-
2016 оны 5 сарын 12
Улаанбурхан өвчний нэмэлт дархлаажуулалт эхэллээ
4 минутын өмнө
Print Zasag and PDF ShareThis Facebook Tweet LinkedIn Email
Улаанбурхан өвчний тархалтыг бууруулах чиглэлээр хэрэгжүүлж байгаа арга хэмжээний талаар Эрүүл мэнд, спортын сайдын үүргийг түр хариуцагч бөгөөд Шадар сайд Ц.Оюунбаатар сэтгүүлчдэд мэдээлэл хийлээ.
Улаанбурхан өвчний сэжигтэй тохиолдлын тоо өнгөрсөн долоо хоногийнхтой харьцуулахад 16 хувиар буурсан үзүүлэлттэй байгаа ч Улаанбаатар хот, Өвөрхангай аймагт өвчлөлийн тархалт өндөр хэвээр байна.
Өнгөрсөн долоо хоногт Халдварт өвчин судлалын үндэсний төвд 1700 гаруй өвчтөн хандсаны 1195 нь улаанбурхан өвчний эмнэлзүйн шинж тэмдэгтэйгээс 221 нь хэвтэн эмчлүүлсэн, 0-1 насны 14 хүүхэд сэхээн амьдруулах эрчимт эмчилгээний тасагт эмчлүүлж байна.
НҮБ-ын Хүүхдийн сангаас Улаанбурхан-Улаануудын эсрэг нэмэлт дархлаажуулалт хийх 627.500 хүн/тун вакциныг хүлээж авсан байна. Энэ вакциныг 18-30 насныханд өнөөдрөөс хийж эхэллээ. Нэмэлт вакцин болон эмчилгээний тоног төхөөрөмж авах асуудлыг Засгийн газрын энэ оны гуравдугаар сард шийдвэрлэсэн бөгөөд Засгийн газрын шийдвэрүүд ажил хэрэг болж байна.
900 газарт дархлаажуулалтын түр цэг, 300 гаруй нүүдлийн цэг байгуулан дархлаажуулах бэлтгэл хангажээ. Энд ажиллах 1200 эмч, 350 сувилагчийг бэлтгэн сургалтад хамруулсан байна.
Улаанбурхан өвчний тархалтыг бууруулахад чухал нөлөө үзүүлэх нэмэлт дархлаажуулалтын ажлыг олон нийтэд сурталчилж, ач холбогдлыг нь хүүхэд залуучуудад тайлбарлан таниулахад хамтран ажиллахыг хэвлэл мэдээллийн байгууллагуудад Шадар сайд уриаллаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
-
2016 оны 5 сарын 12
УИХ-ын Төрийн байгуулалтын байнгын хорооны хуралдаанаар Монгол Улсын сонгуулийн тойрог байгуулах, тойргийн мандатын тоо, дугаар нутаг дэвсгэр төвийг тогтоох тухай УИХ-ын тогтоолын төслийг хэлэлцэж байна. Байнгын хорооны хуралдааны дараа үргэлжлүүлэн чуулган хуралдаж мөн тус асуудлыг хэлэлцэх юм. Уг асуудлыг байнгын хороогоор хэлэлцэх шатанд МАН-ынхан ихээхэн бухимдаж “Тойрог, мандатын тоог хувиарлахдаа улс төрчдийн захиалгаар ажиллалаа” гэх шүүмжийг хэлж байна. Учир нь Сонгуулийн ерөнхий хорооноос өргөн мэдүүлсэн дээрх төслөөр орон нутагт 48 мандат, нийслэлд 28 мандат ногдохоор байгаа. Гэвч Говь-Алтай, Булган аймаг нь зөвхөн нэг мандаттай байгаа нь УИХ-ын сонгууль 76 жижиг тойргоор зохион байгуулагдана гэсэн хуультайгаа зөрчилдөж байна хэмээн зарим гишүүд шүүмжилж байна. Тухайлбал, Говь-Алтай 60900 хүн амтай 1 мандаттай байхад Өмнөговь 46800 хүн амтай мөртлөө 2 мандат хуваарилсан, Булган 60800 хүн амтай учраас нэг мандатынх нь тоог хэвээр үлдээсэн бол Хэнтий 71200 хүн амтай гэдгээр 3 мандаттай байгаа нь хэр шударга хуваарилалт болов гээд асуудал үүсгэж эхлээд байгаа юм. Нөгөөтэйгүүр, Баянзүрх, Сонгинохайрхан дүүрэгт зургаан мандат ногдож байгаа нь тойргийг нь хэтэрхий жижигрүүлсэн хуваарилалт боллоо гэж олон нийт шуугиж эхлээд байна.
Уг асуудлын байнгын хороогоор хэлэлцэх үеэр гишүүд ямар байр, суурь илэрхийлснийг хүргэе.
УИХ-ын гишүүн Ц.Нямдорж: Б.Гарамгайбаатарын захиалга л явж байна
-Сүүлийн нэг жилийн хугацаанд УИХ-ын гишүүд өөртөө зориулж хууль гаргадаг, түүнийгээ баахан өмөөрдөг боллоо. Өршөөлийн хуулиас эхлээд. Тойрог, мандатын тоог тогтоохдоо дарга нарын захиалгаар л ажилласан байна шүү дээ. Хэнтий аймаг 76 мянган хүн амтай байхад гурван тойрогтой болгоё гээд л оруулаад ирж байна. Энэ бол Б.Гарамгайбаатарын захиалга л явж байна. Чи худлаа гэж хэлэхгүй байлгүй. Та яаж ч тайлбарлаж чадахгүй шүү дээ. ТөрийU хувьчилж байна. Сонгуулийн тойргийг хувьчилж байгаа юм байна. Өөрт нь санал өгөхгүй гэж үзсэн хэсгийг үсэргэж байна. Тэр даалгаварыг нь СЕХ биелүүлж байна. Та нар битгий худал хэл. Шударга бус байдлаа больчих. Тойрог тогтоодог асуудлыг УИХ өөр дээрээ авах шаардлагагүй юм байна гэж би бодож байна. Цаашид СЕХ нь уг асуудлаа шийдээд явдаг хуулийн өөрчлөлт хийх хэрэг гарах юм байна. Ижил хүн амтай, сумтай хоёр аймгийн нэгд нь 2, нөгөөд нь гурван мандат өгөөд оруулаад ирдэг юм. Энэ чинь л эгдүү хүргээд байна. Энэ чинь ариун явдал мөн үү. Ийм утгагүй байж болохгүй. Өөртөө зориулж төрийг хувьчилж болохгүй. АН-ын бүлгийн хурлаар гарсан саналаар бол жижиг гурван дүүргийг үсэргэх гэж байна. Налайх дүүрэг Сүхбаатар дүүрэг рүү үсрээд Багахангай Чингэлтэй рүү үсрээд Багануур Хан-Уул дүүрэг рүү үсрэх гэж байна уу яах гэж байна. Одоо байтлаа дүүрэг үсэргэдэг болох нь. Та нар ингэж төрөөр тоглодогоо больчих. Адал, балмад балиар оролдлогоо больчих. Ил цагаандаа гарсан дээрэм тонуул явж байна. Сонгуулийн Ерөнхий хороо өөрийн толгойтой юм бол ямар юм аа хийж ийм балай юм оруулж ирж байгаа юм. 76 мянган хүн амтай аймаг хоёр суудалтай байх ёстой юм бол Сүхбаатар, Хэнтий хоёрт нь адилхан суудал хувиарлаач. Арай хэтэрч байгаа юм биш үү. Санал өгөх гэж байгаа гишүүд төр улсаа бодоод больчих.
