Үндэсний их баяр наадмыг зохион байгуулах хороо өчигдөр хуралдаж Урлаг соёлын салбар хороо наадмын нээлт, хаалтын үйл ажиллагаа болон Төрийн хүндэтгэлийн концертыг зохион байгуулах найруулагчаар “Скин энтертайнмент”-ын найруулагч Б.Анарыг ажиллуулахаар болсон билээ.
Мөн зөвлөхөөр Монгол Улсын Ардын багш С.Дуламыг ажиллуулахаар санал оруулж, Үндэсний их баяр наадмыг зохион байгуулах хорооны гишүүд хэлэлцэн, баталсан юм. Тэгвэл Скин энтертайнментын ажил, туршлагаас та бүхэнд танилцуулъя.
1. Скин энтертайнмент 2004 оны 8 дугаар сард байгуулагдсан.
2. Скин (SKIN) гэдэг нь утгачилж орчуулбал “Үндсэрхэг үзэл” гэсэн утгатай үг юм.
3. Телевизийн нэвтрүүлэг, дууны клип, бүх төрлийн реклам, баримтат кино болон уран сайхны кино, хүлээн авалтын үйл ажиллагаа, бүрэн хэмжээний тоглолт, анимэйшн мультикийн бүхий л үйл ажиллагааг орчин үеийн тоног төхөөрөмжөөр мэргэжлийн, чадварлаг хамт олон чанарын өндөр түвшинд хийж гүйцэтгэдэг.
4. Бүрэн хэмжээний хоёр уран сайхны кино хийсэн.
- Анхны бүтээл: “Долдугаар сарын 1” УСК, 2009 он
- “Зүрх зогсохгүй” УСК, 2014 он
5. Скин энтертайнмент нь бүтээл бүрдээ эх оронч, үндэсний үзлээ шингээхийг зорьдог.
6. Хамгийн алдартай баримтат кино нь Харанга хамтлагийн 30 жилийн ойд зориулсан, 12 ангитай “Харанга” кино юм.
7. Олон хамтлаг, дуучдын клипийг хийсэн бөгөөд өдгөө монголчуудын дунд хамгийн их түгсэн, өөрсдийн санаа зорилгоо бүрэн гүйцэлдүүлж чадсан бүтээл нь монгол туургатан хип хоп артистуудын хамтарсан “ТООНОТ” дуу юм.
8. “UBS awards”-ын гурван удаагийн шагнал хүртсэн.
9. Дэлгэцийн бүтээлийн салбарт шинэчлэл хийсэн гурван зүйл нь,
- Өнгөний хувьсал
- Шинэ хэв маяг
- Дүрс график
10. Уран бүтээлийн шоу тоглолт олныг зохион байгуулснаас жишээлбэл,
- Triple X Awards шоу
- Харанга хамтлагийн 30 жилийн ойд зориулсан “Замд гаръя”
- Ч.Чулуунбатын “Содон аялгуу”, “Хайр”, “Хөгжмөөр хөглөгдсөн 50 жил”
- Б.Сарантуяагийн “Инээмтгий хүн” тоглолт
- Т.Ариунаагийн “Тэнгэр шиг бай” тоглолт
- Ү.Хүрэлбаатарын “Миний дуу, миний аз жаргал” гэх мэт үзэгч олны таашаалд нийцсэн олон тоглолтыг найруулан тавьжээ.
