Хүчтэй охин Ган Нам Сүний тухай өгүүлэх “Strong Girl Nam-soon” цуврал Netflix дээр хамгийн эрэлттэй цувралын нэг болж буй. Энэхүү цуврал нь Монголд зарим зураг авалтуудаа хийсэн бөгөөд киноны туршид манай улсын талаар дурдаж дуу хөгжим, идээ ундаа, өв соёлыг дэлгэрүүлэн харуулжээ. Иймд уншигч та бүхэнд тус киноны тухай мэдээллийг хүргэе.
Киноны үйл явдалд юу өрнөх вэ?
Цувралын хувьд гол дүрийн бүсгүй Ган Нам Сүн бага байхдаа аавтайгаа хамт Монгол орны хөдөө нутгаар аялж байгаад золгүй байдлаар төөрч байгаагаар эхэлнэ. Ийнхүү охиныг сайхан сэтгэлт монгол хосууд олж, бурхнаас ирсэн бэлэг хэмээн Цэцэг гэх нэрийг хайрлаж, өөрсдийн охин болгон өсгөхөөр шийднэ. Удахгүй охин том болж төрсөн эцэг, эхээ хайхаар Солонгос улсыг зорьж буйгаар үйл явдал өрнөнө.
Монгол жүжигчид дүр бүтээжээ
Цувралын туслах дүрд жүжигчин Ц.Цэрэнболд болон Б.Батсумьяа нар тоглосон. Тэд Ган Нам Сүнийг өргөж авсан эцэг эхийн дүрийг бүтээсэн бөгөөд Asianwiki хэмээх Ази кино, бүтээлийн талаарх цогц мэдээлэл оруулдаг вэбсайт дээр хоёр жүжигчний танилцуулга нэмэгдсэн байв.
Монгол орны соёл болон байгаль
Тус цуврал дээр манай орны шөнийн тэнгэрт гялалзах одод, уужим цэлгэр тал, уул ус зэргийг үзэсгэлэнтэйгээр тусгаж өгчээ. Мөн Монголчууд мал амьтдад ялангуяа мориндоо маш хүндэтгэлтэй ханддаг талаар, Монгол хүмүүсийг "бүргэдийн хараатай" хэмээн тодотгож холоос ирж буй хүнийг ямар ч саад тотгоргүйгээр олж харж байгаа зэргийг харуулсан олон жижиг деталийг цувралд нэмж өгсөн байлаа.
Сонирхуулахад киноны зарим хэсэг дээр Ган Нам Сүн монгол хэлээр ярьж, монгол дуу дуулан, бие биелгээг хүртэл чадварлагаар хийж байгаагаар гардаг. Түүнчлэн түүний хамгийн дуртай хоол нь хорхог бөгөөд хуушуур, бууз, цуйван, сүүтэй цай, монгол архи зэргийг Солонгост очсон ч хайж олж, задгай талбайд гэр барьж амьдарч байгааг харуулсан нь киног илүү хөгжилтэй, бодитой болгож өгч байв.
Гол дүрийн жүжигчин И Юү Ми
“Squid Game” цувралд туслах дүр бүтээснийхээ дараагаар залуу жүжигчин И Юү Мигийн нэр хүнд маш хурдацтай өсөж томоохон кино бүтээлүүдэд харагдах болсон. Тэрээр ярилцлагынхаа үеэр Монголд авсан зураг авалтууд нь маш сонирхолтой, дурсамжтай байсан талаараа дурдсан бөгөөд TikTok платформ дээр “Lee Yoo Mi speaking Mongolia” гэх хэштег тренд болоод байгаа юм.
