилд ТӨХК-ийн захирлууд төрд ашигтай орлого өгөөгүй, банкуудаас их хэмжээний зээл авсан байсан. ТУЗ-д мэргэжлийн асуудал эрхэлсэн яам, байгууллага орж ирэх нь зүйтэй гэж үзсэн. ТӨХК-ийн үр ашгийг нэмэгдүүлэх чиглэсэн үйл ажиллагааг чиглүүлэх арга хэмжээг авсан. гэсэн байр суурийг илэрхийлсэн юм.
-
2016 оны 11 сарын 10
УИХ-ын чуулганы үдээс өмнөх хуралдаанаар Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, анхны хэлэлцүүлэг/-ийг хийв. Энэ үеэр 2017 оны төсвийн төслийг батлах тухай Байнгын хорооноос гаргасан санал асуулгатай холбогдуулан УИХ-ын гишүүн Эрдэнэбат
“ Долларын ханш болохоо байлаа. Валютын ханш хоногоор биш цагаа өсдөг болчихлоо. Үүнийг хариуцаж байгаа хүн байна уу. Ам.доллар 3000 төгрөгт хүрэх нь. Үүнд арга хэмжээ авч байгаа Монголбанк Засгийн газар байна уу. Энэ чинь импортын хэрэглээ огцом өсөж гадагшаа юм гарахаа байсан гэсэн үг. Долларын ханшийг хэдээр төсөвлөсөн юм бэ Хариулт өгөх хүн байна уу” гэв. Түүний асуулгад УИХ-ын гишүүн Төсвийн байнгын хорооны дарга Ч.Хүрэлбаатар хариулав. Тэрбээр
“ Вальютын ханш хөдлөлтийн үндсэн үзүүлэлт байна. Хамгийн гол нь эрэлт нийлүүлэлт. Нөөц гэж бий. Эрдэнэбатад хэлмээр байна 2.2 тэрбум ам.долларын нөөц байсан. Өнгөрсөн 4 жилийн хугацаанд үүнийг үрэн таран хийсэн. Одоо валютын нөөц гэж байхгүй. Хятадаас авсан 1.3 тэрбум ам.долларын зээлээр нөөцөө бүрдүүлж байна. Валютын сангийн нөөцийг өнгөрсөн дөрвөн жилд нийтдээ дөрвөн тэрбум ам.доллараар үрсэн. Одооо нууж байсан идээ бээр нь хагарч байна. Монголбанк валютын урсгалыг тэнцвэржүүлэхэд чадах чадхаараа арга хэмжээ авч ажиллаж байна. Энэ долларын алдааг хязгаарлаж байна. Гэхдээ бидэнд боломж бий. Үүний тулд том төслүүдээ явуулах хэрэгтэй. Нэг хүн гарч ирээд хэлээд нэмэргүй. 2017 оны төсөв чухал үүрэгтэй. 514 тэрбум төгрөгийн үнэт цаасыг зогсоож чадсан. Мөн хэмнэлтийн бодлогыг оруулж ирсэн” хэмээв.
-
2016 оны 11 сарын 10
Монгол Улсын нэгдсэн төсвийн 2017 оны төсвийн хүрээний мэдэгдэл 2018-2019 оны төсвийн төсөөллийн тухай хуулийн төсөлийг хэлэлцэж баталлаа.
Хэлэлцэж буй асуудалтай холбогдуулж УИХ-ын гишүүн Т.Аюурсайхан ДНБ-ний тооцооллоор хийсэн аргыг олж харахгүй байна, шинжилгээний үр дүнг асуув. Түүний асуулгад УИХ-ын гишүүн, Төсвийн байнгын хорооны дарга Ч.Хүрэлбаатар хариулт өгсөн юм. Тэрбээр
”Засгийн газар энэ чиглэлийн судалгаанд анхаарч байх нь зүйтэй. Энэ удаагийн төсвийн хүрээний мэдэгдэл дээр эконометрийн судалгааны талаарх материал УИХ-ын гишүүний гар дээр ирээгүй. Тийм учраас энэ төрлийн судалгаа хийгдээгүй” гэлээ.
