Netflix-ийн “Single’s Inferno” реалити шоу олны дунд шуугиан дэгдээж, үзэлт нь жил ирэх тусам өссөөр байгаа билээ. Энэ жил шоуны гурав дахь бүлэг үзэгчдийн хүртээл болж буй. Ялангуяа сүүлийн үед TikTok, Instagram зэрэг сүлжээнүүдийн тусламжтайгаар алдаршсан тус бүтээлийн оролцогчид, хөтлөгчид болон шоуны зураг авалтын талаарх дэлгэрэнгүй мэдээллийг хүргэж байна. 

ШОУНЫ ТУХАЙ 

“Single’s Inferno” болзооны реалити шоуны үйл явдал Netflix-ийн “Too Hot to Handle” шоуг санагдуулах хэдий ч Солонгосын хувилбарт ганц бие оролцогчид “Там” хэмээн нэрлэгдсэн хүндхэн амьдрах орчинд буюу эзэнгүй мэт арал дээр найман хоногийг өнгөрүүлэх бөгөөд өгөгдсөн өдрүүдэд бусад оролцогчидтойгоо танилцаж тэр дундаас бие биенээ олсон хосууд “Диваажин” гэх тансаг зэрэглэлийн зочид буудалд нэг шөнийг хамт өнгөрүүлэх боломжтой билээ. Мөн “Тамд” байх хугацаандаа оролцогчид өөрсдийн нас болон ажил мэргэжлээ бусдад хэлэх хориотой. Зөвхөн “Диваажин” руу хамт болзоонд явсан оролцогчид эдгээр мэдээллүүдийг бие биетэйгээ солилцож, илүү дотносох боломжтой юм. Нийт арван ангиас бүрдэх тус реалити шоунд нийт 12 хүн шоунд оролцож буй. Түүнчлэн үзэгчдийн хамт Солонгосын нэрт уран бүтээлчид буюу жүжигчин Ли Да Хи, дуучин Кюхён, комедиан Хон Жин Кён, рэпер Ханхэ нар хөтлөгчдийн үүргийг гүйцэтгэн оролцогчдын үйлдэл бүрийг хянаж, өөрсдийн сэтгэгдлээсээ анги бүрт хуваалцжээ.

ЗУРАГ АВАЛТЫН ХИЙСЭН БАЙРШИЛ

“Диваажингийн” зураг авалт Инчон хотын онгоцны буудлын ойролцоо байрлах “Paradise City” тансаг зэрэглэлийн зочид буудалд хийгджээ. Сонирхуулахад, BLACKPINK хамтлагийн гишүүд Rosé болон Jennie нар тус зочид буудалд өнгөрсөн жил амралтаа өнгөрүүлснийг нь шүтэн бишрэгчид нь олж тогтоосон байна. Мөн бусад нэрт дуучид болон кино багийнхан “Paradise City”-д клип, киноны зураг авалт зэргийг хийдэг тул уг буудал нь Солонгосчуудын дунд нэлээд нэр хүндтэй байдаг гэнэ. Харин “Там” хэмээн нэрлэгдсэн арал нь тус зочид буудлын дэргэд байрлах Saseungbong-do арал байжээ. Шоуны оролцогчид зочид буудал болон арал хооронд нисдэг тэрэгний тусламжтайгаар зорчдог билээ.

ШОУНЫ ЭМЭГТЭЙ ОРОЛЦОГЧИД

1. Kim Gyu-ri

Тэрбээр "Single's Inferno" гуравдугаар бүлгийн хамгийн эхэнд танилцуулагдсан оролцогч билээ. Одоо 28 настай бөгөөд загвар өмсөгчөөр ажилладаг. Сургуульд сурч байхад нь түүнд загвар өмсөх санал анх ирсэн гэх бөгөөд тэр үеэс хойш тасралтгүй ажиллаж байгаа.  

2. Choi Hye-seon

Тэрбээр өөрийгөө ихээхэн гэгээлэг, бас бусадтай нээлттэй харилцдаг хэмээн тодорхойлсон бөгөөд "Нарны гэрэл" шиг л хэмээн хүмүүс түүнийг дууддаг гэнэ. Өөрийн биеийн галбиртаа хамгийн дуртайгаас гадна булчинлаг, том биетэй залууст дуртай. Одоо 26 настай бөгөөд коллежийн оюутан. Түүнийг үзэгчид өнгөрөгч бүлгийн Nadine Lee-тэй төстэй хэмээн дүгнэсэн байдаг. Тэрээр Сөүлийн их сургуульд биоанагаахын шинжлэх ухааны чиглэлээр дадлага хийсэн бөгөөд "Silicon Valley"-ийн нэгэн стартап байгууллагад мөн онлайн дадлага хийж байгаа аж. Одоо EWHA эмэгтэйчүүдийн их сургуульд биоинформатик чиглэлээр сурч буй. 