УИХ-ын гишүүн Н.Алтанхуяг: Ардын намынхан мах комбинатын улаан ямааны үүргийг гүйцэтгэсэн
- Ямар их мэргэн цэцэн улсууд гарч ирээд орсон борооны араас цув нөмрөөд байна. Ардын намынхан хоороороо орж ирж суучихаад баахан хүн доромжилж байна. 13 жилийн туршид буюу гурван сонгууль дарааллаж мөрдсөн хуулийг зөрчсөн. Сонгуулийн хууль болохоос зургаан сарын өмнө сонгуулийн хуульд өөрчлөлт оруулж болохгүй гэсэн заалтыг захиалга өгсөөр байгаад цэцээрээ дамжуулаад хүчингүй болгосон. Өнөөдөр бантан зуураад сууж байна. Би үүнийг чинь анхнаасаа эсэргүүцсэн. Та нарт үг хэлэхэд тоодоггүй болохоор би фэйсбүүк дээрээ хүртэл бичсэн. Та нар хуулийн заалтыг гууль болголоо. Хуйвалдааны төрийнхэн зүүдэлж сэрсэн ашигтай хувилбараараа хуулийг өөрчлөөд сууг уу гэж бичсэн. Та нар бүр даварлаа шүү. Хэзээ Монголын төрд ийм замбараагүй байдал бий болж байсан юм. Сонгууль сар хүрэхгүйн дараа болж байдаг. Гэтэл та нар зүүдэлж сэрснээрээ тойргоо хувиарлаад сууж байдаг.
- Я.Содбаатар: Манай намынхан тэгсэн юм уу.
- Н.Алтанхуяг: Ардын намынхаан та нар битгий орилоод бай. Үнэн үг хэлсэн хүнд хэн билээ өшөөтэй байсан. Одоо та нар битгий нэмэгдээд бай. Аятайхан бай.
- Я.Содбаатар: Чи хэзээ үнэн үг хэлж байсан юм.
- Н.Алтанхуяг: Ардын намынхан мах комбинатын улаан ямааны үүргийг гүйцэтгэсэн. Үүнийг Монголын түүхэнд хариуцлагатайгаар бичиж үлдээх ёстой. Сүүлийн 13 жилд сонгууль болохоос зургаан сарын өмнө сонгуулийн хууль өөрчилсөн түүх байхгүй. Үүнийг та нар хийсэн. Өнөөдөр түүний чинь үр дүн бол тойрог яриад заваараад сууж байгаа чинь. Заваарснаа яагаад АН руу чихээд байгаа юм. Сонгуулийн хууль бол сонгогчдын эрх, ашгийг хамгаалсан хууль. Тэр байтугай Хүний суурь эрхийг хангасан хууль юм. Энэ талаар Хүний эрхийн бичигт дурдсан байгаа. Одоо битгий цэцэрх. Сонгуулийн ерөнхий хороо Сүхбаатар аймгийг 58 мянган хүн амтай байхад хоёр мандаттай болгосон. Увс аймаг 80 мянган хүн амтай байхад хоёр мандаттай байна. Хүн амын тоо 22 мянгаар зөрж байхад улаан цагаан луйврыг яагаад хийж байгаа юм. Хэний захиалгыг биелүүлж байгаа юм.
УИХ-ын гишүүн Ё.Отгонбаяр: Сонгуулийн тойрог, мандатын хувиарлалт хог байна
-Хүний захиалга барьж орж ирчихээд ширэн нүүрлээд сууж байгаа хүмүүсээс асуулт асууж зовоогоод яах вэ гэж бодлоо. Жоржийн “1984” гэсэн ном байдаг. Тэр номонд “Бүх амьтан тэгш эрхтэй. Гахайнууд илүү тэгш эрхтэй” гэж заасан байдаг. Ээ хөөрхий, ардчилсан Монгол Улс маань ийм болчих гэж дээ. Ямар аймаг нь илүү тэгш эрхтэй, ямар аймаг нь тэгш эрхтэйг нь хараад ичиж сууна. Ганц л жишээ хэлчихье. Булган аймаг 61138 хүнтэй. Өмнөговь аймаг 60872 хүнтэй. Булган аймаг хүн амын тоогоороо илүү байгаа биз. Булган аймаг 16 сумтай, Өмнөговь аймаг 15 сумтай. Сонгогчдын тоогоороо Булган 39115, Өмнөговь 34067 сонгогчтой. Гэтэл Булган аймаг 1 мандаттай, Өмнөговь аймаг 2 мандаттай байна. Аль нь араас нь, аль нь өврөөс нь төрсөн юм бэ. Үүнийг ямар зарчим гэх вэ. Энэ бол зарчим нь захиалгаар явсан байна. СЕХ нэг Өмнөговийн иргэн, хоёр Булганы иргэнтэй тэнцэнэ, нэг Хэнтийн иргэн 3 Булганы иргэнтэй тэнцэнэ гэж шийдвэрээ гаргаад биччих. Цаашлаад Үндсэн хуулийн заалт зөрчсөн гэдгээ хүлээн зөвшөөрчих. Тэгээд ҮХЦ-д очвол ямар байна. Энэ бол гишүүдийн бус төлөөлж байгаа сонгогчдын эрхийн асуудал. Яахаараа Хэнтийгээс сонгогдсон гишүүн 14 мянган хүн, Булганаас сонгогдсон хүн 40 мянган хүн төлөөлж байдаг юм. Ямар шударга ёс гэж энэ вэ. Тойргийн доторх хуваарилалтуудыг үзэхээр хачин хачин зүйл их байна. Булган аймаг нэг мандаттай гээд хүч түрээд ороод иржээ. Гэтэл бусад аймгуудын тухайд аймгийн төв нь нэг тойрог болсон зүйл харагдаад байна. Энэ чинь одоо сумын депутат сонгох гээд байгаа юм уу, УИХ-ын гишүүн сонгох гээд байна уу. Ингэж Монголын төрийн үндсэн зарчим эвджээ. СЕХ-хон хүний захиалгаар сонгуулийнхаа хуулийг эвдээд байж болохгүй. Энэ байдал иргэд сонгогчид сонгуулиа өгөх үү, байх уу гэдэг эргэлзээг бий болгоно шүү.