Үүний дараа Засгийн газраас өргөн мэдүүлсэн Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн төслүүдийн гурав дахь хэлэлцүүлгийг хийлээ. Уг асуудалтай холбогдуулан асуулт асууж үг хэлэх гишүүд байгаагүй тул дөрөв дэхь хэлэлцүүлэгт бэлтгүүлэхээр холбогдох байнгын хороонд шилжүүллээ.
-
2016 оны 11 сарын 10
УИХ-ын чуулган үргэлжилж байна. Хуралдаанаар Нийгмийн даатгалын сангаас олгох тэтгэмжийн тухай эцсийн хэлэлцүүлгийг явууллаа. Хэлэлцүүлгийн тухай Төсвийн байнгын хороо дүгнэлтээ гаргажээ. Дүгнэлтийг УИХ-ын гишүүн Д.Тогтохсүрэн гишүүн танилцууллаа. Тэрбээр ”насны хишиг”-ийг ирэх оны нэгдүгээр сарын 1-нээс эхлэн жилд хоёр удаа олгож байх талаар дуулгав.
УИХ-ын гишүүн Д.Тогтохсүрэн ” 2017 оны төсвийн тухай Нийгмийн даатгалын төсвийн УИХ-ын нэгдсэн чуулганы /11.3/ хуралдаанаар төсвийн байнгын хороонд шийдүүлсэн билээ. Эцсийн хуралд бэлдхэд хуралдаанд оролцсон гишүүд санал нэгтэйгээр дэмжлээ.
Хуулийн техникийн засварыг орууллаа. Ахмад настаны ”насны хишиг”-ийг билгийн тооллын хаврын тэргүүн сараас эхлэн 65-69 насны ахмадуудад 50 мянга, 80-89 насны ахмадууд 100 мянга, 90-ээс дээш насны ахмадуудад 300 мянган төгрөгийг жилд хоёр удаа тус тус олгохоор боллоо” гэлээ.
УИХ--ын чуулганаар 10 асуудал хэлэлцэж буйн нэг нь ТӨХК-ийг хувьчлах асуудлаар гишүүд санал солилцож байна.
-
2016 оны 11 сарын 10
Д.Эрдэнэбат: Доллар 3000 хүрлээ. Үүнийг хариуцаж байгаа Монголбанк, Засгийн газар байна уу
-
2016 оны 11 сарын 10
УИХ-ын чуулган эхэллээ. Хуралдаанаар Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, анхны хэлэлцүүлэг/;-ийг хэлэлцэж байна.
-
2016 оны 11 сарын 10
Хөдөлмөр, нийгмийн хамгааллын сайд Н.Номтойбаярын ярьснаар, салбарын яамнаас уг үйлчилгээг эрхэлж байгаа газруудад шалгалт хийсэн бөгөөд хяналтыг нь сайжруулж үйлчилгээг дэмжих нь зүйтэй гэсэн саналаа Засгийн газрын хуралдаанд танилцуулаад байгаа аж.
-
2016 оны 11 сарын 10
Валютын ханшийн өсөлтийг зогсоох, өвөлжилтийн бэлтгэлийг хангах талаар үүрэг өглөө
Засгийн газрын хуралдааны эхэнд Монгол Улсын Ерөнхий сайд Ж.Эрдэнэбат зарим асуудлаар холбогдох сайд нарт үүрэг өглөө. Тухайлбал, Ерөнхий сайд өнгөрсөн амралтын өдрүүдэд Өмнөговь аймагт ажиллахдаа тэнд үйл ажиллагаа явуулж байгаа Оюутолгой, Эрдэнэс-Тавантолгой, Энержи ресурс, орон нутгийн Тавантолгой зэрэг компанийн удирдлагуудад тодорхой үүрэг өгсөн. Энэ үүргийн биелэлтийг хангах, хяналт тавих, мөн Гашуунсухайтын боомтын талаар авах арга хэмжээний талаар санал боловсруулах үүрэг бүхий ажлын хэсэг байгуулж ажиллахыг холбогдох сайд нарт үүрэг болголоо.
