БАРИМТ 1
Бүгд Найрамдах Сингапур Улс (улсын албан ёсны нэр) нь зүүн өмнөд Азийн нутагт оршдог арлын орон. Улсын нийт газар нутаг нь нэг үндсэн том арал болон 64 жижиг арлаас бүрддэг 733 хавтгай дөрвөлжин километр. Энэхүү хэмжээгээрээ Сингапур улс нь дэлхийд 176 дугаарт жагсдаг.
БАРИМТ 2
Хүн амын тоо нь 5,5 сая бөгөөд 75.9 хувь нь хятад, 15 хувь нь малайз, 7.5 хувь нь энэтхэг үндэстнээс тус тус бүрддэг. Ийнхүү олон төрлийн үндэс угсааны иргэдтэй тул Сингапур улс нь Малайз, Тамил (Энэтхэг улсад ашиглагддаг хэл), Хятад, болон Англи хэлийг улсынхаа албан ёсны хэлээр сонгосон.
БАРИМТ 3
Сингапур улс нь парламентын засаглалтай ард иргэдийнхээ боловсрол, эрүүл мэнд, аюулгүй байдал, орон байраар хангагдсан байх, амьдралын чанар гэх мэт үзэл баримтлалуудыг чухалчлан үздэг. Мөн тус улс нь жижиг хэмжээний газар нутаг дээр олон тооны хүн ам амьдардаг тул хүн амын нягтаршлаараа дэлхийд хоёрдугаар байранд жагсдаг.
БАРИМТ 4
Хэдийгээр газар нутаг багатай ч 1965 оны наймдугаар сарын 9-нд Малайз улсаас салж тусгаар тогтнолоо зарласнаас хойш Сингапур улс далайн эргийн бүсийн хуурай газрыг нөхөн сэргээх төслийг хэрэгжүүлж эхэлснээр өнөөдрийн байдлаар тус улсын газар нутгийн хэмжээ нь 25 хувиар ихсээд байна.
БАРИМТ 5
1905 оноос хойш улсынхаа цагийн бүсийг нийт найман удаа сольсон. Мэргэжилтнүүдийн үздэгээр Сингапур улсын оршдог цагийн бүс нь 7.5 бөгөөд 7 болон 8 дугаар цагийн бүсүүдийн алинд нь ч хамаарагдах боломжтой. Одоогийн байдлаар 8 дугаар бүсэд буюу манай улстай нэг цагийн бүсэд оршдог. Тийм учраас Монгол болон Сингапур улсуудын хооронд ямар ч цагийн зөрүү байхгүй.
БАРИМТ 6
Орчин үеийн Сингапур улс нь 1819 онд Британийн Эзэнт Гүрний худалдааны цэгээр анх байгуулагдаж байсан бөгөөд 1867 онд Британийн удирдлага доор албан ёсоор орсон. Харин 1942 онд дэлхийн II дайны үеэр Япон улсаар гурван жил захируулсны дараа 1945 онд буцаад Британийн захиргаанд орсон. Уг цаг үеэс хойш 1959 онд бие даасан засаглалтай болж 1963 онд Малайз улсын нэг мужийн хувиар орших болсон. Гэвч хоёр жилийн дараа 1965 онд тусгаар тогтнолоо зарлаж өнөөдрийн бидний мэдэх Сингапур улс үүссэн түүхтэй. Сонирхуулахад Малайз улсаас тусгаар тогтнолоо зарлахын тулд Сингапурчууд байлдаагүй бөгөөд Малайзчууд өөрсдөө санал хураан Сингапурыг өөрсдийн улсаасаа хөөсөн.
БАРИМТ 7
Сингапур улс нь дэлхийн хамгийн хурдан интернеттэй, хамгийн өндөр дундаж наслалттай (дунджаар 83.8 жил) гэх мэт амжилтуудаараа дэлхийд тэргүүлэх улсуудын тоонд эрэмбэлэгддэг. Мөн хүүхдэд маш ээлтэй улс бөгөөд бага насны хүүхдийн нас баралтын хувиараа дэлхийд маш доогуур жагсдаг.
БАРИМТ 8
Хүний хөгжлийн индексээрээ дэлхийд есдүгээрт, нэг хүнд ноогдох дотоодын нийт бүтээгдэхүүнээрээ дэлхийд хоёрдугаарт бичигддэг маш өндөр хөгжилтэй тус улс нь Азийн дөрвөн барсын (Тайвань, Өмнөд Солонгос, Сингапур, Хонконг) нэгээр нэрлэгддэг. Мөн Сингапур нь 2013 оноос хойш амьдрахад хамгийн өндөр өртөгтэй хотоор нэрлэгдсээр байгаа.
