Кени улсын төв хэсэгт байрлах охидын дотуур байртай сургуульд гарсан аймшигт гал түймрийн хэрэгтэй холбогдуулан найман сурагчийг галдан шатаасан байж болзошгүй хэмээн баривчилжээ. Энэхүү хэргийн улмаас 16 сурагч амиа алдаж, олон арван хүүхэд гэмтсэн байна. 

Гал түймэр баруун-төв Кенийн Гилгил хот дахь "Utumishi Girls' Academy Senior School" сургуулийн дотуур байранд пүрэв гаргийн үүрээр гарчээ. Албаныхны мэдээлснээр, түймрийн улмаас 16 охин амь үрэгдэж, 79 сурагч бэртэн эмнэлэгт хүргэгдсэн байна. Зарим сурагч амь гарахын тулд дотуур байрны дээд давхраас үсэрсэн талаар гэрчүүд ярьжээ.

Кенийн Эрүүгийн мөрдөн шалгах газрын урьдчилсан дүгнэлтээр, гал түймэр санаатай үйлдэл байж болзошгүй бөгөөд найман сурагч галдан шатаах ажиллагааг төлөвлөж, хэрэгжүүлэхэд холбоотой байж магадгүй гэж үзсэн байна. Тэднийг цагдаагийн хамгаалалтад авч, мөрдөн шалгах ажиллагааг үргэлжлүүлж байгаа аж.

Кенийн Боловсролын сайд Жулиес Огомба урьдчилсан шалгалтаар сургуулийн аюулгүй ажиллагаанд ноцтой зөрчил илэрснийг мэдэгдэв. Тэрбээр дотуур байр хэт олон хүүхэдтэй, мөн гал гарах үед яаралтай гарцын нэг хаалттай байсан нь хохирлыг нэмэгдүүлсэн гэж хэлжээ. Түүнчлэн хоёр багш сурагчдын төлөвлөж байсан үйлдлийн талаар мэдээлэлтэй байсан ч урьдчилан арга хэмжээ аваагүй гэж мэдэгдсэн байна.

Үүний улмаас сургуулийн удирдах зөвлөлийг тарааж, холбогдох ажилтнуудад сахилгын болон хууль хяналтын арга хэмжээ авах шийдвэр гарчээ. 

Л.Баяр