УИХ-ын гишүүн Б.Гарамгайбаатар: Би ядуу оюутан
-СЕХ захиалга аваад хийдэг гэдгийг би анх удаа сонсож байна. МАН-ын туршлагатай гишүүд үүнийг ярьж байхыг бодоход өөрсдөө захиалаад хийлгэдэг байжээ гэж ойлгож байна. Би анх удаа нэр дэвшиж орж ирсэн ядуу оюутан. Та бүхэн өөрсдөө бүс нутгийг хөгжүүлэх тухай мундаг ярьдаг. Монгол Улс бол нэг нутаг. Та бүхний ярьж хэлж, өөрсдийнхөө цээжийг балбадаг Чингис хааны нутаг. Монгол Улс нэг тойрог. Бүс нутгийн хөгжил яривал зүүн бүсийн хөгжил үеийн үед дорой явж ирсэн. Нүүдэл суудал нь үргэлжилж байгаа. 90 жил МАН засаг барихдаа зүүн бүсийг хөгжүүлэх бодлогыг бариагүй. Хэнтий аймгийн үе үеийн Засаг дарга нар бүгд баруун аймгаас очиж байсан. Дорноговь, Дорнод, Сүхбаатар, Хэнтий гэсэн зүүн бүсийн аймгууд бүгдээрээ Сэцэн хааны нутгаас салж гарсан аймгууд байдаг. Өнөөдөр УИХ-д сууж байгаа гишүүдийн тоогоор баруун аймгийнхан дийлэнх нь. Яривал олон юм ярина шүү. Гэхдээ өнөөдөр олон зүйл ярихгүй.
Байнгын хорооны хуралдаанаар уг асуудлыг үргэлжлүүлэн хэлэлцэж байна. Удахгүй байнгын хорооны шийдвэр гарна. Энэ талаар үргэлжлүүлэн мэдээлэх болно.
Т.Хулан
-
2016 оны 5 сарын 12
Манай улсад ирэх 7 дугаар сард болох Ази, Европын Дээд түвшний 11 дүгээр уулзалтын дагалдах хурлуудын нэг АСЕМ-ын Ахлах албан тушаалтнуудын уулзалт 2016 оны 5 дугаар сарын 12-13-нд Улаанбаатар хотноо болж байна.
Уг уулзалтад АСЕМ-ын түнш 51 улс, Европын холбоо, Зүүн Өмнөд Азийн бүс нутгийн хамтын ажиллагааны нийгэмлэг (АСЕАН)-ийн НБДГ-аас гадна Ази-Европын сангийн төлөөллөөс бүрдсэн нийт 170 төлөөлөгч оролцож байна. Уулзалтыг нээж ГХЯ-ны Төрийн нарийн бичгийн дарга, АСЕМ-ын Бэлтгэл ажлын албаны дарга Д.Ганхуяг үг хэллээ.
Ахлах албан тушаалтнуудын уулзалтын үеэр Ази, Европын орнуудын төр, засаг төдийгүй ард иргэд хоорондын уялдаа холбоог бэхжүүлэх, АСЕМ-ын 20 жилийн ой, АСЕМ-ын түнш орнууд хамтран ажиллахаар тодорхойлсон 16 салбар чиглэлийн хэрэгжилтийн явц болон ирэх 10 жилийн хамтын ажиллагаа зэрэг асуудлыг хэлэлцэнэ. Мөн АСЕМ-ын Дээд түвшний 11 дүгээр уулзалтын бэлтгэл ажлыг нарийвчлан ярилцахын зэрэгцээ Дээд түвшний уулзалтаас батлах Улаанбаатарын тунхаглал, Даргын мэдэгдэл зэрэг баримт бичгийн төслөөр хэлэлцүүлэг өрнүүлж байна.
-
2016 оны 5 сарын 12
Санхүүгийн зохицуулах хорооны дарга З.Нарантуяа УИХ-ын 2016 оны сонгуульд нэр дэвшихээр ажлаасаа чөлөөлөгдсөн. Тиймээс энэхүү суудал одоогоор эзэнгүй байгаа билээ.
-
2016 оны 5 сарын 12
Сонгуулийн Ерөнхий хорооноос ИЗНН-ыг сонгуульд оролцуулахгүй гэх шийдвэрийг гаргасан. Тэгвэл уг асуудлаар тус намын дарга Ц.Ганхуяг тэргүүтэй намын гишүүд, дэмжигчид нь Захиргаан хэргийн шүүхэд гомдол гаргасан юм.
-
2016 оны 5 сарын 12
Сонгуулийн ерөнхий хорооноос 11 нам, гурван эвслийг сонгуульд оролцуулахаар болсон. Тэгвэл АН, МАН-аас УИХ-ын сонгуульд нэр дэвшигчдийн хар зураг гарч эхэллээ.. Гэхдээ уг нэрсийг МАН-ын Бага хурал, АН-ын Үндэсний зөвлөлдөх хорооны хурлаас эцсийн байдлаар батламжлах билээ.
-
2016 оны 5 сарын 12
УИХ-ын Төрийн байгуулалтын байнгын хорооны хуралдаан дөнгөж сая эхэллээ.
-
2016 оны 5 сарын 12
УИХ дахь МАН-ын бүлэг ээлжит бусаар хуралдаж байна. Уг хуралдаанаар Монгол Улсын сонгуулийн тойрог байгуулах, тойргийн мандатын тоо, дугаар нутаг дэвсгэр төвийг тогтоох тухай УИХ-ын тогтоолын төслийг хэлэлцэж байгаа аж. Сонгуулийн ерөнхий хорооноос өргөн мэдүүлсэн дээрх төслөөр орон нутагт 48 мандат, нийслэлд 28 мандат ногдохоор байгаа. Гэвч Говь-Алтай, Булган аймаг нь зөвхөн нэг мандаттай байгаа нь УИХ-ын сонгууль 76 жижиг тойргоор зохион байгуулагдана гэсэн хуультайгаа нийцэж байгаа эсэхэд эргэлзээ төрүүлж буй.
Тухайлбал, Говь-Алтай 60900 хүн амтай 1 мандаттай байхад Өмнөговь 46800 хүн амтай мөртлөө 2 мандат хуваарилсан, Булган 60800 хүн амтай учраас нэг мандатынх нь тоог хэвээр үлдээсэн бол Хэнтий 71200 хүн амтай гэдгээр 3 мандаттай байгаа нь хэр шударга хуваарилалт болов гээд асуудал үүсгэж эхлээд байгаа юм.
Нөгөөтэйгүүр, Баянзүрх, Сонгинохайрхан дүүрэгт зургаан мандат ногдож байгаа нь тойргийг нь хэтэрхий жижигрүүлсэн хуваарилалт боллоо гэж олон нийт шуугиж эхлээд байна.
