БАРИМТ 1
Мьянмарын Холбооны Бүгд Найрамдах улс нь (Хуучнаар Бурма) 676,578 хавтгай дөрвөлжин километр газар нутагтай ба Ази тивийн зүүн өмнөд талын эх газарт байрладаг. Бүс нутгийнхаа эх газрын хамгийн том газар нуагтай бөгөөд Бангладеш (баруун хойд), Энэтхэг (баруун хойд), Хятад (зүүн хойд), Лаос (зүүн, зүүн урд), Тайланд (зүүн, зүүн урд) улсуудтай тус тус хиллэдэг.
БАРИМТ 2
Мьянмар улс баруун болон баруун урд талаараа Энэтхэгийн далайд гарцтай ба улсын нийслэлийг нь Нейпьидо гэдэг. Харин хамгийн том хот нь Янгон ба 7 сая хүн амтай. Улсын албан ёсны хэл нь бирм хэл бөгөөд бүс нутгаасаа хамааран мьянмарчууд хэд хэдэн өөр хэлнүүдийг ашигладаг.
БАРИМТ 3
Мьянмар улсын нийт хүн амын тоо нь 54 сая гаруй бөгөөд тэдний 70 хувийг нь бамар, 9 хувийг нь шан, 7 хувийг нь карен үндэстнүүд бүрдүүлдэг. Улсын албан ёсны шашин нь буддын шашин ба ард иргэдийн 88 хувь нь уг шашныг шүтдэг. Мөн Мьянмар улс АНУ-ын адилаар аливаа зүйлсийн жин болон өндрийг хэмжихдээ инч, паунд гэх хэмжигдэхүүнүүдийг ашигладаг.
БАРИМТ 4
Мьянмар улсын газар нутаг дээр оршиж байсан Таунгоо гүрний дахин нэгдсэн улс 16-аар зууны үед Зүүн Өмнөд Азийн хамгийн том эзэнт гүрэн байсан. Гэвч 19-ээр зуунд Мьянмар улсад өрнөсөн гурван дайны дараа тус улсыг Япон улс хэсэг хугацаанд удирдаж байсан боловч Их Британи өөрсдийн ноёрхлоо тогтоосон.
БАРИМТ 5
Мьянмарчууд 1948 онд өөрсдийн улсаа байгуулж тусгаар тогтнолоо зарласан. Гэхдээ 1962 оны төрийн эргэлтээс болж Бирмийн Социалист хөтөлбөрийн нам төрийн эрхийг барьж цэргийн диктатурт дэглэмийг Мьянмар улсад нэвтрүүлсэн. Мөн тэдний тусгаар тогтнолоо олж авсан 1948 оноос хойш Мьянмар улсад иргэний дайн өрнөсөөр байгаа. Энэ нь дэлхий дээр хамгийн удаан өрнөж буй иргэний дайнуудын нэг юм.
БАРИМТ 6
Мьянмар улсад хүний эрх маш ихээр зөрчигддөг ба НҮБ-ын хуралдааны үеэр хэд хэдэн удаа уг асуудал хөндөгдөж байсан. 2010 оны үндсэн сонгуулийн дараа Мьянмарын цэргийн бүлэглэлүүд төрийн эрхийг алдсан ба тухайн цагаас хойш Мьянмар улсын гадаад харилцаа болон хүний эрхийн асуудлууд тогтворжиж эдийн засаг нь өсөж эхэлсэн.
БАРИМТ 7
Гэвч 2020 оны сонгуулийн дараа Аун Сан Су Чигийн нам илт давуу ялалт байгуулсан боловч 2021 онд цэргийн хүчин дахин төрийн эргэлт хийж улсыг удирдах эрхийг дахин өөрсдийн гарт шилжүүлсэн. Үүний улмаас тус улсын иргэд олныг хамарсан жагсаалыг зохион байгуулж эсэргүүцлээ илэрхийлсэн боловч зэвсэгт хүчин нь тэдний эсрэг гал нээсэн.
БАРИМТ 8
Мьянмар улс нь Их Британийн нэг хэсэг байсан боловч одоогийн Хамтын Нөхөрлөлийн орнуудын нэг биш юм. Мьянмар улсын дахин сэргээгдэх эрчим хүчний нөөц нь бүс нутгийнхаа бусад улсуудынхаас хамаагүй их. Мөн тус улс нь их хэмжээний хаш, эрдэнийн чулуу, газрын тос, байгалийн хий гэх зэрэг байгалийн баялагтай.