Түүнчлэн өвөлжилтийн бэлтгэлийг хангаж ажиллахыг Монгол Улсын Шадар сайдад, валютын ханшийн өсөлтийг барих талаар холбогдох байгууллагуудтай зөвшилцөн судалж Засгийн газрын хуралдаанд танилцуулах, шаардлагатай бол холбогдох хуулийн төслийг боловсруулахыг Сангийн сайдад үүрэг болголоо. Тухайлбал:
-Улаанбаатарт үйл ажиллагаа явуулж байгаа гадаадын Элчин сайдын яамдыг визийн хураамжаа Монгол Улсын үндэсний мөнгөн тэмдэгтээр авдаг болох,
-Арилжааны банкуудыг Монголбанкны зарласан ханшаас өндөр үнээр валют арилжиж байгаад зохицуулалт хийж болох эсэхийг судлах,
-Валютын хадгаламж, валютын зээлийн үйл ажиллагаанд зохицуулалт хийж, Монгол Улсын үндэсний мөнгөн тэмдэгтийн ханшийг өсгөх ямар боломж байгааг судалж, шаардлагатай бол холбогдох шийдвэрийн төслийг боловсруулж танилцуулахыг Сангийн сайдад үүрэг болгов.
Төрийн өмчит хоёр үйлдвэрийн газрыг нэгтгэлээ
“Төрийн үйлчилгээ”, “Засгийн газрын байруудын нэгдсэн захиргаа” гэж төрийн өмчит аж ахуйн тооцоотой үйлдвэрийн газруудын үйл ажиллагааг тус тус зогсоож, тус хоёр үйлдвэрийн газрын гүйцэтгэж байсан чиг үүрэг, хөрөнгө санхүү, хүний нөөцийг нийлүүлэн “Засгийн газрын байруудын нийтлэг үйлчилгээний газар” төрийн өмчит аж ахуйн тооцоотой үйлдвэрийн газар болгон өөрчиллөө. Мөн тус газрын дүрмийг баталлаа.
Ирэх дөрвөн жилд 259 хуулийг шинэчилнэ
“Монгол Улсын хууль тогтоомжийг 2020 он хүртэл боловсронгуй болгох үндсэн чиглэл батлах тухай” УИХ-ын тогтоолын төслийг хэлэлцээд УИХ-д өргөн мэдүүлэхээр тогтов. Үндсэн чиглэлийн төсөлд ирэх дөрвөн жилд 259 хуулийн төсөл, УИХ-ын 16 тогтоолын төслийг боловсруулж өргөн мэдүүлэхээр тусгажээ. Холбогдох нийт 43 байгууллагаас ирүүлсэн саналыг үндэслэн уг үндсэн чиглэлд тусгах хууль тогтоомжийн жагсаалтыг гаргасан байна. Ирэх дөрвөн жилд өөрчлөх 260 хууль, тогтоолын төслийг санаачлагчаар нь үзвэл Засгийн газар 238, УИХ-ын гишүүд 17, Ерөнхийлөгч 4 хуулийн төслийг санаачлахаар тус тус тусгажээ.
Монголын хэсгийг Шадар сайд ахална
Эрдэс баялаг, эрчим хүч, дэд бүтцийн хамтын ажиллагааны Монгол, Хятадын хамтарсан зөвлөлийн Монголын хэсгийн бүрэлдэхүүнийг баталлаа. Зөвлөлийн бүрэлдэхүүний Монголын хэсгийн даргаар Монгол Улсын Шадар сайд ажиллана. Зөвлөлийн анхдугаар хуралдаан ирэх сард БНХАУ-ын Бээжин хотод болох юм. Уг хуралдаанд болон хэлэлцэх асуудалтай холбогдуулан Монголын талын төлөөлөгчдийн баримтлах удирдамжийг гаргаж Засгийн газрын хуралдаанд танилцуулахыг холбогдох сайд нарт үүрэг болголоо.
