Өнгөрсөн долоо хоногт УИХ-ын ээлжит бус чуулган хуралдаж Үндсэн хуулийн цэцийн дарга Ж.Амарсанааг үүрэгт ажлаас нь чөлөөлсөн. Тэгвэл ажлаасаа халагдсан Ж.Амарсанаа УИХ-ын үйл ажиллагааны талаар болон өөрийг нь огцруулсан асуудлаар байр, сууриа илэрхийллээ. Түүний хэлсэн үгийг 24 баримт онцолж байна.
Баримт 1. Засгийн газар Цэцэд юм бэлэглэнэ гэж юу байх вэ. Харин ч Цэцийн хангамжийн асуудал орхигдчихоод байгаа. Цэцийг өргөжүүлэх, тоног төхөөрөмж авах гэх мэт бүх ажлаа бид өөрсдөө зохицуулдаг.
Баримт 2. Цэцийг их муухай газар, үл бүтэх байгууллага гэх ойлголтыг нийгэмд тараах зориудын санаа байна.
Баримт 3. Би багш, судлаач хүн. Харьцуулсан эрх зүй гэдэг хичээл заадаг, судалгаа хийдэг. Би эксель, 570 маркийн машиныг зүйрлүүлж хэлсэн юм. Эксель Солонгост үйлдвэрлэгдэхээ больчихсон. Манайд ч бас ховор байгаа. Тэгээд л би “Цэцийн даргад эксел унуулах гээд байгаа юм уу” гэж зүйрлүүлж хэлсэн юм.
Баримт 4. Цэцийн байрны хашаан дотор 4 приүс, гурван эксель машин оруулж ирчихээд “Цэцийн хашаан дотор жагсаал боллоо” гэсэн мэдээллийг тараасан. Жагсаал болдог газар ч биш. Хөдөлгөөнгүй зогсохыг жагсаал гэдэггүй юм.
Баримт 5. Зохион байгуулалттай цуглаан зохион байгуулж Үндсэн хуулийн Цэцийн үйл ажиллагаанд нөлөөлөх гэж оролдсон. Тодорхой намын санхүүжилтээр тэр цуглааныг зохион байгуулсан байна лээ.
Баримт 6. Хүний эрхийг хамгаалдаг Үндсэн хуулийн цэц рүү довтолж байна.
Баримт 7. Үндсэн хуулийн Цэцийг чадавхгүй болгох нэг хэлбэр бол Ж.Амарсанааг зайлуулах байсан. Далим болгож ердөө бичиг явуулсан. Албан бичгээс болж намайг чөлөөлж байна гээд байгаа юм.
Баримт 8. Цэцтэй холбоотой хэдэн хууль гаргасныг нэгэн иргэн манайд хандаад бид дунд суудлын хуралдаанаараа хэлэлцээд түтгэлзүүлсэн. Тэр хууль цаашаа үйлчлэхгүй. Түдгэлзсэн учраас та бүхэн ямар нэгэн арга хэмжээ авахгүй байх нь зүйтэй. Хууль зөрчсөн эсэхийг нь бид хэлэлцэх гэж байна гэж хэлсэн. Гэтэл Ж.Амарсанаа урьдчилж санал гаргасан. Хууль зөрчсөн гэж үзсэн гээд л далим гаргасан. Би зөрчсөн эсэхийг нь шийддэг хүн биш. Цэц хуралдаж байж л шийдвэрлэнэ.
Баримт 9. Хууль мөрдөж байгаа зүйл огт алга. Намайг хууль зөрчсөн эсэхийг УИХ-ын Тамгын газрын дарга нь нотолчихдог. Тэгээд дээд шүүх рүү бичиг явуулчихдаг. Буцаагаад дээд шүүхээс бөөрөнхий хариу ирүүлсэн.
Баримт 10. Хуулийг яаж ч гуйвуулж болдгийг харуулж байна. УИХ надад зориулж ээлжит бус чуулган хийгээд намайг эргүүлэн татсан. Гурван хоногийн дотор ёсчлох ёстой. Тэр нь юу болж байгаа юм бүү.
Баримт 11. Дараагийн гишүүн томилогдтол би ажлаа хийх хуулийн заалттай. Дээд шүүх нь хэзээ яарч, сандран хуралдаж хүн томилох юм. Дахин нэг хүнд зориулж ээлжит бус чуулган зарлана биз. Миний оронд ирэх хүнийг яарч, сандарч удахгүй томилох байх.
Баримт 12. УИХ-ын итгэмжлэгдсэн төлөөлөгчийг явуулаагүй байхад УИХ-ын цэц хуралдлаа гээд буруутгаад байгаа. УИХ-ын даргын итгэмжлэгдсэн төлөөлөгч ирээгүй байсан ч Үндсэн хуулийн цэц хуралдаж болдог хуультай. Сүүлийн үед УИХ-ны дарга тэр бүү хэл байнгын хорооны дарга хүртэл Цэцийн хуралдааныг хойшлуулдаг болсон.
Баримт 13. Цэцийн ажлыг хийлгэхгүй янз бүрийн арга хэрэглэж байна.
Баримт 14. Цэцийн гишүүнийг 60 нас хүрсэн бол тэтгэвэртээ гарсан байх ёстой гэж үзээд ганцхан хүнээр далимдуулж бүгдийг нь халах гэж үзэж байна.
Баримт 15. УИХ-ын хууль бус шийдвэрийг манайх хүчингүй болгодог. Тэгээд л болоо. Саяын шийдвэрийг ч мөн хэлэлцэнэ.
Баримт 16. Х.Тэмүүжин хууль зүйн дээд боловсролтой байхыг үгүйсгэхгүй. Гэхдээ эрх зүйн мэргэжил эзэмшчихээд хуулийг худлаа тайлбарлаж болохгүй.
Баримт 17. УИХ-ын гишүүн хэлсэн үгийнхээ төлөө хариуцлага хүлээхгүй гэдэг нь худлаа ярь гэсэн үг биш. Ядаж хууль зүйн нэр томъёогоор зөв ярих ёстой.
Баримт 18. УИХ-ын ээлжит бус чуулганы шийдвэрийг хууль зөрчсөн эсэхийг хэлэлцэх гэхээр манай ирцийг бүрдүүлэхгүй байна.
Баримт 19. Х.Тэмүүжингийн яриаг үзэж байхад хуулийг хэсэг, хэсгээр нь тасдаж аваад ярьж байна. Унагах бүх механизмыг хэрэглээд байна.
Баримт 20. Үндсэн хууль хүний эрхийг л хамгаалмаар байна. Иргэдийн эрхийг нь эдлүүлэхгүй байна. Хүний эрхийг Үндсэн хуулийн цэц хамгаалах гэхэд цэцийг ажлын чадамжгүй болгож байна.
Баримт 21. Цэцийн гишүүн улс төр, эрх зүйн өндөр мэдлэгтэй байх ёстой. Одоо болохоор улс төрчид нь илүү орж ирэх гээд байна.
Баримт 22. Хэрвээ улс төрчид Цэц рүү их орж ирвэл УИХ-ын байнгын хороо л болно.
Баримт 23. Р.Гончигдорж ухаантай, мундаг хүн. Уг нь Бага хуралд байхдаа Үндсэн хуулийг өөрөө баталсан хүн. Гэтэл өөрөө Үндсэн хуулийн цэцийн хүчийг сулруулах кампанит ажилд оролцоод явж байгаа нь харамсалтай.
Баримт 24. Би ажилдаа хорогдоод зууралдаад байгаа зүйл байхгүй.
24tsag.mn
Сэтгэгдэл (36)