БАРИМТ 9
Мьянмар улсын эдийн засгийн ихэнх хэсэг нь цэргийн дэглэмт засгийн газрыг дэмжигчидтэй шууд холбоотой. Тэд хүний хөгжлийн индексээрээ дэлхийн 189 орноос 147-аар байранд жагсдаг ба нэг хүнд оногдох дотоодын нийт бүтээгдэхүүнийхээ хэмжээгээр 160-аар байранд бичигддэг.
БАРИМТ 10
Британичууд 1824-1948 оны хооронд Мьянмарыг удирдаж байхдаа хүн амын 70 гаруй хувийг бүрдүүлдэг бамар үндэстний нэрнээс санаа авч Бурма гэж нэрлэсэн. Гэхдээ мьянмарчууд 1989 онд улсынхаа нэрийг Мьянмар болгон сольсон. Мөн дан ганц улсынхаа нэрнээс гадна хамгийн том хот Рангүүний нэрийг Янгон болгож өөрчилсөн.
БАРИМТ 11
Мьянмар улс дах хамгийн том баяруудын нэг бол “Тингян”. Дөрвөн сард болдог Мьянмарын шинэ жилийн үеэр олон мянган хүмүүс гудамжинд гарч усаар байлддаг. Уг баяр нь Мьянмарын түүх соёлын салшгүй нэг хэсэг тул тус улсаар аялахаар төлөвлөж буй хүмүүст дөрөвдүгээр сар хамгийн тохиромжтой.
БАРИМТ 12
Мьянмарын үндэсний хувцсыг “Лонги” гэдэг. 2 гаруй метрийн урттай уг хувцсыг хүмүүс хүйс хамаарахгүйгээр биеийнхээ бэлхүүснээс доош хэсгийг ороож хэрэглэдэг. Эрчүүд хувцасныхаа зангилааг гадна талд нь гаргах боломжтой байдаг бол эмэгтэйчүүд лонгигийн зангилааг үргэлж дотогшоо хийх ёстой. Мөн мьянмарчууд уг хувцсыг ямар ч төрлийн баяр ёслол болон өдөр тутмын амьдралдаа өмсөж хэрэглэдэг.
БАРИМТ 13
Мьянмарчууд аливаа зүйлсийг гараараа бус толгой дээрээ тавьж зөөхийг илүүд үздэг. Ихэвчлэн мьянмар эмэгтэйчүүд хоол хүнсний бүтээгдэхүүнүүдийг гараа ашиглахгүйгээр толгой дээрээ зөөдөг ба уг дүр зургийг анх харсан гадаадын жуулчид нэлээд ихээр гайхдаг. 2005 оны аравдугаар сард Янгон хот тус улсын нийслэл байсан боловч засгийн газар нь шинэ нийслэлийг нууцаар барьж оройн цагаар нийслэл хотоо сольсон.
БАРИМТ 14
Мьянмарчууд нэгнийхээ анхаарлыг татахын тулд бусад орны хүмүүсийн адилаар гараараа далладаггүй. Тэд аливаа зүйлийг үнэсэж буй мэт чимээг гаргаж нэгнийхээ анхаарлыг татдаг. Тиймээс та тус улсын ямар нэгэн ресторанд зөөгчийг дуудахын тулд гараараа даллахын оронд юм үнэсэж буй чимээг 2-3 удаа гаргахад л болно.
БАРИМТ 15
Их Британийн колон улс байсан тул Мьянмар улсад машинууд замын зүүн талыг барин замын хөдөлгөөнд оролцдог. Харин дэлхийн бусад ихэнх орнууд баруун талын дүрмийг баримталдаг. Дэлхийн хоёрдугаар дайны үеэр Мьянмар улсын газар нутаг маш ашигтай байсан тул Япон улс Их Британийн эсрэг байлдахын тулд тус улсыг эзлэн авсан.
БАРИМТ 16
Мьянмар улсыг дэлхий нийтэд таниулсан гол зүйлсийн нэг бол яах аргагүй буддын шашны хийдүүд. Баган дахь эртний хотод л гэхэд 14-ээр зууны 20,000 гаруй хийд байдаг. Уг хот нь дэлхий дээрх хамгийн олон шашны шүтлэг бишрэлтэй холбоотой газруудтай хот юм. Мөн тус улсын үзэсгэлэнт далайн эргүүд жуулчдын дунд алдартай.