Жижиг, дунд үйлдвэрийн зээлийн олголтыг зогсоохгүй, “Түр журам”-аар зохицуулна
Засгийн газрын тусгай сангийн тухай хуульд нэмэлт өөрчлөлт оруулах хуулийн төслийг ирэх арваннэгдүгээр сард УИХ-аар хэлэлцэнэ. Гэхдээ эдийн засаг хүндрэлтэй өнөөгийн нөхцөлд жижиг, дунд үйлдвэрлэгчдэд олгодог хөнгөлөлттэй зээлийн дэмжлэг үзүүлэх үйл ажиллагааг саадгүй, тасралтгүй явуулах нь эдийн засгийн болон нийгмийн ач холбогдолтой гэж Засгийн газар үзэж байна. Тийм учраас уг хуулийн төслийг батлагдах хүртэлх хугацаанд үйлчлэх Жижиг, дунд үйлдвэрийг хөгжүүлэх сангаас санхүүжих хөнгөлөлттэй зээлийн төсөл сонгон шалгаруулах түр журмыг баталлаа. Уг түр журмаар 2016 онд олгогдох 35 тэрбум төгрөгийн хөнгөлөлттэй зээлийн төсөл сонгон шалгаруулах ажлыг зохион байгуулж, хяналт тавьж ажиллахыг Хүнс, хөдөө аж ахуй, хөнгөн үйлдвэрийн сайдад даалгалаа.
Гадаадаас авах ажиллах хүч, мэргэжилтний тоог батлав
Монгол Улсад 2017 онд үйл ажиллагаа явуулах аж ахуйн нэгж, байгууллагын нийт ажиллагсдын тоонд эзлэх гадаадын ажиллах хүч, мэргэжилтний хувийг Засгийн газрын тогтоолоор баталлаа.
Гадаад ажилчдын тоо нь тухайн байгуллагын нийт ажилчдын таван хувиас хэтрэхгүй байхаар тогтоолоо. Тогтоосон квотын 50 хүртэлх хувьтай тэнцэх гадаадаас авах ажиллах хүчний зөвшөөрлийг Хөдөлмөр, халамж үйлчилгээний газар, 50-иас дээш бол Засгийн газарт асуудал тавьж шийдвэрлүүлж байхыг Хөдөлмөр, нийгмийн хамгааллын сайдад үүрэг болголоо.
2016 оны аравдугаар сарын байдлаар 11072 гадаадын иргэн Монгол Улсад хөдөлмөр эрхэлж байгаа бөгөөд энэ нь өнгөрсөн оныхоос 33 хувиар буурсан үзүүлэлт юм байна. Хөдөлмөр эрхлэлтийг дэмжих санд 2015 онд 43 тэрбум төгрөг төвлөрч байсан бол 2016 онд 37.8 тэрбум төвлөрүүлэхээс энэ оны аравдугаар сарын байдлаар 12 тэрбум төгрөг төвлөрөөд байгаа юм байна.
Товч мэдээ
- Дипломат болон албан паспорт эзэмшигчдийг визийн шаардлагаас чөлөөлөх тухай Монгол Улсын Засгийн газар, Бүгд Найрамдах Литва Улсын Засгийн газар хоорондын хэлэлцээрийн төслийг дэмжив. Хэлэлцээрт гарын үсэг зурснаар дипломат болон албан паспорт эзэмшигч иргэд хоёр улсын нутаг дэвсгэрт 90 хүртэл хоногийн хугацаанд визгүй зорчих эрхтэй болох юм.
- Хөгжлийн бэрхшээлтэй иргэний эрхийг хангах орон тооны бус зөвлөлийн журмыг шинэчлэн баталлаа. Дүрмийн шинэчлэлийн гол зохицууулалт нь уг зөвлөл нь Монгол Улсын Ерөнхий сайдын дэргэд ажиллах юм.
