Хүн амын хөгжил, нийгмийн хамгааллын сайд С.Эрдэнэ саяхны нэг өдөр хэвлэлд ярилцлага өгөхдөө нийтлэлч Баабарын булхайг дэлгэснээс гадна олон нийтийн дунд дуулиан тариад буй зарим мэдээлэлд хариулт өглөө. Ингээд түүний хэлсэн онцлох 24 ишлэлийг 24 баримт хүргэж байна.
1. 1996 онд БГД-ийн АН-ын дарга байхад Баабар УИХ-д нэр дэвшиж байсан. Тухайн үед бид бүхий л чадлаараа хичээж УИХ-ын гишүүн болгож байсан. Түүнээс хойш бид хоёрын дунд олон огтолцол болоогүй. Би энэ хүнд муу зүйл хийгээгүй.
2. Баабарт Оюутолгойтой холбоотой ашиг сонирхол байдаг. Би Оюутолгойн гэрээний эсрэг тууштай тэмцэж хэд, хэдэн өөрчлөлтийг хийлгэж чадсан. Хууль бус заалтуудыг залруулсан. Хувь нийлүүлэгчийн гэрээг нууцын зэрэглэлээс гаргаж хүчингүй болгож байсан. Хэрвээ гэрээ энэ чигээрээ хүчинтэй хэрэгжсэн бол монголчууд Оюутолгойн нийт хувьцааны 6 хувийг л эзэмших байсан. Учир нь нийт хувьцааны 20 хувь нь л энгийн хувьцаа юм шүү дээ. Үүн дээр Баабарын дургүйг хүргэсэн байж магадгүй.
3. Оюутолгойн ногдол ашгийн хүү өндөр байсныг бууруулсан. Үүний үр дүнд Монгол улс нэг тэрбум долларын хүүний өрнөөс салж чадсан. Энэ нь Оюутолгойн төлөө ажиллаж байсан хүмүүсийн дургүйг хүргэсэн байх.
4. Баабар миний нэр хүндийг гутааж байгаа бол түүний ямар өчүүхэн хүн болохыг ил тод болгоё. Баабар гурван компанид өөрийн ажилласан жилийг нэмэгдүүлэх хуурамч бичиг баримтыг үйлдсэн. Өөрийнхөө ажилласан жилийг нийт 6 жилээр нэмэгдүүлсэн. Өөрийнхөө нэр, овог, регистрийн дугаарыг хуурамчаар үйлдэж ажиллаагүй компанийнхаа нэр дээрээс тэтгэвэр авдаг. Нийгмийн даатгалыг нийт 5 сая 772 мянган төгрөгөөр хохироосон. Одоо болтол нэг ч төгрөг төлөөгүй байгаа. Улсын байцаагчийн акт нь байна.
5. Баабар Бороо гоулд компаниас бас тэтгэвэр авдаг байсан. Өөртэйгээ адилхан нэртэй залуугийн нэр дээр регистрийг нь өөрчлөөд тэтгэвэр авдаг байсан байгаа юм. Ер нь нэг зохиол бичдэг хүний үгээр миний талаар нийгэмд буруу ойлголт төрүүлж болохгүй шүү дээ.
6. СБД-ийн нийгмийн даатгалын хэлтэс дээр очоод даргыг нь ажилтнуудтай нь дарамталсан Баабар. Тэгэхдээ “Та нарт С.Эрдэнэ ээ чинь үүрэг даалгавар өгсөн үү. Миний бөгсийг ухаж байгаа бол С.Эрдэнээтэй чинь хамт чадна аа” гээд гарсан байна лээ. Өөр жишээнүүд ч их байна.
7. Баабарын Оюутолгой, Бороо гоулд зэрэг компанитай хамтран ажиллах гэрээ байгуулсан баримт нь надад байна. Би тоо ширхэгээр нь гаргаад ирж чадна.
8. Намайг хүн алдаг, хүүхэн хүчинддэг, хүний юмыг булаадаг гэж бичсэн. Үүнийгээ нотлох ёстой. Нотлохгүй бол хууль цагдаагийн байгууллагад өгнө. Энэ хүн удаа дараа над руу дайрсан. Нэр хүндтэй нийтлэлч хүн болохоор нь ганц ч дуугаралгүй тэвчиж ирсэн.
9. Нас барсан 10 мянган хүний тэтгэврийг Нийгмийн даатгалынхан авсан гэж ярьж буй нь эрүүл, хүний ухаан санаанд багтахааргүй тоо. Оршуулгын тэтгэмж авсан, өгсөн санхүүгийн баримт нь бүгд байгаа. 10 мянган хүн нь бүтэн жилд нас барсан хүний тоотой тэнцэж байна. Энэ хүмүүсийн мөнгийг авах ямар ч боломж байхгүй. 10 жилд нас барсан нийт хүмүүсийн оршуулгын тэтгэмж 37 тэрбум. Гэтэл хаанаасаа 40 тэрбумыг гаргаж идэх юм.
10. Цагдаагийхан нотлогдоогүй асуудлыг дэлгэсэн. Ямар учраас ингэсэн гэдгийг тодруулж байна. Цагдаагийн байгууллагаас одоог хүртэл манай нийгмийн даатгалын нэг ч байцаагч дээр эрүү үүсгээгүй. Нас барсан хүмүүсийн тэтгэврийг авсан гэхээс өөр тоймтой бодитой мэдээлэл хэлэхгүй байна.
