БШУЯ-наас ЕБС-ийн 29, 324 багшийг хамруулан хийсэн гүйцэтгэлийн үнэлгээний үр дүнг танилцуулж байна. Энэ үеэр Боловсрол шинжлэх ухааны сайд Л.Энх-Амгалан мэдээллийг танилцууллаа.
Тэрбээр "Багшийн ажлын гүйцэтгэл, үр дүнд суурилсан үнэлгээний шалгалтыг орон даяар анх удаа зохион байгууллаа. Өнгөрсөн хугацаанд бид боловсролын хүртээмжийг их ярьдаг байсан бол цаашид боловсролын салбарын шинэчлэлд анхааралд хандуулах нь зүйтэй юм. Ковидын нөхцөл байдалтай холбогдуулан сурлагын хоцрогдол үүссэн. Үүнийг арилгахын тулд багшийн хоцрогдлыг давхар арилгах ёстой. Үүнд үндэслэн гүйцэтгэлийн үнэлгээ хийнэ. Багшийн гүйцэтгэлийн үнэлгээ шинэчлэгдсэн. Цаашид үндсэн суурь цалин дээр гүйцэтгэлийн урамшуулал нэмэгдэнэ.
Бид багшийн үнэлгээг үнэлэхдээ дөрвөн шалгуур тавьж, зургаан түвшинд ангиллаа. Тухайлбал,
- Сурагчдын сурлагын амжилт
- Сурагчидтайгаа хэрхэн хамтарч ажилладаг вэ
- Өөрийгөө хэрхэн хөгжүүлж байна вэ
- Сургуулийн олон нийтийн үйл ажиллагаанд хэрхэн идэвхтэй оролцдог вэ гэсэн дөрвөн шалгуур, 13 үзүүлэлтээр үнэлсэн.
Монгол Улсад анх удаа 650 гаруй сургуульд багшилж буй 29 мянган багшийг гүйцэтгэлээр нь үнэллээ. Үнэлгээ явуулахдаа хотын багш нарыг хотын багштай. Орон нутгийн багш нарыг орон нутгийн багш нартай нь үнэлсэн. Яагаад гэвэл хот хөдөөгийн орчин өөр.
Үнэлгээнд сурагчид, эцэг эхчүүд, багш, захирал, менежер зэрэг 1.3 сая хүн оролцсон.
Багш нарыг дараах зургаан түвшинд ангилаад үзвэл:
- Нэгдүгээр ангилал-25 хувийн нэмэгдэл /үндсэн цалин дээр нь/
- Хоёрдугаар ангилал-20 хувийн нэмэгдэл
- Гуравдугаар ангилал-15 хувийн нэмэгдэл
- Дөрөвдүгээр ангилал-10 хувийн нэмэгдэл
Харин тав, зургаадугаар түвшний ангилалд багтсан багш нарын цалингаас нэг ч төгрөг хасахгүй. Тодруулбал тодорхой болзол, шалгуурыг давж, үнэлгээний шалгалтыг амжилттай өгсөн багш нар үндсэн цалин дээрээ 10, 15, 20, 25 хувийн нэмэгдэл урамшуулал авах эрх нээгдэнэ. Ур чадварын нэмэгдэлд нийт багш нарын 15 хүрэхгүй хувь нь урамшуулал авдаг байсан. Харин гүйцэтгэлд суурилсан тогтолцоо нэвтэрснээр нийт багш нарын 40 орчим хувь нь ажлын гүйцэтгэлийн үр дүнг үнэлүүлээд 10-25 хувийн урамшуулал авах боломж бүрдэж байна.
Нийт багш нарыг түвшингээр нь ангилаад үзвэл:
- Нэгдүгээр түвшинд 947 багш
- Хоёрдугаар түвшинд 2982 багш
- Гурвадугаар түвшинд 3351 багш
- Дөрөвдүгээр түвшинд 5016 багш
- Тав, зургаадугаар түвшинд 17 мянган багш нар байна гэж гүйцэтгэлийн үнэлгээгээр гарлаа.
Үнэлгээнд багш нар өөрсдөө оролцож, өөрсдийгөө үнэлүүлсэн учир бодит үр дүн гэж бодож байна. Хамрагдсан багш нартаа талархал илэрхийлье. Цаашид сургуулийн өмнөх болосрол, Их дээд сургуулиудаа ийм тогтолцоонд шилжүүлнэ" гэв.
Д.Батчулуун
