Арванхоёрдугаар сард үзэгчдийн дунд хамгийн өндөр хүлээлттэй байгаа цуврал, кинонуудыг танилцуулж байна.
SWEET HOME-2
Тус цувралын эхний бүлэг нь 2020 онд үзэгчдийн хүртээл болж багагүй амжилт үзүүлж байсан.Хоёрдугаар бүлэг олон шинэ жүжигчдийн бүрэлдэхүүнтэйгээр эргэн ирэх болно. Өмнөх бүлэг дээр таалал төгссөн зарим дүрүүд чөтгөр болон эргэн ирэх магадлалтай гэдгийг кино багийнхнаас хуваалцсан байна.
WELCOME TO SAMDAL-RI
Багаасаа найзалж, эцэст нь нэгэндээ сэтгэлтэй болсон хосуудын тухай гэгээлэг түүхийг өгүүлэх тус цувралд жүжигчин И Жан Үг, Шин Хэ Сүн нар тоглож байгаа гэдгээрээ онцлог юм. Үйл явдалд тэдний гал халуун хайр дурлалыг өгүүлэхээс гадна Жэжү арал дээр тэдэнтэй цуг амьдарч буй хөршүүдийн талаарх сэтгэл хөдлөм, хөгжилтэй түүхийг харуулна.
WONKA
Бидний бага насны дурсамжид хадгалагдан үлдсэн ид шидийн шоколадны үйлдвэрийн эзэн Вилли Вонкагийн залуу насны тухай өгүүлэх “Wonka” кино үзэгчдийн дунд томоохон хүлээлт үүсгээд байна. Учир нь залуу Вилли Вонкагийн дүрийг жүжигчин Тимоти Шаламе бүтээж байгаагаас гадна жүжигчин Роуэн Аткинсон, Хью Грант нар тоглож байгаа гэдгээрээ онцлог юм.
FERRARI
Алдарт Энцо Ферраригийн амьдралын түүхээс сэдэвлэн бүтээсэн уг кино нь 80 дахь удаагийн Венецийн кино наадамд анхны нээлтээ хийж кино шүүмжлэгчдээс өндөр үнэлгээ аваад зогсохгүй танхимд байсан үзэгчдийн гал халуун зургаан минутын турш алга ташилтаар өндөрлөсөн түүхтэй.
DEATH’S GAME
Со Ин Гүг, Пак Су Дам, И Жэ Үг, Гү Юүн Жон зэрэг алдартай, чадварлаг жүжигчдийн бүрэлдэхүүнтэй тус триллер цуврал нь Чой И Жэ хэмээх залуугийн бүтэлгүй амьдралаар эхэлнэ. Тэрээр чадлынхаа хэрээр хичээгээд ажилдаа, гэр бүлдээ ч тэр хангалттай үнэлэгдэж чадахгүй байсан учир амиа хорлохоор шийддэг. Гэвч И Жэ нас барсныхаа дараа үхлийн бурхантай уулзаж шийтгүүлсний улмаас 12 өөр хүний амьдралыг эмгэнэлтэйгээр таалал төгсөх эцсийн мөч хүртэл нь туулахаар болдог.
PERCY JACKSON AND THE OLYMPIANS
Ижил нэрт 6 боть номын франчайз “Percy Jackson and The Olympians” бүтээл нийт 8 ангитай цуврал болон цацагдахаар болжээ. Бүтээлийн өрнөлд 12 настай Перси Жексон хүү нэгэн өдөр өөрийгөө хагас бурхан хагас хүн гэдгээ олж мэднэ. Улмаар тэрээр Грекийн бурхан Зевсийн аянгыг хулгайлсан хэмээн гүтгэгдэж буйгаар кино үргэлжлэх болно.
AQUAMAN AND THE LOST KINGDOM
“Aquaman” бүтээлийн дараагийн анги үзэгчдийг удаан хүлээлгэсний эцэст нээлтээ хийхэд бэлэн боллоо. Үйл явдал эхний анги дээрхээс хэдэн жилийн дараах түүхийг өгүүлэх ба Блэк Манта эртний хараагдсан хүчийг олж нээн Aquaman болон түүний эзэнт гүрэн рүү довтолж буйгаар өрнөх аж.
GYEONGSEONG CREATURE
Холливүүдэд “The Marvels” киногоор дебютээ хийгээд амжсан чадварлаг жүжигчин Пак Со Жүний ээлжит бүтээл болох “Gyeongseong Creature” цуврал нийт хоёр хэсэгтэйгээр Netflix видео стриминг платформоор цацагдах аж. Эмэгтэй гол дүрийг “Nevertheless” цувралаараа олонд танигдсан залуу жүжигчин Хан Су Хи бүтээж байгаа бол Ви Ха Жүн, Ким Хэ Сүг нар туслах дүрд тогложээ.
