Монголчууд найм дахь удаагийн сонгуульдаа оролцож, эрх баригч МАН-ыг үнэмлэхүй олонхиор улираав. Өмнөх долоон сонгуулийн үр дүнгээр нэг намд, ялангуяа эрх баригчдад ийм хэмжээний итгэл үзүүлж, үнэлгээ өгч байсан тохиолдол үгүй. Эсвэж хамтрах суудлыг олгох, эсвэл сөрөг хүчний эгнээнд шилжүүлдэг нь сонгогчдоос, нийгмийн хандлагаас бүрэн хамаарч ирсэн ч энэ удаад Ардын намд, Ерөнхий сайд У.Хүрэлсүхэд үнэмлэхүй итгэл үзүүлсэн нь үе үеийн парламентын сонгуулийн түүхэнд нэгэн шинэ хуудсыг нээсэн хэрэг.
Үндсэн дүрмийнхээ хүрээнд С.Эрдэнийгээ бус Р.Амаржаргалыг гүйцэтгэх засаглалын тэргүүн, 31 дэх Ерөнхий сайдаар зарлаж, ирэх дөрвөн жилд хэрэгжүүлэх бодлогоо танилцуулж байсан АН-ынхан амжилт олоогүй нь энэ. Арга ядахдаа тэд сонгуулийн үр дүнг хүлээн зөвшөөрч, дотоод шинэчлэлээ эхлүүлснээ мэдэгдлээ. Ард түмний хандлага нэгэнт эргэжээ.
Хамгийн гол нь, 2016 онд 65 суудлыг авсан амжилтаа 2020 онд 62 болгож, үргэлжлүүлсэн Ерөнхий сайд У.Хүрэлсүх тэргүүтэй Ардын намынхны улс төрд тогтоосон эхний алхам нь төрийн тогтвортой байдал байв.
Монголын улс төрд уламжлал болж ирсэн жишиг, МАН-ын Үндсэн дүрмийн дагуу ялсан намын дарга У.Хүрэлсүхийг Ерөнхий сайдаар улираан томилсон нь зүй ёсны шийдвэр ч, парламентын спикерээр Г.Занданшатарыг, УИХ дахь МАН-ын бүлгийн даргаар Д.Тогтохсүрэн нарыг үргэлжлүүлэн ажиллуулахаар болсон нь өөрөө зөв жишиг байлаа. Ялсан намын даргыг Ерөнхий сайдаар улираасан жишиг 2008 оны УИХ-ын сонгуулийн дараа С.Баяр дээр тодорсон байдаг. Өөрөөр УИХ-ын дарга, Бүлгийн даргаас эхлээд саарал ордонд явдаг томилгоо, хөшигний ард өрнөж ирсэн нь нууц биш.
Харин тэрхүү уламжлалыг тас зохиж, өнгөрсөн хугацаанд ажиллаж ирсэн хөрсөө хадгалахыг илүүд үзсэн нь тэдний улс төрд үлдээж буй зөв жишиг болов.
Ерөнхий сайд У.Хүрэлсүхийн зүгээс ч Засгийн газрын бүтэц, бүрэлдэхүүнээ зураглахдаа өмнөх танхимынхаа удирдлагыг суурь болгосон нь ирэх дөрвөн жилд Монголын төрд тогтвортой байдал бий болохын эхлэл болж байна. Ерөнхийлөгчтэй зөвшилцөж, УИХ-аас баталсан Засгийн газрын бүтэц, бүрэлдэхүүнээр У.Хүрэлсүхийн тэргүүлэх танхим ирэх дөрвөн жилд ерөнхий чиг үүргийн 6, чиглэлийн 8, нийт 14 яам, Ерөнхий сайд, Шадар сайд, Засгийн газрын Хэрэг эрхлэх газрын дарга болон асуудал эрхэлсэн нийт 17 гишүүнтэй, Ерөнхий сайд, Шадар сайд, Засгийн газрын Хэрэг эрхлэх газрын дарга болон асуудал эрхэлсэн нийт 17 сайдтайгаар ажиллахаар болж байна.
Өөрөөр хэлбэл, Соёлын яамны бүтэц бүрэлдэхүүнийг шинээр оруулж ирснийг эс тооцвол 2016-2020 онд ажилласан Засгийн газар хуучин бүтцээ хадгалсан гэсэн үг. Ерөнхий сайд У.Хүрэлсүх чуулганы нэгдсэн хуралдааны үеэр онцолсон байдаг. "УИХ-ын сонгуулиар ард түмэн тогтвортой байдлыг хүссэн. Сандал ширээ зөөгөөд байх шаардлагагүй.
Нэг Засгийн газар байгуулах гэж олон яамыг татан буулгаж, томоохон төсөл хөтөлбөрийг гацааж болохгүй.
Улсын Ерөнхий сайдын хувьд Засгийн газраа тогтвортой ажиллуулна" гэж. Гагцхүү Ерөнхий сайдын үг биеллээ олж, төрийн залгамж халаагаа хэрхэн хадгалж явах нь, шинээр тодрох сайд нарын ирэх дөрвөн жилд баримтлах бодлогоос шууд хамаарахаар болж байна. УИХ-ын дарга, Ерөнхий сайд, Бүлгийн дарга нараа улираан томилсон жишгийг дагавал төрийн алба харьцангуй тогтвортой ажиллах нь.
Г.Эрхэс
Сэтгэгдэл (3)