- УИХ-ын гишүүн Ц.Гарамжав, Н.Оюундарь нарын санаачлан боловсруулсан Монгол Улсын иргэнд газар өмчлүүлэх тухай хуульд нэмэлт оруулах тухай хуулийн төслийг хэлэлцээд уг төсөл нь Монгол Улсын Үндсэн хууль болон бусад хэд хэдэн хуультай зөрчилдөж байгаа тул дэмжих боломжгүй гэж үзэв.
- УИХ-ын гишүүн С.Эрдэнийн санаачлан боловсруулсан Галт зэвсгийн тухай хуульд өөрчлөлт оруулах тухай, Жолоочийн даатгалын тухай хуульд өөрчлөлт оруулах тухай, Зөрчлийн тухай хуульд өөрчлөлт оруулах тухай, Монгол Улсын хилийн тухай хуульд өөрчлөлт оруулах тухай, Цагдаагийн албаны тухай хуулийг дагаж мөрдөх журмын тухай хуульд өөрчлөлт оруулах тухай хуулийн төслүүдийг хэлэлцэн хэд хэдэн саналыг хууль санаачлагчид уламжлахаар болов гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
-
2016 оны 11 сарын 10
Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, анхны хэлэлцүүлэг/;
Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн төслийн хамт өргөн мэдүүлсэн хууль, Улсын Их Хурлын тогтоолын төслүүд /Засгийн газар 2016.09.30-ны өдөр өргөн мэдүүлсэн, эцсийн хэлэлцүүлэг/;
Хүүхэд харах үйлчилгээний тухай хуульд өөрчлөлт оруулах тухай, Засгийн газрын тусгай сангийн тухай хуульд нэмэлт оруулах тухай, Шүүхийн захиргааны тухай хуульд нэмэлт оруулах тухай, Ашигт малтмалын тухай хуульд нэмэлт, өөрчлөлт оруулах тухай, Ирээдүйн өв сангийн тухай хуульд нэмэлт, өөрчлөлт оруулах тухай, Улсын тэмдэгтийн хураамжийн тухай хуульд нэмэлт оруулах тухай, Төсвийн тухай хуульд нэмэлт оруулах тухай, Аж ахуйн үйл ажиллагааны тусгай зөвшөөрлийн тухай хуульд нэмэлт оруулах тухай, Хөрөнгө оруулалтын тухай хуульд нэмэлт оруулах тухай хуулийн төслүүд болон ”Үндсэн хуулийн цэцийн дарга, гишүүдийн цалингийн хэмжээг шинэчлэн тогтоох тухай”, ”Прокурорын байгууллагын прокурорын албан тушаалын цалингийн хэмжээг шинэчлэн тогтоох тухай”, ”Төрийн өмчийг 2015-2016 онд хувьчлах, өөрчлөн байгуулах үндсэн чиглэлийг үргэлжлүүлэн хэрэгжүүлэх тухай” Улсын Их Хурлын тогтоолын төслүүд /Монгол Улсын 2017 оны төсвийн тухай хуулийн хоёр дахь хэлэлцүүлэгтэй холбогдсон, эцсийн хэлэлцүүлэг/;
Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, эцсийн хэлэлцүүлэг/;
Монгол Улсын 2017 оны төсвийн тухай, Нийгмийн даатгалын сангийн 2017 оны төсвийн тухай хуулийн төслүүд /Засгийн газар 2016.09.30-ны өдөр өргөн мэдүүлсэн, гурав, дөрөв дэх хэлэлцүүлэг/;
“Монгол Улсын 2017 оны төсвийн тухай хууль батлагдсантай холбогдуулан авах арга хэмжээний тухай” Улсын Их Хурлын тогтоолын төсөл /анхны хэлэлцүүлэг/;
