АНУ-ын кино академиас жил бүр зохион байгуулдаг Оскарын кино наадмын гадаад хэл дээрх шилдэг кино төрөлд оролцох киног тухайн улсын кино хороо, зөвлөл сонгон шалгаруулдаг. Монгол улсын Соёлын яамны харьяа Монголын үндэсний кино урлагийн зөвлөл нь чиг үүргийнхээ хүрээнд 2022 оноос эхлэн албан ёсоор тус наадамд улсаа төлөөлөн оролцох уран бүтээлийг сонгон шалгаруулж байна. 2022 оны 95 дахь удаагийн Оскарын наадамд найруулагч Б.Амарсайханы “Эргэж ирэхгүй намар” уран сайхны киног илгээсэн билээ.
96 дахь удаагийн Оскарын кино наадам 2024 оны 3 дугаар сард Лос-Анжелес хотноо зохион байгуулагдах бөгөөд Монголын үндэсний кино урлагийн зөвлөл нь 2023 онд бүтээгдсэн монгол кино дундаас Оскарын наадмын урьдчилсан сонгон шалгаруулалтад явуулах үндэсний киног шалгаруулах гэж байна. Уран бүтээлчид та бүхэн дараах шаардлагыг хангасан уран бүтээлээ Кино урлагийн зөвлөлд илгээнэ үү.
Сонгон шалгаруултад оролцох кино бүтээлд тавигдах шаардлага:
- АНУ болон харьяа нутаг дэвсгэрүүдээс нь гадна хийгдсэн, 40 минутаас дээш урттай бүтээл байх
- Харилцан ярианы 50-иас дээш хувь нь англиас өөр хэл буюу монгол хэлээр байх
- Монгол улсад 2023.01.01-11.30 хооронд нээлтээ хийсэн байх
- Кино театрт дор хаяж 7 өдөр дараалан, ашгийн зорилгоор толилуулагдсан байх (Фестивалийн үзвэр үүнд хамаарахгүй)
- Кинотеатрт гарахаас бусдаар олон нийтэд түгээгдсэн, толилуулагдсан бүтээл байж болохгүй (Өргөн нэвтрүүлгийн болон кабелийн сувгаар, IPTV, PPV/VOD хэлбэрийн үйлчилгээгээр, DVD-ээр, нислэгийн үзвэрт г.м.)
- Кино бүтээх үйл явцад монгол хүмүүс голлох үүрэгтэй оролцсон байх
Сонгон шалгаруултад оролцох кино бүтээлийг хүлээн авах хугацаа:
- 2023 оны 08 сарын 18 -ны өдрөөс эхлэн 2023 оны 09-р сарын 01-ний өдрийг хүртэл доорх холбоосоор хандан киногоо бүртгүүлнэ үү.
https://forms.gle/wZWmdeK3wjV8NQzy7
Холбоо барих утас: 262226
Санал, хүсэлт, тодруулга авах secretariat@filmmongolia.gov.mn хаяг руу илгээнэ үү.
МОНГОЛЫН ҮНДЭСНИЙ КИНО УРЛАГИЙН ЗӨВЛӨЛИЙН АЖЛЫН АЛБА
