Комедиан Б.Идэр-Одыг интерполоор эрэн сурвалжилж байгаа гэх мэдээлэл олныг хамраад байна. Тэгвэл энэ талаар Эрүүгийн цагдаагийн албанаас Б.Идэр-Одыг интерполын хөх буланд зар мэдээллээр зарласан нь үнэн гэв. "Энэ зар мэдээ нь тухайн хүнийг хаана байгааг тогтоох зорилготой. Иргэн Б.Идэр-Од 2022 оны гуравдугаар сард Монгол Улсаас гарч Австрали улсад очсон бөгөөд өнгөрсөн хоёрдугаар сард АНУ руу явсан. ЭЦА-аас койн, токентой холбоотой асуудлуудыг шалгахаар ажлын хэсэг гаргасан бөгөөд Б.Идэр-Одыг уг хэргээр шалгаж байгаа. Түүнийг цагдаагийн байгууллагаас дуудсан ч тэрбээр ирээгүй тул эрэн сурвалжилж эхэлсэн” гэжээ. Тэгвэл бид та бүхэнд түүний тухай сонирхолтой 12 баримтыг хүргэж байна. 

Баримт 1

Бат-Эрдэнийн Идэр-Од нь 1987 оны 4 сарын 26-нд төрсөн. Монгол улсын стандап комедиан, технологийн бизнесмэн юм.

Баримт 2

Идэр-Од нь Хөвсгөл аймгийн Мөрөн хотод нисгэгч Бат-Эрдэнэ, улс төрч Цэдэвдамбын Оюунгэрэл нарын ууган хүү болон мэндэлсэн.

Баримт 3

Идэр-Одын аав Бат-Эрдэнэ түүнийг 3 сартай байхад "АН-2" онгоцны ослоор нас барсан. 

Баримт 4

Тэрбээр Физик математикийн гүнзгийрүүлсэн сургалттай 11 дүгээр сургууль төгссөн.

Баримт 5

2006-2011 оны хооронд Америкийн Нэгдсэн Улсын Канзасын Их Сургуулийг агаарын хөлгийн инженер мэргэжлээр төгссөн.

Баримт 6 

Сургуулиа төгсөж ирээд Монгол улсын иргэний агаарын тээврийн МИАТ компанид 2 жил ажиллаж байсан.

Баримт 7

Стандап комедиан Б.Батбилэгийн Ub Comedy клубын анхны гишүүдийн нэг юм.

Баримт 8

Тэрбээр "Монгол" телевизийн гаргадаг олон улсын Shark Tank Mongolia шоуны хөтлөгчөөр ажилладаг. Мөн тус телевизийн "Намайг сонгооч" шоуны хөтлөгчөөр ажиллаж байсан.

Баримт 9

2004 онд Идэр-Од бизнес хамтрагч Тулгын хамт "Callpro" компаниа, 2009 онд бизнес хамтрагч А.Бямбажаргалын хамт "Hippocards" үг цээжилдэг аппыг үүсгэн байгуулсан. Тэрээр мөн хэлний боловсролын "Faro Group"-ын үүсгэн байгуулагчдын нэг юм.

Баримт 10

2019 оноос өөрийн YouTube суваг дээр "Ideree's Podcast" ярилцлагыг хийж олон нэр хүндтэй хүмүүстэй ярилцсан байдаг. Өөрийн "Ider-Od Comedian" суваг дээр хөгжилтэй бичлэг, энтертайнмэнт шоу хийж оруулдаг.

Баримт 11

2020 онд англи хэлний IELTS 600 номоо хэвлүүлсэн юм.

Баримт 12

Тэрбээр койн, токентой холбоотой асуудалд нэр холбогдож, одоогоор эрэн сурвалжлагдаж байна. Тэрбээр өөрийн фэйсбүүк хуудсаа идэвхитэй хөтөлсөн хэвээр байгаа юм.

Л.Сайнаа