-
2016 оны 5 сарын 12
Орхон аймгийн Засаг дарга хөрөнгөөрөө тэргүүлжээ
-
2016 оны 5 сарын 12
Үндэсний төлөвлөгөөнд иргэдийн саналыг авна
7 минутын өмнө
Print Zasag and PDF
ShareThis Facebook Tweet LinkedIn Email
Монгол Улсын Нээлттэй засгийн түншлэлийн 2016-2018 оны “Үйл ажиллагааны үндэсний төлөвлөгөө”-ний төслийг хэлэлцүүлэх, санал авах зорилгоор олон нийтийн нээлттэй хэлэлцүүлгийг 2016 оны 5 дугаар сарын 19-ний өдөр зохион байгуулахаар төлөвлөж байна.
Нээлттэй хэлэлцүүлэгт Олон улсын Нээлттэй засгийн түншлэлийн зарчим, шаардлагын дагуу төр, хувийн хэвшил, иргэд, иргэний нийгмийн, олон улсын байгууллагууд болон хэвлэл мэдээллийн тэгш оролцоог хангаж, тэдгээрийн төлөөллүүдийг оролцуулах юм.
2016-2018 оны “Үйл ажиллагааны үндэсний төлөвлөгөө”-нд тусгах зорилтын саналтай танилцаж, хэлэлцүүлэгт идэвхтэй оролцоно уу. Хэлэлцүүлэг хүртэлх хугацаанд саналаа дараах хаягаар цахим хэлбэрээр ирүүлэх боломжтой.
ogp.mongolia@gmail.com
Түүнчлэн,
“OGP Mongolia” Facebook public group-д нэгдэж,
“@OGP_Mongolia” твиттер аккаунтыг дагаж,
дараах линкүүдээс Нээлттэй засгийн түншлэлийн талаарх мэдээллийг тогтмол авах боломжтой:
www.zasag.mn/tunshlel
www.opengovpartnership.org
www.opghub.org/profile
ЖИЧ: Хэлэлцүүлгийн дэлгэрэнгүй товыг жич зарлана.
МОНГОЛ УЛСЫН НЭЭЛТТЭЙ ЗАСГИЙН ТҮНШЛЭЛ
-
2016 оны 5 сарын 12
Засгийн газрын хэрэг эрхлэх газрын дарга С.Баярцогт, нийслэлийн Засаг дарга Э.Бат-Үүл нар өнөөдөр “Сайдын цаг”-т 12.00 цагаас оролцоно. С.Баярцогт, Э.Бат-Үүл нар цаг үеийн асуудлаар мэдээлэл өгч, сэтгүүлчдийн асуултад хариулах юм.
-
2016 оны 5 сарын 12
Хуралдаанаар Хотын 2015 оны төсвийн гүйцэтгэл батлах тухай, Нийслэлийн 2016 оны төсөвт нэмэлт, өөрчлөлт оруулах тухай хэлэлцэж байна. Хуралдаанаар гарсан шийдвэрийг эргэн мэдээлнэ.
-
2016 оны 5 сарын 12
Ерөнхийлөгч Ц.Элбэгдорж, УИХ-ын дарга З.Энхболд хоёрын тэмцэл АТГ-ын даргыг томилох асуудлаас болж улам хурцдав. Тэд өөр, өөрсдийн хүнийг тус албан тушаалд томилохын тулд улайрч байна. УИХ өнгөрсөн сарын 14-ны өдрийн хуралдаанаараа АТГ-ын дарга Н.Ганболдыг үүрэгт ажлаас нь бүрэн чөлөөлсөн. Үүнээс хойш бараг нэг сар өнгөрсөн бөгөөд энэ хугацаанд тус байгууллага удирдлагагүй өнөөдрийг хүргэлээ. Хуулийн дагуу АТГ-ын даргын албан тушаалд Ерөнхийлөгч “өөрийн” хүнийг томилох ёстой. Түүний энэ эрх мэдлийг УИХ-ын дарга З.Энхболд булаацалдаж эхэлсэн нь тэдний эртнээс эхлүүлсэн тэмцэл дээр тос нэмж орхив. Ерөнхийлөгч Ц.Элбэгдорж АТГ-ын даргад цагдаагийн хурандаа Х.Энхжаргалын нэрийг дэвшүүлж УИХ-аар хэлэлцүүлэх шатанд З.Энхболд шууд хаалт тавьж эхэллээ.
-
2016 оны 5 сарын 12
Хагас жил орчим эзэнгүй байсан ЭМС-ын сайдын сэнтий рүү АН-ынхан хэдийнэ санаархаж эхэлжээ. Энэхүү хүсэл нь ч биелэх бололтой. Уг нь энэхүү суудалд МАХН-МҮАН-ын “Шударга ёс” эвсэлээс хүнээ томилох учиртай. Тиймээс ч өнгөрсөн долоо хоногт МАХН-аас албан ёсоор ЭМС-ын сайдад Монголын анагаах ухааны академийн Ерөнхийлөгч Ц.Лхагвасүрэнгийн нэрийг дэвшүүлж, Монгол Улсын сайд, ЗГХЭГ-ын дарга С.Баярцогт Эрүүл мэнд, спортын сайдыг томилуулах тухай тогтоолын төслийг УИХ-ын дарга З.Энхболдод өргөн барьсан.
-
2016 оны 5 сарын 11
Хуульзүйн байнгын хорооны хуралдаанаар АТГ-ын даргыг томилох асуудлыг хэлэлцэхээр төлөвлөсөн байсан.
-
2016 оны 5 сарын 11
Улсын Их Хурлын Аюулгүй байдал, гадаад бодлогын байнгын хорооны өнөөдрийн /2016.05.11/ хуралдаан 15 цаг 02 минутад 52.6 хувийн ирцтэй эхэлж, гурван асуудал хэлэлцэхээр болов.
Засгийн газар хоорондын хэлэлцээрийг соёрхон батлахыг дэмжив
Тус байнгын хорооны хуралдаанаар эхлээд Засгийн газраас өнгөрсөн 04 дүгээр сарын 28-ны өдөр өргөн мэдүүлсэн “Хөгжлийн хамтын ажиллагааны тухай Монгол Улсын Засгийн газар, Бүгд Найрамдах Турк Улсын Засгийн газар хоорондын хэлэлцээр”-ийг соёрхон батлах тухай асуудлыг хэлэлцэв. Энэ талаарх хууль санаачлагчийн илтгэлийг Засгийн газрын гишүүн, Батлан хамгаалахын сайд Ц.Цолмон танилцуулсан юм.
Монгол Улсын Засгийн газар, Бүгд Найрамдах Турк Улс /БНТУ/-ын Засгийн газар хооронд “Туркийн олон улсын хамтын ажиллагаа, хөгжлийн байгууллагын Хөтөлбөр зохицуулалтын төлөөлөгчийн газар байгуулах тухай” хэлэлцээрийг хоёр орны нийгэм, эдийн засгийн хөгжилд туслалцаа үзүүлэх зорилгоор 2004 оны 4 дүгээр сарын 29-ны өдөр байгуулж, Улсын Их Хурал соёрхон баталжээ.
