“Шинэ үе” продакшины жүжигчдийн буюу “халуун усны хэрэг” дахин олны анхаарлыг татах боллоо. Учир нь энэхүү хэрэг дэгдснээс хойш чимээгүй байсан жүжигчин Ц.Алдармаа уржигдар “С1” телевизийн “Цензургүй яриа” нэвтрүүлэгт оролцож, цензургүй ярисан. Тэрбээр энэ үеэрээ “Шүүх хурлын үеэр гэмээ ухаараад дуугүй байсан”, “Халуун ус цацах хүртэл тэвчээрийг барагдуулах нь өөрөө аймшигтай зүйл”, ”Хэрэг дууссан гэж бодож байтал Д.Оюунтуул эгч надаас дахин 35 сая төгрөг нэхэмжилсэн” хэмээн өгүүлсэн.
Гэтэл түүний энэхүү яриа Д.Оюунтуулд төдийлөн таалагдаагүй бололтой. Тэрбээр энэ талаараа “Ц.Алдармаа надаас ганц ч удаа уучлалт гуйгаагүй. Гэтэл чухам яагаад тэгж худал ярьсанд нь гайхаж байна. Би удахгүй хэвлэлийнхэнтэй уулзаж, албан ёсоор ярилцлага мэдээлэл өгнө” хэмээсэн юм. Ямартай ч олны хайр хүндэтгэлийг хүлээсэн жүжигчидийн хэвлэлээр “дайсагнах” байдал хэзээ эцэслэхийг цаг хугацаа л харуулах буй за. Ингээд тэдний хооронд өрнөсөн мэдээллийг 24 VS 24 буландаа хүргэж байна.
Д.Оюунтуул: Ц.Алдармаа яагаад худал зүйл яриад байгааг ойлгохгүй байна
Ц.Алдармаа үнэндээ бол надаас ганц ч удаа уучлалт гуйгаагүй. Гэтэл чухам яагаад тэгж худал ярьсанд нь гайхаж байна. Би удахгүй хэвлэлийнхэнд албан ёсоор мэдээлэл өгнө.
Ц.Алдармаа яагаад гурван сар хоригдсон гэж яриад байгаа юм бол... Уг нь бол хоёр сар ч хүрэхгүй хугацаанд шүүхийн шийдвэр гүйцэтгэх дамжин өнгөрүүлэх төвд байсан шүү дээ. Гэтэл энэ нэвтрүүлэгт огт өөр зүйл ярьж, бас тэр сэтгүүлч Мөнхбаясгалан хүртэл миний эсрэг байр суурийг баримталсан хандлагатай асуулт тавьж байна лээ.
Үнэндээ өглөөнөөс хойш хэвлэлийнхэн утасдаад, янз бүрийн хүмүүс элдэв үгтэй мессеж, коммент явуулж байна. Уг нь эрүүл мэндээ бодсон ч тэр асуудалд тайвнаар хандаж, хуулийн дагуу арга хэмжээ авья гэж бодож байсан юмсан. Гэтэл үүнээс болоод бие тавгүйрхэж, стрессдэж эхэллээ шүү.
Ц.Алдармаагийн хувьд, өмнө нь хоёр ч удаагийн шүүх хурлыг хойшлуулж байсан. Харин гурав дахь удаагийн шүүх хурал нь саяхан болсон шүү дээ. Тэр хурлаар миний эмчилгээний зардлыг 35 сая төгрөгийг нөхөн төлүүлэх шийдвэр гаргасан.
Би зургаан удаа Солонгост очиж эмчлүүлсэн. Тэр бүхнээс ганцхан удаагийн зардлыг нь Ц.Алдармаа гаргасан.
Шүүх хурал дээр Ц.Алдармаа уг хэргийн талаар мэдүүлэг өгч, шүүгчдийн асуусан асуултад хангалттай хариулсан. Миний хувьд бусдаас нууж хаагаад байх зүйлгүй ч, Ц.Алдармаагийн ар гэрийнхэн “Шүүх хурлыг хаалттай явуулъя” гэсэн хүсэлт гаргасан.Гэхдээ шүүх хурал дээр чухам юу ярьж байгааг нь сонсох боломжгүй боловч дүрс бичлэг нь шүүхийн танхимын гадаа тодорхой гардаг учраас тэнд байсан сэтгүүлчид ч Ц.Алдармааг хэрхэн ярьсныг харсан биз ээ. Харин тэр Мөнхбаясгалан сэтгүүлч тэнд байгаагүй атлаа огт худал зүйл яриад байсныг нь гайхаж сууна. |
Ц.Алдармаа: Халуун ус цацах хүртэл тэвчээрийг барагдуулах нь өөрөө аймшигтай зүйл
Бид салшгүй, бие биеэндээ итгэдэг эгч дүүс байсан. Гэтэл хүний тэвчээрийг алдагдтал, буцалсан халуун ус цацах хүртэл тэвчээрийг маань барагдуулсан нь өөрөө аймшигтай зүйл гэж би боддог. Би ийм зүйл хийсэндээ өөртөө ч итгэддэггүй, надад маш хүнд байдаг. Миний хувьд амьдралын маань хамгийн муухай үйл явдал энэ болсон.
Хориход байхад надад энэ бүхэн хар дарсан зүүд шиг л байсан. Тухайн үед хурдхан л хүү дээрээ очихсон гэж бодож байсан.
Д.Оюунтуул эгч намайг уучилсан гэдгийг би сонссон. Гэхдээ энэ асуудал хэн хэнийгээ үзэн ядах, уучлах асуудал бус хэн хэнийнх нь булчимгүй, уураа барьж чадаагүй үйлдэл л гэж боддог. Ер нь нийгэмд ийм муухай үлгэр дууриалал болсондоо маш их гутардаг. Би ер нь Д.Оюунтуул эгчид гомддоггүй.
Би маш буруутай үйлдэл хийсэн болохоор шүүх хурлын үеэр өөрийгөө өмгөөлөх нэг ч үг хэлээгүй юм. Ер нь би маш их гэмшсэн, маш их зүйлийг бодож, ойлгосон. Энэ бүхнийг цаг хугацаа л эдгэрүүлэх байх. Би цаашид ажлаа хийх болно.
Анхан шатны шүүхээс гаргасан шийдвэрийн дагуу би Д.Оюунтуул эгчид 25 сая 500 мянган төгрөгийг өгсөн. Шүүхээс оноосон ялыг ч би эдэлсэн. Харин давж заалдах шатны шүүхээс надад 2 жилийн тэнсэн харгалзах ял оноосоноор би хэргийг дууссан гэж бодож байсан. Хүмүүс ч тэгэж бодож байсан байх. Гэтэл Туул эгч дахин 35 сая төгрөгийг нэхэмжилсэн. Гэхдээ миний санхүүгийн боломж тааруу байгаа болохоор төлөхөд хэцүү байгаа. Ямартай ч хуулийн дагуу төлөх ёстой мөнгөө өгнө.
Туул эгчтэй хэргийн дараа уулзсан. Намайг уучилсан байх гэж бодож байна. Тухайн үед надтай уулзах үедээ шүүхээр явна гэж хэлж байсан.
Ер нь овоо босгоогүй бол шаазгай юун дээр суух вэ, “Гээндээ ч бий гоондоо ч бий” гэдэг шиг л зүйл болсон доо. |
24tsag.mn
Сэтгэгдэл (61)