БАРИМТ 1
Исланд улс нь 102,775 хавтгай дөрвөлжин километр (дэлхийд 106-аар байранд) газар нутагтай ба Атлантын далайн хойд хэсэгт байрладаг Европ тивийн орон. Тус улсын нийслэл нь Рейкьявик ба уг хот болон ойр орчмын нутгаар нь Исланд улсын хүн амын 65 хувь нь амьдардаг. Исланд улс бол Дундад Атлантын нурууны далайн түвшнээс дээш өргөгдсөн өчүүхэн хэсэг нь.
БАРИМТ 2
Исланд улс нь арлын орон бөгөөд Персийн булангийн урсгалын ачаар дулаанаа хадгалдаг. Гэхдээ тус улсын ихэнх бүс нутаг туйлын хүйтэн уур амьсгалтай. Исланд улсад хамгийн анх манай эриний 874 онд хүн төрөлхтөн суурьшсан ба Норвеги улсын цэргийн ахлагч Инголфр Арнарсон тус арлын хамгийн анхны оршин суугч байсан.
БАРИМТ 3
Улмаар Норвеги болон зарим Скандинавын орны иргэд Исланд улсыг зорьж очин тэнд амьдрах болсон. Тус арал нь дэлхийн хамгийн анхны хууль тогтоох чуулгануудын нэг болох Альтинг гэх парламентын дэргэд бие даасан хамтын нөхөрлөлийн орны хувиар оршин тогтнож байсан. Гэхдээ 13-аар зуунд Норвеги улс уг арал дээр өөрсдийн ноёрхлоо тогтоосон.
БАРИМТ 4
Швед, Норвеги, Дани улсууд 1397 онд Калмар холбоог байгуулан нэгдэх үед Исланд ч мөн адил тус холбооны нэг хэсэг болов. Гэвч 1523 онд Швед улс уг холбооноос гарснаас хойш Исланд улс Данийн хаант улсын мэдэлд орсон. Францын хувьсгал болон Наполеоны дайны дараа Исландын тусгаар тогтнох хөдөлгөөн эхэлж исландчууд 1918 онд Исландын вант улсыг байгуулсан.
БАРИМТ 5
Улмаар дэлхийн хоёрдугаар дайны үеэр Дани улсын нөхцөл байдал хүнд байдалд орох үеэр Исланд улсын дийлэнх иргэд санал нэгдэж эх орноо бүгд найрамдах улс болгосон. Ингэснээр Дани улсын хаан Исланд улсад ямар ч эрх мэдэлгүй болж тэдний холбоо тасарсан. Хэдийгээр 1799-1845 оны хооронд тасалдсан ч дэлхийн хамгийн эртний болон удаан хугацаанд үргэлжилж буй парламент бол Исланд улсынх.
БАРИМТ 6
20-аар зуун хүртэл Исланд улсын эдийн засаг ихэвчлэн загас агнуур болон хөдөө аж ахуйн салбарууд дээр тогтдог байсан. Дэлхийн хоёрдугаар дайны дараа Исланд улсын загас агнах талбай нь 6.5 километрээс 320 километр болтлоо уртассанаар загас агнуурын аж ахуй цэцэглэн хөгжсөнөөр Исланд улс дэлхийн хамгийн баян улсуудын нэг болсон. Тэд 1994 онд гэхэд Европын эдийн засгийн төв цэг болсон бөгөөд биотехнологи, санхүү болон аж үйлдвэрлэлийн салбарууд хожим өндөр түвшинд хөгжсөн.
БАРИМТ 7
Исланд улс Эдийн засгийн хамтын ажиллагаа, хөгжлийн байгууллагын гишүүдийг бодвол хамаагүй бага татвартай бөгөөд дэлхийн хамгийн өндөр үйлдвэрчний эвлэлийн гишүүн. Хойд Европын орнуудын адилаар Исланд улс иргэддээ өндөр түвшний боловсрол олгодог бөгөөд чанартай эрүүл мэндийн үйлчилгээ үзүүлдэг.
БАРИМТ 8
Исланд улс насанд хүрсэн хувь иргэний дундаж хөрөнгийн хэмжээгээрээ дэлхийд гуравдугаар байранд жагсдаг. 2020 онд тэд хүний хөгжлийн индексээрээ дэлхийд дөрөвдүгээр байранд бичигдсэн бол энх тайвны индексээрээ дэлхийд тэргүүлсэн. Мөн Исланд улсын ашигладаг бараг бүх цахилгаанаа сэргээгдэх эрчим хүчнээс гаргаж авдаг.