БНТУ-ын Засгийн газрын дэргэдэх Туркийн хамтын ажиллагаа, зохицуулах агентлаг /ТИКА/ нь дэлхийн 50 гаруй оронд Хөтөлбөр зохицуулалтын газраараа дамжуулан хөгжлийн албан ёсны тусламж үзүүлдэг бөгөөд Улаанбаатар хот дахь Хөтөлбөр зохицуулалтын газар нь байгуулагдсанаас хойш өнөөг хүртэл манай улсын дэд бүтэц, хөдөө аж ахуй, аялал жуулчлал, эрүүл мэнд, байгаль орчныг хамгаалах, боловсрол шинжлэх ухаан, соёлын хамтын ажиллагаа зэрэг салбарт нийт 400 гаруй төсөл, хөтөлбөрийг 30 гаруй сая ам.долларын буцалтгүй тусламжийн хөрөнгөөр санхүүжүүлжээ. Тухалйбал, Хархорин-Хөшөө цайдмын 46 км авто зам барих (6.7 сая), Түрэгийн хөшөө дурсгалыг сэргээн хамгаалах (5 сая), Орхоны хөндийд Дэлхийн соёлын өвийн музей байгуулах (1 сая ам.доллар), Улсын клиникийн төв эмнэлгийн дэргэд цусны төв байгуулах (251 мянга), МУИС-д турк судлалын тэнхим байгуулах (427 мянга), Өвөрхангай аймгийн Хархорин сумын төвөөс Эрдэнэзуу хийд хүртэл 2.4 км хатуу хучилттай зам тавих төсөл хэрэгжүүлжээ. Мөн 2007 онд манай улсын ерөнхий боловсролын дунд сургуулиудад 150 мянган ам.долларын сургалтын тоног төхөөрөмж бэлэглэсэн бол 2008 онд Туркийн Засгийн газар 100 мянган ам.долларын хүнсний тусламж үзүүлсэн байна. Түүнчлэн 2014 онд ”Mэргэн Тоньюкукын автозам” төсөл, Улаанбаатар-Өндөрхаан чиглэлийн автозамын Ар Жанчивлан рашаан сувилал руу салдаг цэгээс Мэргэн Тоньюкукын хөшөө хүртэлх 10 км автозам барих төслүүдийг санхүүжүүлжээ.
Хоёр орны Засгийн газар хооронд 2004 онд байгуулсан хэлэлцээрийн хүчинтэй хугацаа дуусч байгаатай холбогдуулан шинэчлэн байгуулсан “Хөгжлийн хамтын ажиллагааны тухай хэлэлцээр” нь Турк Улсын Засгийн газрын буцалтгүй тусламжаар Монгол Улсад хэрэгжүүлэх төсөл, хөтөлбөрийг санхүүжүүлэх, хоёр орны хамтын ажиллагааны гүүр болсон ТИКА-ийн Улаанбаатар дахь Хөтөлбөр зохицуулалтын газрын эрх зүйн орчинг бүрдүүлэх үндсэн баримт бичиг болох юм байна. Хөгжлийн хамтын ажиллагааны тухай хэлэлцээрээр хамтын ажиллагааны хүрээ, тэргүүлэх салбар чиглэлийг нэмэгдүүлсний зэрэгцээ өмнөх хэлэлцээрт ерөнхий байдлаар тусгагдаж нэмэлт зохицуулалтын асуудал үүсдэг байсан зарим заалтыг тодорхой болгож шинэчилсэн гэдгийг хууль санаачлагч дурдлаа.
Хууль санаалагчийн илтгэлтэй холбогдуулан байнгын хорооны гишүүдээс асуулт, санал гараагүй бөгөөд хэлэлцээрийн төслийг соёрхон батлахыг дэмжих санал хураалт явуулахад хуралдаанд оролцсон гишүүд санал нэгтэйгээ дэмжив.
Хуулийн төслийн анхны хэлэлцүүлгийг хийлээ
Дараа нь Засгийн газраас энэ оны 01 дүгээр сарын 22-ны өдөр Геодези, зураг зүйн тухай хуульд нэмэлт оруулах тухай хуулийн төслийн хамт өргөн мэдүүлсэн Төрийн нууцын жагсаалт батлах тухай хуульд өөрчлөлт оруулах тухай хуулийн төслийн анхны хэлэлцүүлгийг хийсэн юм. Хуулийн төслийн анхны хэлэлцүүлэгтэй холбогдуулан Улсын Их Хурлын гишүүн Н.Энхболд, М.Сономпил нар ажлын хэсгээс асуулт асууж хариулт авав.
Улсын Их Хурлаас 1997 онд баталсан Геодези, зураг зүйн тухай хуульд байр зүйн зургийн ангиллыг нарийвчлан тусгаагүй бөгөөд Төрийн нууцын жагсаалт батлах тухай хуулийн 32 дугаар зүйлд 1:100000-аас илүү нарийвчлалтай масштабын газрын зургийг төрийн нууцад хамааруулахаар заажээ. Хуулийн энэ зохицуулалтаас болоод бүх төрлийн геодезийн хэмжилтийн үр дүнд бий болсон байр зүйн зургийг дэд бүтцийн салбарт ашиглах, нийтийн хэрэгцээнд хэрэглэх боломжгүй байдаг байна. Түүнчлэн газрын зурагт суурилсан орон зайн өгөгдөл мэдээллээр төрийн байгууллагуудын хооронд болон иргэдэд нээлттэй үйлчлэх дэд бүтцийг бий болгох, энэ чиглэлийн бизнесийн орчныг сайжруулах, дэд бүтцийн салбарт бүх төрлийн төлөвлөлт, мониторинг хийхэд нийтийн хэрэгцээний байр зүйн зургийг ашиглах шаардлага, хэрэгцээ тулгарч байгаа аж. Иймээс Геодези, зураг зүйн тухай болон Төрийн нууцын жагсаалт батлах тухай хуульд нэмэлт, өөрчлөлт оруулах замаар батлан хамгаалах зориулалтын болон төрийн нууцад хамааруулснаас бусад байр зүйн зургуудыг нийтийн хэрэгцээнд ашиглуулахаар уг хуулийн төсөлд тусгасан байна.
Хуулийн төслийн анхны хэлэлцүүлэгтэй холбогдуулан байнгын хорооны гишүүдээс зарчмын зөрүүтэй санал гараагүй бөгөөд байнгын хорооны хуралдаанд оролцсон гишүүд хуулийн төслийн анхны хэлэлцүүлгийг санал нэгтэй дэмжив. Иймээс хуулийн төслийн анхны хэлэлцүүлгийг хийсэн талаарх байнгын хорооны санал, дүгнэлтийг Байгаль орчин, хүнс, хөдөө аж ахуйн байнгын хороонд хүргүүлэхээр тогтлоо.