БАРИМТ 9
Сингапур улсад 1994 онд нээлтээ хийсэн нийт 1,000 гаруй амьтантай дэлхийн анхны шөнийн амьтны хүрээлэн байдаг. Амьтны хүрээлэнг тойрох хөтөчтэй аялал нь ойролцоогоор 40 минут үргэлжилдэг ба зэрлэг байгаль дундуур аялагчдыг алхуулан амьтдыг улам ойроос ажиглах боломжийг олгодог.
БАРИМТ 10
Дэлхий нийтээрээ Сингапурыг бие даасан улс гэдгээс нь гадна хот хэмээн авч үздэг. Сингапур хот нь дэлхийн хамгийн ногоон хотуудын нэг бөгөөд 700 гаруй хавтгай дөрвөлжин километр газар нутаг ногоон ургамлаар бүрхэгдсэн байдаг. Энэ нь улсын нийт газар нутгийн хэмжээтэй бараг л тэнцүү байгаа биз. Мөн тус улс ойролцоогоор 2,100 төрөлх ургамалтай. Үүнээс гадна жил бүрийн арван нэгдүгээр сарын 7-ны өдрийг үндэсний мод тарих баяр болгон тэмдэглэж иргэн бүр мод тарьдаг.
БАРИМТ 11
Та магадгүй Сингапур улсын бэлэг тэмдэг болсон Мерлион хэмээх амнаас нь ус гардаг арслангийн толгой загасан биетэй хөшөөг урьд өмнө нь харж байсан байх. Энэхүү хөшөө нь санскрит хэлэнд Сингапур гэх үг “Арслангийн хот” хэмээн орчуулагддагтай холбоотой. Харин яагаад загасан биетэй бүтээснийг тайлбарлавал Сингапур улсын газар нутагт арслангийн төрөл зүйл хэзээ ч амьдарч байсан гэх нотолгоо байдаггүй тул загасан биеийг арслангийн толгойтой хослуулсан.
БАРИМТ 12
Ард иргэдийн 31.1 хувь нь буддын, 18.8 хувь нь христийн, 15.6 хувь нь исламын шашинтай бол 20 хувь нь ямар нэгэн шашин шүтдэггүй. Энэхүү олон төрлийн шашинг иргэд нь тэнцүү хуваагдан шүтдэг үзүүлэлт нь ард иргэд нь олон төрлийн үндэс угсаатай хүмүүс байдагтай шууд холбоотой.
БАРИМТ 13
Хэрэв та Сингапур улсад очвол бохь зажилж болохгүй. Учир нь уг үйлдэл нь хуулийн дагуу хориотой бөгөөд зөвхөн эмчилгээний зориулалтаар бохийг ашигладаг. 1992 оноос хойш бохь зажлахыг ард иргэддээ хориглосон бөгөөд зөвхөн эмч болон эмийн сангаас тусгай зөвшөөрлийн дагуу бохь худалдан авах боломжтой. Учир нь хэсэг бүлэг хүмүүс бохийг нийтийн тээврийн мэдрэгч дээр нааж их хэмжээний хохирол учруулж мөн олон нийтийн газарт бохийг хамаагүй нааж мөн хаясаар байсан тул энэхүү шийдвэрийг гаргасан байдаг.
БАРИМТ 14
Сингапур улсад шинээр баригдаж буй барилгын хамгийн дээд хэмжээ гэж заасан хэмжүүр байдаг. Тэр нь 280 метр. Харин тус улсын хамгийн өндөр барилгын хувьд 290 метр өндөртэй бөгөөд энэхүү барилгыг барих явцдаа засгийн газраас нэмэлт 10 метрийн тусгай зөвшөөрлийг авч байжээ. Нэгэнт заагдсан өндрийн хязгаар өөрчлөгдөхгүй л бол Гуоко Товер Сингапур улсын хамгийн өндөр барилга хэвээр үүрд үлдэх бизээ.
БАРИМТ 15
Хэдийгээр Сингапур улсын албан ёсны дөрвөн хэлний нэг нь англи хэл боловч та уг улсад англи хэлээр амархан ойлголцож чадахгүй. Учир нь тэд “Синглиш” гэх бусад хэлнүүдийн онцлогийг агуулсан англи хэлээр ярьцгаадаг. Хэлний бүтцийн хувьд бидний мэдэх англи хэлтэй яг адилхан боловч хүмүүс нь ярих үедээ бидний урьд өмнө нь сонсож байгаагүй үг хэллэгүүдийг ихээр ашигладаг. Оксфордын толь бичигт 30 гаран синглиш хэлний үгс албан ёсоор бүртгэгдсэн.