БАРИМТ 9
Исланд улсын нийт хүн ам нь 2020 оны байдлаар 371,580 байсан ба тэдний 75 хувь нь христийн шашныг шүтдэг бол 20 гаруй хувь нь шашин шүтлэггүй. Уг улсын маш цөөн хүн амын 90 гаруй хувь нь уугуул исланд үндэстнүүд байдаг бол 5 гаруй хувийг нь польш хүмүүс бүрдүүлдэг. Тэдний албан ёсны хэл нь исланд хэл.
БАРИМТ 10
Исланд улсын соёл бол ерөнхийдөө бусад Скандинавын орнуудынхтай адилхан. Мөн тус улс нь НАТО-гийн гишүүн орон бөгөд уг холбооныхоо хамгийн бага хүн амтай улс юм. Исланд улс НАТО-гийн гишүүн боловч тэдэнд ямар нэгэн албан ёсны зэвсэгт хүчин гэж байхгүй. Исланд улсад зөвхөн тоотой хэдэн далайн эргийн хамгаалагчид л байдаг.
БАРИМТ 11
Гренландыг исландчууд 986 онд колоничлож байсан боловч хожим Дани улсад алдсан. 18-аар зууны сүүлчээр Исланд улсын хүн амын 20-25 хувь нь АНУ болон Канад улсууд руу эх орон нь өлсгөлөнд нэрвэгдсэний улмаас цагаачилсан. Хэрэв уг явдал тохиолдоогүй бол өнөөдрийн Исланд улсын хүн ам хамаагүй их байх байсан биз.
БАРИМТ 12
Өмнө нь хэлсэнчлэн Исланд улс бол парламентын засаглалтай. Тус улсын ерөнхийлөгчийг нь Гвюдни Йоуханнессон гэдэг ба 2016 онд сонгуульд ялж анх ерөнхийлөгчийн албанд томилогдож 2020 онд сонгуульд ялснаар дахин дөрвөн жилийн турш уг албыг хашихаар болсон. Харин ерөнхий сайдыг нь Катрин Якобсдоуттир гэдэг.
БАРИМТ 13
Газар нутаг дээр нь хамгийн сүүлд хүний мөр гарсан Европын орон бол Исланд. Тэд газар нутаг болон хүн төрөлхтний суурьшлын хувьд дэлхийн хамгийн залуу улс юм. Исланд улсын зүүн хэсгээр хамгийн том ой модод, үржил шимт тариалангийн талбай, байгалийн боомтууд, загас агнуурын тосгонууд байдаг. Харин урд хэсгээр нь жуулчдын хамгийн ихээр цугладаг газрууд оршдог.
БАРИМТ 14
Исланд улсын баруун хэсэг нь байгалийн олон өөр шинж чанаруудыг өөртөө агуулдаг бөгөөд дэлхийн хамгийн их газар доороос оргилох рашааны төвлөрсөн цэг ба алдарт Снайфедльсйёкюдль мөсөн гол тус бүсэд харьяалагддаг. Мөн тус улсын баруун хойд хэсгийн Вестфьордс гэх бүс нутгийг хүн төрөлхтөн гүйцэд судлаагүй бөгөөд онгон дагшинаараа хадгалагдан үлдсэн.
БАРИМТ 15
Уг улсын Хусавик гэх жижиг хот нь Европ тивийн халим ажиглагчдын нийслэл хот гэгддэг. Исланд улс галт уулын идэвхтэй бүсэд байрлалтай тул тус улсын газар нутгийн 30 хувь нь хайлмаг дээр оршдог. Тус халуун хайлмагтай хэсгээс олдсон байгалийн олон үзэсгэлэнт газрууд байдгийн нэг нь “Цэнхэр нуур” гэх халуун рашаан юм.
БАРИМТ 16
Исланд улсын Ватнайёкулл гэх мөсөн бүрхүүл Европ тивдээ хамгийн том нь. Яг үнэндээ Европ тивийн бүх мөсөн голуудыг нийлүүлсэн ч уг голын хэмжээнд хүрэхгүй. Ватнайёкулл гол Исланд улсын нийт газар нутгийн 8 хувийг бүрхдэг. Мөн Исланд улсад таван жил тутамд дор хаяж нэг удаа галт уул дэлбэрдэг.
