МАХН-ын ЕНБД Н.Удвал, МАХН-ын дэргэдэх Залуучуудын холбооны тэргүүн А.Энхболд, Ахмадын холбооны тэргүүн Шагдарсүрэн нарын хүмүүс хэвлэлийн бага хурал хийлээ. Энэ үеэр МАХН-ын ЕНБД Н.Удвал “Монгол Улсын гурав дахь Ерөнхийлөгч, МАХН-ын дарга Н.Энхбаяр хууль бусаар, төрөөс зохион байгуулсан зэрлэг хэрцгий хүчирхийлэл, халдлагад өртөж цагдан хоригдсоноос хойш 20 гаруй хонох гэж байна. АТГ, шүүх, прокурор, мөрдөн байцаагчид, албан тушаалтнууд хууль зөрчсөн үйлдлээ засаж залруулахын оронд нааш ч үгүй, цааш ч үгүй мухардалд орж дээрхи байгууллагууд, албан тушаалтныхаа нэр хүндийг олон түмний дунд унагахгүйн тулд түүнийг яаж ч хэлмэгдүүлэхээс буцахгүй улайран зүтгэж байна” гэв."Хүний эрхийн хуульчид Монгол Улс үзэл санааны буюу улс төрийн хоригдолтой боллоо гэдгийг 2012 оны 5-р сарын 2-ны өдөр ард иргэддээ болон дэлхий дахинд албан ёсоор зарлалаа. Монголд 1937 онд улс төрийн хэлмэгдүүлэлт болж олон хүний амь насыг хохироосон, 1963,1964 онуудад улс төрийн үзэл бодлоор нь хавчин гадуурхаж, гэр бүлээр нь нутаг заан цөлж байсан. Харин улс төрийн томоохон сөрөг хүчин болсон МАХН-ын дарга Н.Энхбаярыг зэрлэгээр хууль зөрчин цагдан хорьсоноор 21-р зуунд Ардчилсан Монгол Улс “улс төрийн хоригдолтой” боллоо гэж албан ёсоор зарлалаа.
Ард түмнээ сонсох чихгүй, үнэнийг харах мэлмийгүй, алдаагаа засах чадваргүй, авилгач төрийн бурангүй үйлдлээс болж нэр, төр, эрх чөлөө, эрүүл мэндээрээ хохирч байгаа Монгол Улсын гурав дахь Ерөнхийлөгч Н.Энхбаяр дуулгаваргүй, хариуцлагагүй, харгис төрийн золиос болж эрүүл мэнд амь насаараа дэнчин тавьж өлсгөлөн зарлаж байгаад МАХН, түүний мянга, мянган гишүүд, дэмжигчид, хамтран зүтгэгчид бид туйлын харамсаж байна. Түүний энэ үйлдэл нь хууль ёс уландаа гишгэгдэж, ёс суртахууны уналтад орсон энэ нийгэм, монгол төрд тогтсон олигархи дэглэм, төрд гарсан олигархиуд өлсгөлөн зарлахаас өөр ямар ч сонголтыг түүнд үлдээгээгүй болохын баталгаа юм.
Улс төрийн өлсгөлөн нь тэмцлийн хурц хэлбэр бөгөөд тэмцэгч хүний хувьд амь нас, эрүүл мэндээрээ дэнчин тавьж байгаа хамгийн сүүлийн алхам юм. МАХН-ын дарга Н. Энхбаярт өөрийнхээ эрүүл мэнд, амь насаа бурангуй төрийн золиос болгохгүй байхыг зөвлөж байна.
Эзэрхэг түрэмгий, харгис төрийн буруутай үйл ажиллагаанаас болж Монгол Улсын Гурав дахь Ерөнхийлөгч, МАХН-ын дарга Н.Энхбаярын амь, нас эрүүл мэндэд ямар нэг хохирол учирвал Монгол Улсын Ерөнхийлөгч Ц.Элбэгдорж, УИХ-ын дарга Д.Дэмбэрэл, Ерөнхий сайд С.Батболд,ХЗДДХ-ийн сайд Ц.Нямдорж, Улсын Ерөнхий прокурор Дорлигжав, АТГ-ын дэд дарга Хурц, Цагдаагийн Ерөнхий газрын дарга Д.Сандаг –Очир, Шүүгч Оюунтуяа нараас амь насыг нь нэхэмжлэх болно гэдгээ үүгээр мэдэгдэж байна.
Улс төрийн хэлмэгдүүлэлтгүй Монгол улсын төлөө монголын бүх ард түмнийг нэгдэхийг уриалж байна” гэв.