“Төрөөс мөнгөний бодлогын талаар 2017 онд баримтлах Үндсэн чиглэл батлах тухай” Улсын Их Хурлын тогтоолын төсөл /Монголбанк 2016.09.29-ний өдөр өргөн мэдүүлсэн, анхны хэлэлцүүлэг/;
Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуульд нэмэлт, өөрчлөлт оруулах тухай хуулийн төсөл, Төрийн албаны тухай хуульд нэмэлт оруулах тухай хуулийн төсөл /Засгийн газар 2016.10.07-ны өдөр өргөн мэдүүлсэн, хэлэлцэх эсэх/;
Нийгмийн даатгалын сангаас олгох, тэтгэвэр тэтгэмжийн тухай хуульд нэмэлт, өөрчлөлт оруулах тухай хуулийн төсөл /Улсын Их Хурлын гишүүн С.Чинзориг 2016.10.07-ны өдөр өргөн мэдүүлсэн, хэлэлцэх эсэх/;
Малчин, хувиараа хөдөлмөр эрхлэгчийн тэтгэврийн даатгалын шимтгэлийг нөхөн төлүүлэх тухай хуулийн төсөл /Улсын Их Хурлын гишүүн С.Чинзориг 2016.10.07-ны өдөр өргөн мэдүүлсэн, хэлэлцэх эсэх/;
Улсын Их Хурлын гишүүн Д.Тэрбишдагваас ”Мал аж ахуйн салбарын хөгжлийг шинэ шатанд гаргах, биологийн онцгой шинж бүхий монгол малын ашиг шимийг бүрэн ашиглах чиглэлээр цаашид баримтлах бодлого, дэвшүүлсэн зорилт, төлөвлөсөн арга хэмжээ болон төр, засгийн газар, салбарын түвшинд ямар бодлого шийдвэр, дэмжлэг шаардлагатай байгаа талаар” Хүнс, хөдөө аж ахуй, хөнгөн үйлдвэрийн сайдад тавьсан асуулгын хариуг сонсох.
-
2016 оны 11 сарын 10
Төсвийн байнгын хорооны өнөөдөр хуралдана. Хуралдаан 14.00 цагаас “Жанжин Д.Сүхбаатар” танхимд болох бөгөөд хуралдаанаар Монгол Улсын нэгдсэн төсвийн 2017 оны төсвийн хүрээний мэдэгдэл, 2018-2019 оны төсвийн төсөөллийн тухай хуулийн төсөл /Засгийн газар 2016.09.30-ны өдөр өргөн мэдүүлсэн, эцсийн хэлэлцүүлгийг хэлэлцэх аж.
-
2016 оны 11 сарын 09
Улсын Их Хурлын гишүүн, Өргөдлийн байнгын хорооны дарга Д.Сарангэрэл, Улсын Их Хурлын гишүүн, Ажлын хэсгийн ахлагч А.Сүхбат нар өнөөдөр /2016.11.09/ Туул голын бохирдлын асуудлаар ирүүлсэн өргөдлийн дагуу холбогдох хууль тогтоомжийн хэрэгжилтийг судлахаар Төв болон Харгиа цэвэрлэх байгууламж, мөн Шувуун фабрикийн орчимд хайрга олборлодог карьеруудын үйл ажиллагаатай танилцаж, газар дээр нь ажиллалаа.
Өргөдлийн байнгын хороо нь Туул голын бохирдлыг бууруулах, урсацыг хамгаалах, хамгаалалтын бүсийн дэглэмийг мөрдүүлэх, усны чанарын стандартад хүргэхэд шаардлагатай арга хэмжээг авах, холбогдох хууль тогтоомжийн хэрэгжилтийг хангуулах чиглэлээр тогтоол гаргаж, Ажлын хэсгийг 2016 оны 10 дугаар сарын 25-ны өдөр байгуулсан байна.
Ажлын хэсгийн гишүүд эхлээд Ус сувгийн удирдах газрын харьяа Төв цэвэрлэх байгууламжийн үйл ажиллагаатай танилцаж, түүний шинэчлэлийн хэрэгжилтийн байдал, тулгамдаж буй бэрхшээлийн талаар мэдээлэл солилцон холбогдох албан тушаалтнуудаас тайлбар авахын зэрэгцээ үүрэг, чиглэл өглөө.
