**************************************************************************************************************************************************************
Өнөө жилийн "Алтан бөмбөрцөг", Оскарын наадмаас шилдэг дуу шагналыг хүртсэн энэтхэгийн "RRR" кино болон "Марвел" студийн "Thor" кинонд туслах дүр бүтээсэн жүжигчин Рэй Стивенсон ням гарагт 58 насандаа нас барсныг түүний хамтрагч Ники Фиораванте CNN-д мэдэгдэв. Түүний үхлийн шалтгааны талаар нэмэлт мэдээлэл одоогоор гараагүй байгаа билээ.
Грегори Рэймонд Стивенсон Хойд Ирландад төрсөн бөгөөд хүүхэд байхдаа гэр бүлийн хамтаар Англи руу нүүн суурьшжээ. Тэрбээр хамгийн сүүлд 2022 оны Оскарын шагналт "RRR" кинонд хорон санаат Скотт Бакстоны дүрд тоглосон юм. Уг кино нь Оскарын шилдэг дууны шагналыг хүртсэн бөгөөд 2022 онд Энэтхэгт хамгийн их ашиг олсон хоёр дахь кино болсон билээ.
Стивенсон энэ наймдугаар сард удахгүй гарах Оддын дайн "Ахсока" цувралд Бейлан Сколлын дүрд тоглохоор төлөвлөж байсан нь өнгөрсөн сард 2023 оны Оддын дайны баярт оролцох үеэр ил болсон. Стивенсон уг арга хэмжээний үеэр уг төслийн нэг хэсэг болсондоо баяртай байгаагаа хэлээд "Гэрлийн сэлэм ашиглах нь дэлхийн хамгийн сайхан мэдрэмж" гэж хэлж байлаа. “Ахсока” нь Стивенсоны тоглосон Оддын дайнтай холбоотой гурав дахь цуврал кино бөгөөд өмнө нь 2016 онд “Оддын дайн: Босогчид” болон 2020 онд “Оддын дайн: Клоны дайн” киноны хоёр ангид Гар Саксоны дүрийг бүтээж байжээ.
Л.Сайнаа