Гадаад харилцааны тухай хуулийн төслийг хэлэлцэхийг дэмжив
Байнгын хорооны хуралдаанаар Улсын Их Хурлын гишүүн М.Батчимэг нарын 6 гишүүнээс энэ сарын 08-ны өдөр өргөн мэдүүлсэн Гадаад харилцааны тухай хуулийн төслийн хэлэлцэх эсэх асуудлыг хэлэлцэв. Энэ талаарх хууль санаачлагчийн илтгэлийг Улсын Их Хурлын гишүүн М.Батчимэг танилцуулсан юм.
Даяаршлын энэ эрин үед улс орнуудын харилцан хамаарал улам бүр өсч, олон улсын харилцаанд зарчмын шинжтэй томоохон өөрчлөлтүүд гарах боллоо. Үүний сацуу Монгол Улсын гадаад харилцаа, хамтын ажиллагаа жил ирэх бүр өргөжин тэлж байна. Монгол Улсын Үндэсний аюулгүй байдлын үзэл баримтлал, Гадаад бодлогын үзэл баримтлалд Монгол Улсын гадаад бодлогын нэгдмэл, тогтвортой байдлыг хангаж, залгамж чанарыг хадгалах асуудлыг чухалчлан үзэж, холбогдох заалтуудыг оруулсан. Үе үеийн Засгийн газар болон Үндэсний аюулгүй байдлын зөвлөлөөс мөн энэ асуудалд анхаарч, гадаад бодлогыг “нэг цонхоор” явуулах зохицуулалт хийхэд чиглэсэн хүчин чармайлт, холбогдох шийдвэрүүдийг удаа дараа гаргаж ирсэн.
Гэсэн хэдий ч өнөөдөр хүчин төгөлдөр үйлчилж буй эдгээр журам, тогтоолын хэрэгжилт хангалтгүй байгаа бөгөөд төрийн байгууллага, албан тушаалтнууд нэгдсэн төлөвлөгөөнд тусгагдаагүй гадаад айлчлал, арга хэмжээг дур мэдэн хэрэгжүүлэх, Гадаад хэргийн яамны санал зөвлөмжид үл нийцэх яриа хэлэлцээ хийх, гэрээ байгуулах зэрэг явдал гарсаар байна. Энэ нь Монгол Улсын гадаад бодлого нэгдмэл байж, “нэг цонх”-оор хэрэгжих суурь зарчмыг алдагдуулж, нийгэм, эдийн засгийн сөрөг үр дагаварт хүргээд зогсохгүй Монгол Улсын олон улсын нэр хүндийг унагах эрсдэлд хүргэж байна. Иймээс Улсын Их Хурлаас өгсөн үүргийн дагуу, гадаад харилцааны хэрэгжилтийг нэгдмэл байдлаар хангаж, тогтвортой, залгамж чанарыг хадгалах, гадаад харилцаанд оролцогч байгууллагуудын уялдаа холбоо, хариуцлагыг өндөржүүлж, батлагдсан төсвийг үр ашигтай зарцуулах, Монгол Улсын цаашдын хөгжил дэх гадаад харилцааны салбарын үр өгөөжийг дээшлүүлэх зорилгоор уг хуулийн төслийг санаачлан боловсруулсныг төсөл санаачлагч илтгэлдээ дурдав.
Хуулийн төсөл нь 6 бүлэг, 15 зүйлтэй юм. Уг хуулийн төсөлд Монгол Улсын гадаад харилцааны үндсэн зарчмуудыг тодорхойлж, бодлогын нэгдмэл байдлыг хангах, бодлогын хэрэгжилтийг уялдаатайгаар төлөвлөх, хэрэгжүүлэх, хяналт тавих болон тайлагнах үйл ажиллагааг нарийвчлан зохицуулсан. Гадаад бодлогын хэрэгжилтийг уялдуулан зохицуулах, төрийн гадаад арга хэмжээг төлөвлөх, хэрэгжилтэд хяналт тавихтай холбоотой зохицуулалтуудыг тусгасан. Ингэхдээ өндөр дээд түвшний айлчлал, олон улсын арга хэмжээнд оролцох, зохион байгуулах, олон талт гэрээнд нэгдэн орох, улс хоорондын хамтын ажиллагаатай холбоотой уулзалт, хэлэлцээрийг нэгдсэн журмаар төрийн гадаад арга хэмжээний нэгдсэн төлөвлөгөөнд тусган боловсруулж Засгийн газраар батлуулах, холбогдох байгууллагууд жил бүр гадаад арга хэмжээнийхээ төлөвлөгөөг боловсруулан, гадаад хэргийн асуудал эрхэлсэн төрийн захиргааны төв байгууллагаар хянуулан батлуулж, мөрдөж, тайлагнаж байх зохицуулалтуудыг тусгалаа. Мөн гадаад бодлогын цаг үеийн чухал асуудлаар гадаад харилцааны асуудал эрхэлсэн Засгийн газрын гишүүнээр ахлуулсан зохицуулах зөвлөл байгуулах, гадаад арга хэмжээний тусгай зохицуулалтууд, Монгол Улсын байр суурийг олон улсад илэрхийлэх асуудлыг нарийвчлан зохицуулж, төрийн захиргааны төв байгууллагын дэргэд гадаад бодлогын мэдээллийн нэгдсэн санг байгуулахаар төсөлд тусгасан. Түүнчлэн гадаад харилцааны нэгдмэл байдлыг хангах хариуцлагын тогтолцоог тодорхой болгож, хууль зөрчигчдөд хүлээлгэх хариуцлагыг нарийвчлан зааж өгснийг төсөл санаачлагч танилцууллаа.
Хууль санаачлагчийн илтгэлтэй холбогдуулан Улсын Их Хурлын гишүүн Ц.Цолмон асуулт асууж тодруулсны дараа хуулийн төслийг хэлэлцэхийг дэмжье гэсэн саналын томьёоллоор санал хураалгахад байнгын хорооны хуралдаанд оролцсон гишүүд санал нэгтэй дэмжсэнээр тус байнгын хорооны энэ өдрийн хуралдаан өндөрлөлөө гэж Улсын Их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
-
2016 оны 5 сарын 11
Лхагва гариг бүрт болдог “Шийдлийн цаг” уулзалтад өнөөдөр Мэдээллийн технологи, шуудан, харилцаа холбооны газрын дарга Ц.Жадамбаа, Харилцаа холбооны зохицуулах хорооны дарга Б.Балгансүрэн нар оролцлоо.
-
2016 оны 5 сарын 11
Улсын Их Хурлын Нийгмийн бодлого, боловсрол, соёл, шинжлэх ухааны байнгын хорооны хуралдаан өнөөдөр /2016.05.11.Лхагва гараг/ 10 цаг 36 минутад гишүүдийн 52.6 хувийн ирцтэй эхэлж хоёр асуудал хэлэлцэн шийдвэрлэлээ.