БАРИМТ 17
Мьянмар улсын үндэсний спортууд нь летвей, бандо, баншай, понги-тхайн гэх мэт тулааны урлагууд болон чинлоне гэх бидний мэдэх тэвэгтэй төстэй спорт юм. Чинхолег нийт зургаан хүн баг болон тоглодог. Мөн Мьянмар улс 2013 оны Зүүн Өмнөд Азийн спортын наадмыг зохион байгуулж байсан удаатай.
БАРИМТ 18
Харин тус улсад хамгийн алдартай спорт бол хөлбөмбөг. Мьянмарын үндэсний хөлбөмбөгийн холбоо 1947 онд байгуулагдаж 1952 онд Олон улсын хөлбөмөбгийн холбоонд элсэн орсон. Гэхдээ тус улсын үндэсний шигшээ баг өнөөдрийг хүртэл тив дэлхийн тавцанд дурдахуйц өндөр амжилт үзүүлээгүй явна. Мөн Мьянмарын баг тамирчид олимпын наадмаас нэг ч медаль хүртэж үзээгүй.
БАРИМТ 19
Мьянмар улсын төрийн далбаа нь шар, бүдэг ногоон, улаан өнгөнүүдээс бүрддэг ба төв хэсэгтээ цагаан өнгийн таван хошууг багтаадаг. Улаан өнгө нь хүч чадал болон эр зоригийг, шар өнгө нь хүмүүсийн эв нэгдлийг, бүдэ ногоон өнгө нь энх тайвныг тус тус бэлгэддэг. Харин эдгээр өнгөнүүд нь нийлээд амар амгалан, шийдэмгий байдлыг илтгэдэг.
БАРИМТ 20
Мьянмар улсын байгалийн арвин баялгийн тухай хальт дурдсан. Тэгвэл дэлхийн бадмааргийн хэрэглээний 90 хувийг нь Мьянмар улс дангаараа хангадаг. Тус улсын хүн ам ойролцоогоор 135 өөр үндэстэн, ястнуудаас бүрддэг. Тэднийг та хувцас, хэл, хоол хүнс гэх зэрэг тодорхой хүчин зүйлүүдээр нь ангилж болно.
БАРИМТ 21
Мьянмар улсад 500,000 гаруй лам амьдардаг. Энэ олон тооны лам нарын дунд эмэгтэй лам нар ч багтдаг гэнэ. Тэдгээр нь ягаан өнгийн дээл өмсдөг ба эрэгтэй лам нартай адил үүрэгтэй байдаг юм байна. Дэлхийн өөр өнцөг буланд эмэгтэй лам байх магадлалтай ч одоогийн байдлаар зөвхөн Мьянмар улсын эмэгтэй лам нар дэлхий нийтэд танигдсан.
БАРИМТ 22
Зарим мьянмар охидын хүзүүнд таван наснаас нь эхлээд цагираг суулгаж бага багаар цагиргийн тоог нэмсээр байдаг. Учир нь Мьянмарт урт хүзүүтэй эмэгтэйчүүд үзэсгэлэнтэй гэж тооцогддог ба ингэснээр тэдний хүзүү урт болдог юм байна. Зарим тохиолдолд охидуудын хүзүүнээс гадна гар болон хөл дээр нь уг цагиргийг байрлуулдаг.
БАРИМТ 23
Мьянмарчууд хоол идэхдээ халбага, сэрээ, савх гэх мэтийн оронд ихэвчлэн хуруугаа ашигладаг. Тэдний хэрэглэдэг хоол нь агшаасан будаа, загасны мах, ногоо, шөл зэрэг байдаг. Мөн мьянмарчууд маш найрсаг хүмүүс байдаг тул та тус улсын хаанаас ч үнэгүй ундны цэвэр ус олох боломжтой.
БАРИМТ 24
Мьянмарчууд зурхайд гүн итгэдэг. Хоорондоо тохирохгүй ордтой гэх шалтгаанаас болж олон хосуудыг ар гэрийнхэн нь хүчээр хоёр тийш болдог. Мьянмар улсын боловсролын салбар нь Их Британи улсынхтай нэлээд төстэй бөгөөд барааг бүх мьянмарчууд бичиг үсэг тайлагдсан. Мөн бүх хүүхдүүд бага сургуулиа төгсөх хүртлээ заавал сургуульд сурах үүрэгтэй.