БАРИМТ 16
Сингапурчууд хотын гудмаар хамгийн хурдан алхаж замын хөдөлгөөнд оролцдог ард түмэн. Явган зорчигчдын алхах хурд нь цагт 6.15 километр. Мөн Сингапур улс нь дэлхийг хамарсан бизнес эрхлэхэд Шинэ Зеланд улсын араас жагсах хамгийн тохиромжтой улс юм. \
БАРИМТ 17
Тус улсын албан ёсны мөнгөн тэмдэгтийг “Сингапур Доллар” гэдэг бөгөөд одоогийн байдлаар 1.35 сингапур доллар нэг ам.доллартай тэнцэж байна. Энэ нь америк долларын ханштай бараг л тэнцүү байгаа гэсэн үг юм. Мөн Сингапур улсад нийтийн нойлд бие зассаныхаа дараа усаа татахгүй бол тус иргэнийг 150 сингапур доллараар торгох хуулийн заалт байдаг.
БАРИМТ 18
Сингапур улс нь Ази тивийн хамгийн бага авилгатай улс бөгөөд энэ үзүүлэлтээрээ дэлхийд тавдугаарт ордог. Мөн Засгийн газраас иргэдийг хувийн тээврийн хэрэгсэл эзэмшихгүй байхыг зөвлөдөг бөгөөд хувьдаа машин эзэмшдэг иргэд тус машины үнээс 1.5 дахин ихийг төлж байж машиныхаа гэрчилгээг авдаг. Нийтийн тээвэр өндөр түвшинд хөгжсөн тул ирэг тэр бүр машин эзэмшээд байхыг эрмэлздэггүй.
БАРИМТ 19
Эрэгтэйчүүд 18 нас хүрэнгүүтээ аль эсвэл ахлах сургуулиа төгссөнийхөө дараа хоёр жилийн хугацаатай цэргийн албыг дүүргэх шаардлагатай. Үүнээс гадна цэргийн алба хаагчид 40 нас хүртлээ жил бүр цэргийн бэлтгэлд хамрагддаг.
БАРИМТ 20
Зургаан хүн тутмын нэг нь нэг сая америк доллартай тэнцэх хэмжээний хөрөнгөтэй. Энэ нь дэлхийн хаана ч байхгүй өндөр үзүүлэлт юм. Мөн өдөр бүр Сингапур улсад хоёр шинэ ресторан үүд хаалгаа нээдэг бөгөөд энэхүү үзүүлэлт нь тус бага газар нутагт амьдардаг хүмүүсийн хувьд нэлээд өндөр үзүүлэлт.
БАРИМТ 21
Тус улсын төрийн далбаа нь хэвтээ шулуунаар хоёр тэнцүү хэсэгт хуваагдсан байдаг. Доод хэсгийг цагаан өнгө харин дээд хэсгийг улаан өнгө бүрдүүлэг. Далбааны дээд буланд байрлах цагаан өнгийн хавирган сар нь өсөн дэвжиж буй залуу үндэстэн, түүний хажууд барилах таван ширхэг цагаан однууд Сингапурын ардчилал, амар амгалан, ахиц дэвшил, шударга ёс, эрх тэгш байдлуудыг тус тус бэлгэддэг. Цагаан өнгө нь мөнхийн цэвэр ариун байдлын бэлгэдэл бол улаан өнгө нь хүмүүсийн тэгш байдал болон олон нийтийн эерэг харилцааны бэлгэдэл.
БАРИМТ 22
Та Сингапур улсын гудамжинд хог хаявал 300 хүртэл сингапур долларын торгууль төлж хаясан хогийнхоо хэмжээгээр ногоон өнгийн бээлий хантааз өмсөн олон нийтийн ажилд дайчлагдан гудамж цэвэрлэнэ. Энэхүү арга хэмжээ нь иргэдийг олон нийтийн өмнө ичгүүртэй байдалд оруулан хийсэн хэрэгтээ гэмшихэд нь тусалдаг гэж үздэг.
БАРИМТ 23
Сингапур улсын хэрхэн баян болсон тухай товч тайлбар хүргэхэд дэвшилтэт технологийн дэд бүтэц, ур чадвартай хөдөлмөрч ажиллах хүчнүүд, цагаачдад зориулсан уян хатан хууль, шинэ бизнесүүдийг дэмжих бодлого зэрэг хамгийн их нөлөө үзүүлсэн. Мөн эдгээрээс гадна шударга улсынхаа төлөө бүхнээ зориулдаг удирдагчдыг нь мартаж болохгүй.
БАРИМТ 24
Сингапур улсад бүртгэгдэж байсан хамгийн хүйтэн температур нь Цельсийн нэмэх 19.4 хэм юм. Харин тус улс нь жил бүр цагаан сарын баярыг бусад хөрш зэргэлдээх улсуудын адилаар тэмдэглэдэг бөгөөд ихэнх иргэд нь Хятад угсааны хүмүүс байдаг тул баярын бүх зүйл нь Хятадын шинэ жилтэй адилхан гэж хэлж болно.