Засгийн газрын гишүүнийг томилох асуудлыг дэмжих боломжгүй гэж үзлээ
Байнгын хорооны хуралдаанаар эхлээд Засгийн газрын гишүүнийг томилох, чөлөөлөх тухай асуудлыг хэлэлцэв. Хэлэлцэж буй асуудалтай холбогдуулан Улсын Их Хурлын гишүүн, Монгол Улсын Шадар сайд, Эрүүл мэнд, спортын сайдын үүрэг гүйцэтгэгч Ц.Оюунбаатар Монгол Улсын Үндсэн хуулийн Хорин тавдугаар зүйлийн 1 дэх хэсгийн 6 дахь заалт, Монгол Улсын Засгийн газрын тухай хуулийн 21 дүгээр зүйлийн 2 дахь хэсгийг тус тус үндэслэн Ганхуягийн Шийлэгдамбыг Монгол Улсын Засгийн газрын гишүүн, Эрүүл мэнд, спортын сайдын үүрэгт ажлаас чөлөөлөх, Монгол Улсын Үндсэн хуулийн Хорин тавдугаар зүйлийн 1 дэх хэсгийн 6 дахь заалт, Гучин есдүгээр зүйлийн 3 дахь хэсэг, Монгол Улсын Засгийн газрын тухай хуулийн 21 дүгээр зүйлийн 2 дахь хэсэг, 23 дугаар зүйлийн 1 дэх хэсгийн 1 дэх заалт, Монгол Улсын Их Хурлын чуулганы хуралдааны дэгийн тухай хуулийн 37.7 дахь хэсгийг тус тус үндэслэн Монгол Улсын Засгийн газрын гишүүн, Эрүүл мэнд, спортын сайдаар Цэрэнхүүгийн Лхагвасүрэнг томилуулах саналыг тус тус танилцууллаа.
Цэрэнхүүгийн Лхагвасүрэнг Монгол Улсын Засгийн газрын гишүүнээр томилуулах саналын үндэслэл нь Засгийн газраас дэвшүүлж байгаа зорилтуудыг биелүүлэхээр ажиллах чадвар, танхимын зарчмаар ажиллах чадвар, тухайн ажил, үүргийг гүйцэтгүүлэхэд хуримтлуулсан туршлага, удирдан зохион байгуулах чадвар, ажил хэрэгч чанар зэргийг харгалзан үзжээ.
Танилцуулгатай холбогдуулан Улсын Их Хурлын гишүүн С.Одонтуяа асуулт асууж хариулт авсан. Тэрээр, Эрүүл мэндийн салбар шинэчлэлээрээ нэлээдгүй хоцрогдсон салбар болоод байна. Өнгөрсөн жил эрүүл мэндийн салбарын шинэчлэлийн тухай олон хуулийн төсөл орж ирсэнээр энэ салбарын шинэчлэлийн асуудал хурдацтай явж байна. Эрүүл мэндийн салбар өнөөдөр төрийн бодлого, дэмжлэг туслалцаан дээр тулгуурласан гэхээсээ илүү хүний хүчин зүйл дээр тулгуурлаж хөгжиж ирсэн. Энэ салбарын хувьд онцгой анхаарах шаардлагатай. Шинээр томилогдох нэр дэвшигчийг салбартаа олон жил ажилласан туршлагатай хүнийх нь хувьд дэмжиж байгаа гэсэн юм. Мөн Ц.Лхагвасүрэн нь эвслийн бүлгээс орж ирсэн нэр дэвшигч. Гэтэл “Шударга ёс” эвслийн бүлэг бүрэлдэхүүнгүй болсон байхад нэр дэвшигчийг ямар субьектээс оруулж ирж байгаа болон эцсийн хариуцлагыг хэн хүлээх асуудлыг хөндсөн юм.
Улсын Их Хурлын гишүүн, Монгол Улсын Шадар сайд, Эрүүл мэнд, спортын сайдын үүрэг гүйцэтгэгч Ц.Оюунбаатар өгсөн тайлбартаа, эрүүл мэндийн салбарыг тойрсон шүүмжлэл бий. Энэ шүүмжлэлийг хүлээж авч бодлогын шинэчлэл, ялангуяа сахилга хариуцлага, зохион байгуулалтыг сайжруулахын зэрэгцээ улаанбурхан өвчний дэгдэлтийг бууруулах, эмчлэх бүхий л арга хэмжээг Эрүүл мэнд, спортын яам гүйцэтгэж ирсэн. Эрүүл мэнд, спортын сайдад нэр дэвшигчийг тухайн үед Улсын Их Хурал дахь МАХН-МҮАН-ын “Шударга ёс “ эвслийн бүлгээс дэвшүүлсэн. Өнөөдөр эвслийн бүлэг бүрэн бүрэлдэхүүнгүй болсон. Гэхдээ Улсын Их Хуралд Ардчилсан нам, МАХН бусад дэмжиж байгаа гишүүдтэй хамтарч олонхийг бүрдүүлж байгаа. Иймээс Засгийн газар хэвийн үйл ажиллагаа явуулж байгаа тул Монгол Улсын Засгийн газраас Ц.Лхагвасүрэнг Эрүүл мэнд, спортын сайдад нэр дэвшүүлсэн санал хэвээр хүчин төгөлдөр байгаа гэв.
Мөн байнгын хорооны дарга Д.Батцогт, Эрүүл мэнд, спортын сайдад нэр дэвшигчийг хувь хүний хувьд дэмжиж байна. Ерөнхий сайд Засгийн газрын гишүүнийг томилуулах саналыг өргөн барих үед эвслийн бүлэг үйл ажиллагаагаа явуулж байсан. Эрүүл мэнд, спортын сайдад нэр дэвшигчийг өргөн мэдүүлсний дараа “Шударга ёс” эвслийн бүлгээс дөрвөн гишүүн гарч, бүлэг тарсан байгаа. Ерөнхий сайдаас уг асуудлыг нэгэнт өргөн бариад хэлэлцэх асуудалд оруулсан тул бид шийдээд явах ёстой гэдгийг хэлсэн юм.
Ингээд гишүүд асуулт асууж, хариулт авсны дараа Ганхуягийн Шийлэгдамбыг Монгол Улсын Засгийн газрын гишүүн, Эрүүл мэнд, спортын сайдын үүрэгт ажлаас чөлөөлөх санал хураалт явуулахад 81.8 хувийн саналаар дэмжлээ. Үүний дараа Монгол Улсын Засгийн газрын гишүүн, Эрүүл мэнд, спортын сайдаар Цэрэнхүүгийн Лхагвасүрэнг томилуулах саналыг дэмжих нь зүйтэй гэсэн томьёоллоор санал хураалт явуулсныг хуралдаанд оролцсон гишүүдийн 72.1 хувь нь дэмжих боломжгүй гэж үзэв.
Киноны тухай болон холбогдох бусад хуулийн төслүүдийг хэлэлцэхийг дэмжив
Мөн хуралдаанаар Засгийн газраас 2016 оны 04 дүгээр сарын 28-ны өдөр өргөн мэдүүлсэн Киноны тухай болон холбогдох бусад хуулийн төслүүдийн хэлэлцэх эсэх асуудлыг хэлэлцлээ. Төсөл санаачлагчийн илтгэлийг Улсын Их Хурлын гишүүн, Боловсрол, соёл, шинжлэх ухааны сайд Л.Гантөмөр танилцуулав.