БАРИМТ 17
18-аар зуунд Исланд улс өлсгөлөнд нэрвэгдэн тухай дурдсан. Тэгвэл уг хямрал нь 1783-1784 онд дэлбэрсэн Лаки гэх галт уулын дэлбэрэлтээс болж үүссэн. Уг өлсгөлөнгөөс болж Исланд улсын хүн амын дөрөвний нэг нь нас барж тэдэнтэй тэнцэх хэмжээний хүмүүс гадаадын орнууд руу цагаачилсан. Одоогийн байдлаар Исланд улсад 30-40 идэвхтэй галт уул байна.
БАРИМТ 18
Өнөөдрийн Исландчууд бол эртний норвегийн викингчүүдийн үр удам. Исланд улсын сургуулиудад исланд хэлнээс гадна англи болон дани хэлнүүдийн хөтөлбөр байдаг. 6-16 насны бүх хүүхдүүд сургуульд суралцах үүрэгтэй бөгөөд бүх улсын сургуулиуд христийн шашны тухай хичээл заах ёстой. Мөн тус улсад хүүхдүүд гэрээрээ боловсрол эзэмших боломжтой.
БАРИМТ 19
Исланд улс бол эмэгтэй хүмүүс амьдрахад хамгийн тохиромжтой гурван улсын нэг. Тэд ижил хүйстнүүдийн гэрлэлтийг хүлээн зөвшөөрсөн дэлхийн анхны улсуудын нэг билээ. Исландчууд бол маш хөдөлмөрч ард түмэн. Тэдний долоо хоногт ажилладаг дундаж цаг нь дэлхийн дунджаас хамаагүй их. Мөн Исланд улсад анх удаа бүртгэгдэж буй нэрийг хүүхдэдээ өгөхийг хүсвэл заавал Исландын нэр олгох хорооноос зөвшөөрөл авах ёстой.
БАРИМТ 20
Исланд улс гэмт хэргийн тохиолдол маш багатай бөгөөд цагдаа нар нь буу хэрэглэдэггүй. Исландчууд жилд дунджаар таван киног кино театрт үздэг бөгөөд уг үзүүлэлтээрээ дэлхийн бүх улсын иргэдийг тэргүүлдэг. Исланд улсын ихэнх уламжлалт хоолнуудын орцод загас багтдаг бөгөөд тэд монголчуудын адилаар хонины хуйхалсан толгойг иддэг.
БАРИМТ 21
Исланд улсад хамгийн алдартай спортууд бол хөлбөмбөг болон гандбол. Исландын үндэсний хөлбөмбөгийн шигшээ баг нь 2016 оны ЕАШТ-д анх удаа оролцож гайхалтай тоглолтуудаараа шуугиан тарьж дэлхий нийтийн анхаарлын төвд орж байсан. Тэд тус тэмцээний аваргууд болох Португалийн шигшээ багтай хэсгийн шатандаа тэнцэж шөвгийн 16-ын шатанд Английн шигшээ багийг буулгаж авсан. Мөн тэд 2018 оны ДАШТ-д оролцсон.
БАРИМТ 22
Исланд улсын төрийн далбаа нь Скандинавын орнуудын далбаатай адил загвартай бөгөөд цэнхэр, цагаан, улаан өнгөнүүдээс бүрддэг. Цагаан өнгө нь мөсөн голууд болон цасыг, цэнхэр өнгө нь өндөр уулсыг, улаан өнгө нь галт уулс болон христийн шашныг тус тус бэлгэддэг. Мөн загалмайн дүрс нь христийн шашныг илтгэдэг.
БАРИМТ 23
Исланд улсын хүн амын 80 гаруй хувь нь одоог хүртэл эльфүүд байдаг гэдэгт итгэдэг. Исландчууд өглөөний цайндаа ихэвчлэн жимс, бин, овьёос, кофе зэргийг хэрэглэдэг бол өдрийн болон оройн хоолондоо загас, хурганы махтай хоолыг зооглодог. Мөн Исланд улс бол дэлхий дээрх халимын мах идэх боломжтой цөөн орнуудын нэг юм. Гэхдээ уг ховор амьтдын махыг исландчуудаас илүүтэйгээр жуулчид хэрэглэдэг.
БАРИМТ 24
Исланд улсын газар нутгийн уугуул цор ганц хөхтөн амьтан бол арктикийн үнэг. Эдгээр амьтад нь маш тэсвэр тэвчээртэй ба хоол хүнс хайж мах хол замыг туулдаг. Харин викингчүүд ямаа, хонь, тахиа, морь, туулай зэрэг амьтдыг Исланд улсад анх нутагшуулсан. Мөн тус улсад шавжны төрөл зүйлс маш ховор бөгөөд ямар ч шумуул байхгүй.