11. Би ажилчдаа өмөөрөөгүй. Нийгмийн даатгалын 1500 байцаагчийг хулгайч, луйварчин болгож болохгүй. Салбараар нь битгий хард. Янз бүрийн алдаа оноотой хүн байж болно. Бүх бичиг, материалыг дотоод хяналтын хэлтсээс шалгасан. Тэгэхэд 169 төгрөгийн зөрчил гарсан. Үүнийг 10 жилд хуваагаад бодох хэрэгтэй. Түүнээс биш олон тэрбум төгрөгийн зөрчил илрээгүй.
12. Би хариуцлагатай хэлье. Нийгмийн даатгалын ажилчид буяндаа бузар хийсэн юм хийхгүй. Би тэдний өмнөөс хариуцлага хүлээхэд бэлэн байна. Тийм хүн ганц, хоёроос хэтрэхгүй байх.
13. Би бэлэн мөнгөний баримт дээр гарын үсэг зурдаггүй. Надаар мөнгө дамждаггүй. Бүх зүйл хяналттай. Нийгмийн даатгалын мөнгийг захиран зарцуулдаггүй.
14. Н.Алтанхуягийн ЗГ-ыг огцруулах асуудлыг чуулганы хуралдаанаар хэлэлцэх үед очихыг хүсээгүй. Энэ талаар сүүлд ярьж болно.
15. “Шонхор таур”-ын газрыг хууль ёсны дагуу өгсөн. Хууль бусаар аваагүй. “Төгс эрдэм” ТББ нь залууст сургалт явуулах зориулалтаар байгуулагдсан. Миний охин ажиллуулдаг. Одоо дөнгөж үйл ажиллагаагаа явуулж эхлээд байгаа. Барин тавин сенсааци тарих мэдээллийг тарааж болохгүй. “Төгс Эрдэм” сан надтай холбоогүй. Анх гахай, банз, машин зөөж наймаанд хөл тавьж байсан. 1995 онд машины наймаа хийсэн. Тэр үед “Молор трейд” компаниа байгуулсан.
16. Би Ерөнхий сайд болохгүй. Эрийн хугархай байхыг хүсдэг юм. Цаг нь болоогүй зүйлд зүтгээд байх хэрэггүй.
17. Миний хүүхдүүд, ах дүү нар өөрсдөө бизнес хийж болохгүй юу. Би хөрөнгө орлогын мэдүүлгээ байнга мэдүүлдэг. Энд надтай хамаатай юм байгаад би нуусан бол хариуцлага хүлээнэ.
18. Миний эрхэлж байгаа салбарт хагартлаа идэж, уугаад шамшигдуулаад байх хүн байхгүй. Бүх хөрөнгө хариуцах эзэнтэй. Салбар агентлагуудаараа дамжуулж зарцуулагддаг.
19. Надад хууль бус хийсэн үйлдэл байгааг шалгах хэрэгтэй шүү дээ. Зорилго агуулж хүнийг шалгавал хэлмэгдүүлэлт болно.
20. Хуучин амьдарч байсан байраа би охиндоо өгсөн. Өөр өмч хөрөнгө надад байхгүй. Миний хүүхдүүд, ээжийн маань нэр дээр бол үл хөдлөх хөрөнгө нилээн их бий. Манай гэр бүл алт ухаж, архи үйлдвэрлэдэг бизнес хийдэггүй. Нийтийн хоол, сургууль, амралт, барилга барих ажлыг л явуулдаг. 25 жил бизнес хийсэн “Молор” трейд компанид хөрөнгө байлгүй яахав. 25 жил байтуйгай 2 жилийн хугацаанд бизнес хийгээд хагартлаа баяжсан хүмүүс байдаг л биз дээ Монголд.
21. Г.Шийлэгдамба гэдэг хүнийг сайн танихгүй. Гэхдээ тийм хэрэг хийгээгүй байх гэж бодож байгаа. Гэхдээ хууль хүчнийхэн шалгаад буруутай эсэхийг нь тогтоох байх. Би ч өөрөө ийм байдалд орж байсан. 2006 онд намайг зохиомол хэрэгт гүтгэж 6 жилийн ял оноож баривчилж байсан.
22. Би цалингаараа л амьдарч байгаа. Миний ах, дүү хамаатан садангууд БГД-ийг дүүргээд байгаа зүйлгүй. БГД-ийнхэн тэнэг биш. Тэд хэнийг сонгохоо мэднэ шүү дээ. Би дүүргийнхнээ хүндэлдэг. Манай дүүргийхэн надаас айсандаа намайг сонгоод байгаа зүйлгүй. Манай босго өндөр.
23. БГД-ийн ИТХ-д надтай хамаатай дөрвөн хүн ажилладаг. Бусад хүмүүс нь хамааралгүй. Тэгэж ярьбал БГД-ийн ИТХ-д суудаг 30 хүн бүгд миний улс төрийн хамтрагч, найзууд. Улс төрд гэр бүлээрээ зүтгэж болдоггүй юм уу. Дэлхийн нийтэд ийм жишээнүүд олон л байдаг.
24. Нелсон Мандела Өмнөд Африкийн улс төрд насаараа зүтгээд Ерөнхийлөгч болсон. Би ч улс төрийн албан тушаалд тууштай, тогтвортой ажилласан. Ингэснээрээ буруудаад байгаа юм уу. Би 14 хоногийн өмнө 140 хүүхдийн ортой эмнэлэг барьсан.
Т.Энхэлээ
Сэтгэгдэл (45)