Монгол киног дэлхийн зах зээлд гарган өрсөлдүүлэх, кино үйлдвэрлэлийг дэмжиж хөгжүүлэх нөхцөл боломжийг бүрдүүлэх, мөн киноны салбарыг зах зээл, эдийн засгийн хөгжилтэй уялдуулан хөгжүүлэх эрх зүйн орчинг бий болгох зорилгоор Киноны тухай хуулийн төслийг боловсруулсан байна. Киноны тухай хуулийн төслийг боловсруулах явцад киноны салбарын уран бүтээлчид болон орон нутгийн соёлын мэргэжилтнүүдийг хамруулсан хэлэлцүүлэг 4 удаа зохион байгуулж, хуулийн төслийг Боловсрол, соёл, шинжлэх ухааны яамны сайт дээр байршуулан олон нийтээр хэлэлцүүлэн санал авч хуулийн төсөлд нэгтгэн тусгажээ. Мөн хуулийн төсөлд кино урлагийн салбарт хөрөнгө санхүүгийн дэмжлэг үзүүлсэн дотоод, гадаадын байгууллага, хувь хүн, хөрөнгө оруулагчдад эдийн засаг, татварын таатай орчин, урамшууллын оновчтой механизмыг нэвтрүүлэх, тухайлбал, Монгол Улсад кино үйлдвэрлэж байгаа гадаадын иргэн, аж ахуйн нэгж, байгууллагад оруулсан хөрөнгийнх нь 40 хүртэлх хувийг урамшуулал хэлбэрээр буцаан олгох, кино бүтээх зориулалтын тусгай тоног төхөөрөмж, техник хэрэгслийг гааль болон нэмэгдсэн өртгийн албан татварөөс чөлөөлөх, киноны салбарыг дэмжиж өгсөн хувь хүн, аж ахуйн нэгжийн хандив, хөрөнгийг орлогын албан татвараас чөлөөлөх зэргээр киноны салбарыг хөгжүүлэх, дэмжих эрх зүйн таатай орчинг бүрдүүлэх зохицуулалтыг тусгасан байна.
Дээр дурдсан 40 хувийн урамшууллыг буцаан олгохдоо Киног дэмжих сангаар дамжуулан олгохоор хуулийн төсөлд заасан бөгөөд энэхүү сан нь улсын төсөвт нэмэлт ачаалал учруулахгүй, өөрөө өөрийгөө санхүүжүүлэх хэлбэрээр ажиллах юм байна.
Улсын Их Хурлын гишүүн Д.Сарангэрэл, хуулийн төслийг дэмжиж буйгаа илэрхийлээд, Соёлын тухай хуулинд асуудлын нэг тал нь буюу зөвхөн монгол контент, монгол киног кино үзвэрүүд болон телевизээр гаргах ёстой гэсэн лозун маягийн заалтыг хуулинд тусгасан. Нөгөө талаар монгол киног хаанаас гаргаж ирэх, хэн хийх асуудал нь бүдэг байсан. Үүнийг нөхөх хууль орж ирж байна гэж үзэж байгаа тул дэмжиж байна. Монгол Улсыг гадаадад сурталчлах, аялал жуулчлалыг хөгжүүлэхэд энэ хуулийн төсөл нэмэр болно гэсэн асуудал яригдаж байгаа. Нөгөө талаасаа залуу үеийг хөгжүүлэх, ахмад үеээ хүндлэх, аав ээжийгээ асран халамжлах асуудал орхигдож, баруунжих тал руу явж байгаа төдийгүй, солонгос киног дуурайж байна гэсэн шүүмжлэл давамгайлж байна. Иймд зөвхөн түүхэн кино хийгээд гадаадад гаргаж шагнал авах тохиолдолд нийт зардлынх нь 40-50 хувийг нь өгнө гэсэн нь нэг талыг барьсан харагдаж байна . Иймээс телевизээр гарч байгаа сериалуудыг нэлээд дэмжих шаардлагатай. Энэ талд хөрөнгө мөнгө зарцуулах асуудал хуулийн төсөлд тусгагдсангүй. Жишээ нь Солонгос Улс телевизийн сериалаар дамжуулж улс орныхоо эдийн засаг, үндэснийхээ үйлдвэрлэлийг хөгжүүлдэг. Солонгос гар утас барих ёстой, цүнх барих ёстой гэсэн уриатай, шаардлагатай юм билээ. Энэ талын асуудлыг орхигдуулаад байна уу гэсэн дүр зураг харагдаж байгаа гэдгийг хэллээ.
Улсын Их Хурлын гишүүн, Боловсрол, соёл, шинжлэх ухааны сайд Л.Гантөмөр гишүүнтэй санал нэг байгаагаа хэлж, Монгол Улс дэлхийн киноны талбар болох зорилт дэвшүүлсэн. Гарч байгаа уран бүтээлүүдэд чиглэсэн хөнгөлөлтүүдийг хуулийн төслийг хэлэлцэх явцад тусгаад явах боломжтой гэв.
Түүнчлэн кино урлагийг хөгжүүлэхийн тулд асуудлыг цогцоор авч үзэх хэрэгтэй. Кино театруудад кино үздэг соёлыг бий болгох улмаар кино театруудыг хөгжүүлж байж кино бүтээгчдийг бодит утгаар нь дэмжинэ. Энэ санаа хуулийн төсөлд хомсхон туссан байгаа талаар байнгын хорооны дарга хэлсэн юм. Мөн кино театруудыг дэмжих чиглэлээр хуулийн төсөлд ямар зохицуулалт туссан талаар тавьсан асуултад ажлын хэсгээс хариулт өгөв. Гишүүд асуулт асууж, хариулт авсны дараа хуулийн төслийг хэлэлцэхийг дэмжих нь зүйтэй гэсэн саналаар санал хураалт явуулсныг 100 хувийн саналаар дэмжлээ хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
-
2016 оны 5 сарын 11
Ази, Европын дээд түвшний XI уулзалтыг зохион байгуулах, чиг үүргээр хангах үндэсний зөвлөлийн 26 дугаар хуралдаанаар дээд түвшний уулзалтад үйлчлэх тээврийн хэрэгслүүдэд хяналт тавьж ажиллах тухай асуудлыг хэлэлцэж, БНХАУ-аас авах буцалтгүй тусламжийн хуваарилалт, АСЕМ-ийн үеэр ашигласан тоног төхөөрөмж, эд материалыг эргэн борлуулах асуудлуудтай танилцлаа.
-
2016 оны 5 сарын 11
Үндсэн хуулийн цэцийн дүгнэлтээс шалтгаалан Сонгуулийн тухай хуульд өөрчлөлт оруулсан. Ингэснээр УИХ-ын сонгуулийг 76 жижиг тойргоор буюу мажоритор системээр явуулахаар болоод байгаа.