Ус сувгийн удирдах газрын дарга Ц.Төрхүү мэдээлэл хийх үеэр, тус цэвэрлэх байгууламж нь хоногт дунджаар 160000-190000 м3 бохир усыг хүлээн авч механик болон биологийн цэвэрлэгээг хийн, хэт ягаан туяагаар халдваргүйжүүлсний дараа Туул голд нийлүүлдэг. Бохир усны худгийн ихэнх нь удаан хугацааны ашиглалтын явцад элэгдэж хуучрах, хагаралт цууралт үүсэх зэрэг гэмтлүүд тохиолдож байгаагаас тус байгууламжийн ачааллыг нэмэгдүүлэхэд хүргээд байна. Иймд 250000 шоометр/хоног хүчин чадал бүхий шинэ цэвэрлэх байгууламж барих зайлшгүй шаардлагатай байна. Энэхүү асуудал өчигдөр /2016.11.08/ зохион байгуулагдсан “Төв цэвэрлэх байгууламжийн өнөөгийн байдал, хөрөнгө оруулалтын асуудал” сэдэвт хэлэлцүүлгийн үеэр хөндөгдөж, шинэ Төв цэвэрлэх байгууламжийг барихын тулд шинээр техник эдийн засгийн үндэслэлийг боловсруулах бус өмнө нь боловсруулагдсан техник эдийн засгийн үндэслэлийг ашиглаад явах нь зөв гэсэн байр суурь илэрхийлэгдэж байсан гэлээ.
Өргөдлийн байнгын хорооны дарга Д.Сарангэрэл хэлэхдээ, Нийслэлийн иргэдийн 97.5 хувь нь Туул голоос ундаалдаг гэтэл бид өөрсдийнхөө ундаалдаг ус руугаа бохир нийлүүлж байна. Туул голыг бохирдуулж буй гурван үндсэн хүчин зүйлс бол цэвэрлэх байгууламж болон арьс, ширний үйлдвэрүүдээс гарч буй бохир мөн Туул голын орчмоос элс, хайрга олборлож байгаа явдал нь голын урсацыг багасгах, байгалийн тэнцвэрийг алдагдуулахад хүргээд байна. Саяхан хийгдсэн судалгаагаар Туул голын усыг цэвэршүүлсний дараа гэдэсний өвчин үүсгэдэг савханцар нян илэрсэн. Иймд УИХ-ын зарим гишүүд Туул голыг хамгаалах тусгай хууль гаргах тухай санал нэгдээд байгаа гэлээ.
Дараа нь Ажлын хэсгийн гишүүд болон дагалдан яваа албаны хүмүүс Хан-Уул дүүргийн нутаг дэвсгэрт орших Шувуун фабрикийн орчимд хайрга олборлодог карьер болон Харгиа цэвэрлэх байгууламжийн үйл ажиллагаатай тус тус танилцлаа.
Ажлын хэсгийн ахлагч А.Сүхбат хэлэхдээ, Туул голын ай савуудыг ихээр сүйтгэж байна. Туул голын энгийн хамгаалалтын бүсээс элс, хайрга олборлож буй аж ахуйн нэгжүүд хэдийгээр тусгай зөвшөөрөл авсан хэдий ч нөхөн сэргээлт хийхгүй байна. Үүнд хариуцлага тооцуулах тал дээр бид ажиллаад зогсохгүй эдгээр тусгай зөвшөөрлүүдийг цуцлуулахаар ажиллах болно гэлээ. Түүнчлэн Туул голыг бохирдуулж буй бусад хүчин зүйлсийг арилгахад шат бүртээ хяналтаа сайжруулж, хууль эрх зүйн асуудлыг боловсронгуй болгох нэн шаардлагатай байна гэж анхаарууллаа.
Гишүүд дээрх газруудын үйл ажиллагаатай танилцсан тухай болон цаашид шийдвэрлэвэл зохих асуудлын талаар Байнгын хорооны хуралдаанд танилцуулах юм гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
-
2016 оны 11 сарын 09
Ерөнхий сайд Ж.Эрдэнэбат Австралийн Холбооны Улсаас Монгол Улсад суугаа Онц бөгөөд Бүрэн Эрхт Элчин сайд Жон Лантриг хүлээн авч уулзлаа.