3. An Min-young

Тэрээр өөрийгөө ихээхэн хөнгөн, зөөлөн бас гэрэлтсэн эерэг зан араншинтай хэмээн тодорхойлсон байдаг.  Одоо 26 настай бөгөөд пилати дасгалжуулагчаар ажилладаг. Мөн 2023 оны Miss Korea Busan болж байснаас гадна гольф тоглож, загвар өмсдөг байна. Түүгээр ч зогсохгүй өөрийн дасгалын студитэй бөгөөд менежерүүдээ удирдаж, ганцаарчилсан дасгал хөдөлгөөний зөвлөгөө хичээл ордог гэнэ. 

4. Yun Ha-jeong

Энэ бүлгийн хамгийн сонирхолтой оролцогчдын нэг. Түүний таалагдаж буй залуу руугаа хардаг харц нь энэ шоуны ярианы сэдвүүдийн нэг болоод байгаа юм. Тэрбээр ухаалаг бас бусдад сайн зөвлөгөө өгөх чадвартай бөгөөд шулуун шударга. Одоо 26 настай бөгөөд нэгэн эмнэлгийн хувцасны газар оффисын ажилтнаар ажилладаг.

5. Yu Si-eun

Өөрийгөө маш өхөөрдөм зан чанартай хэмээн дүгнэсэн түүнийг олон хүн BlackPink хамтлагийн Женнитэй төстэй хэмээн үзэгчид ихээхэн шуугилдсан. Тэрээр загвар өмсөгч бөгөөд хувцасны брэндүүдтэй хамтран ажилладаг. Одоо 27 настай. Тэр энэхүү шоунд оролцож буй Ха-Жонтой танилууд байж таарсан. Ха-Жоны найзынх нь эгч байсан бөгөөд энэ тухай анх нэг нэгнээ харахдаа хэлсэн байдаг. 

6. Cho Min-ji

Тавдугаар дугаараас орж ирсэн шинэ оролцогч. Тэр хүмүүстэй хэрхэн сайн харилцаж, өөрийгөө илэрхийлэхээ маш сайн мэддэг. Тэрээр Ewha эмэгтэйчүүдийн их сургуульд эдийн засгийн мэргэжлээр сурсан бөгөөд цаашлаад мэдээний хөтлөгч болохоор шийдэн, суралцаж байгаа аж. 

ШОУНЫ ЭРЭГТЭЙ ОРОЛЦОГЧИД

1. Choi Min-woo

Түүний өндөр болоод өргөн мөр өөрийнх нь хамгийн сэтгэл татам хэсэг болохыг тэр хүлээн зөвшөөрсөн.Тэрбээр 24 настай бөгөөд оролцогчид дундаасаа хамгийн залуухан нь. 

2. Lee Gwan-hee

Энэ бүлгийн алдартнуудын нэг гэж хэлж болно. Учир нь түүнийг анх гарч ирэхэд л хөтлөгчдийн нэг шууд таньж байсан билээ. Өөртөө итгэлтэйгээс гадна маш шулуун шуларга, шооч хөгжилтэй зан чанартай бөгөөд түүгээрээ ч үзэгчид дунд ихээхэн шуугиан тарьж буй. Одоо 36 настай бөгөөд LG Sakers багийн мэргэжлийн сагсан бөмбөгч. 

3. Son Won-ik

Өөдрөг бас шударга зан чанартай хэмээн өөрийгөө тодорхойлсон тэрээр боксоор хичээллэх хоббитой аж. Одоо 31 настай бөгөөд үл хөдлөх хөрөнгө зуучлагч мэргэжлээр ажилладаг гэнэ. Үүгээр ч зогсохгүй тэрээр загвар өмсдөг бөгөөд YouTube дээр өөрийн хаягтай, түүндээ идэвхтэй бичлэг оруулдаг байна. 

4.  Yun Ha-bin

Энэхүү бүлгийн хамгийн нууцлаг оролцогчдын нэг гэж хэлж болно. Тэрээр ганц ч удаа хос болж Диваажин руу яваагүй байгаа бөгөөд ямар ажил эрхэлдэг нь нууц хэвээр байгаа. Жүжигчин байх гэсэн таамаглал гарсан бөгөөд зарим үзэгчид түүнийг My Demon цуврад дээрээс олж харсан хэмээжээ.

5. Park Min-kyu

Шоуны хамгийн өндөр, өргөн мөр цээжтэй, анхаарал татам дүр төрхтэй оролцогч гэгдэж буй. Тэрээр маш сайн сэлдэг бөгөөд дасгал хөдөлгөөн, бэлтгэл тогтмол хийдэг. Өмнөд Солонгосын эргийн хамгаалалтын аврах багт зүтгэдэг бөгөөд цагдаагийн офицер. Одоо 34 настай.

6. Lee Jin-seok

Өдөр тутам биеэ хөгжүүлэх дасгалаар хичээллэж, өөрийгөө анхаардаг тэрбээр хүмүүс ихэнхдээ түүнээс сүрддэг ч инээмсэглэхийг нь харахдаа шал өөр болдгийг хэлсэн байдаг. Тэрээр Өмнөд Солонгосын Дэгү хотноо кафе бейкери ажиллуулдаг. Өнгөрөгч дөрвөн жилийн хугацаанд энэхүү бизнесийг эрхэлж байгаа бөгөөд хэд хэдэн салбартай гэнэ.