Израилын эзлэн түрэмгийлсэн Баруун эрэгт Израилын цэрэг гал нээсний улмаас долоон сартай палестин хүү амиа алдаж, эцэг эх нь шархадсан хэрэг олон улсын анхаарлыг татаж байна. Талийгаач хүүг Сам Фахд Абу Хайкал гэдэг бөгөөд тэрээр эцэг эхийнхээ хамт автомашинаар зорчиж явах үед Хеброн хотын ойролцоох Тел Румейда бүсэд Израилын цэргүүд гал нээжээ. Палестины Эрүүл мэндийн яамны мэдээлснээр, сум машины салхины шилийг нэвтлэн орж, хүүг хөнөөсөн бөгөөд эцэг эхийг нь мөн шархдуулсан байна.

Хүүгийн эцэг Фахд Абу Хайкалын хэлснээр, тэд цэргүүдийг хараад автомашинаа зогсоосон байсан ч нэг цэрэг ойролцоогоор 10 метрийн зайнаас буудсан аж. Түүний ярьснаар сум эхлээд гар руу нь тусаж, дараа нь эхнэр болон хүүг нь оножээ.

Харин Израилын Батлан хамгаалах хүчин (IDF) урьдчилсан шалгалтын дүнд тухайн автомашиныг цэргүүд рүү хурдалсан учир нэг удаагийн гал нээсэн гэж мэдэгдсэн байна. Дараа нь шархадсан хүмүүс нь энгийн иргэд байсан нь тогтоогдсон гэжээ.

Уг явдлын дараа Израилын армийн Цэргийн цагдаагийн мөрдөн шалгах хэлтэс албан ёсны эрүүгийн хэрэг үүсгэн шалгаж эхэлсэн бөгөөд дүгнэлтийг Цэргийн ерөнхий прокурорын газарт хүргүүлэхээр болсон байна.

Энэ хэрэг нь Газын дайнаас хойш хурцадмал байдал нэмэгдсэн Баруун эрэг дэх хүчирхийллийн шинэ жишээ болж байна. НҮБ-ын мэдээлснээр, 2023 оны аравдугаар сараас хойш Баруун эрэг болон Зүүн Иерусалимд 1000 гаруй палестин хүн амь үрэгдсэний дотор дор хаяж 240 хүүхэд багтаж байгаа аж.

Л.Баяр