Хөвсгөл аймгийн Галт сумын ерөнхий боловсролын сургууль энэ хичээлийн жилээс тус сумын уугуул доктор, профессор Дашцэдэнгийн нэрэмжит боллоо. Монгол улсын хөдөлмөрийн баатар, гавьяат багш Түмэнбаярын Дашцэдэн нь МУИС-д багш, тэнхимийн эрхлэгч, орлогч захирлаар ажиллаж байсан  юм. Түүний дурсгалыг хүндэтгэж Галт сумын сургуулийн өмнө хөшөөг нь босгожээ.
   Доктор, професссор Т.Дашцэдэнгийн хөшөөний нээлтэд түүний охин Д.Мядагмаа, түүний үр хүүхдүүд мөн Хөвсгөл аймгийг Галт сумын удирдлагууд оролцлоо. Энэ үеэр сурагчдын дунд бөхийн барилдаан, дааганы уралдаан гүйлтийн тэмцээн, урлагийн тоглолт зохион байгуулжээ.

   Монгол улсын хөдөлмөрийн баатар, гавьяат багш, хүмүүнлэнгийн ухааны доктор, профессор Т.Дашцэдэн 1923 онд Хөвсгөл аймгийн Галт суманд төрсөн. Тэрбээр 1954 онд  МУИС-ийн монгол хэл уран зохиолын багш мэргэжлээр суралцан төгсөж 1958 оноос МУИС-ийн багш, тэнхимийн эрхлэгч, орлогч захиралаар ажиллаж байсан юм.

  Ийнхүү хуульч Б.Чимэд болон олон монгол хэл судлаач, эрдэмтдийг төрүүлсэн хөдөлмөрийн баатар Т.Дашцэдэнгээр уугуул сумын сургууль нь овоглох боллоо.