Google пүрэв гарагт хиймэл оюун ухааны хоёр шинэ амжилтаа зарлалаа. Эдгээр нь онлайнаар юм хийх хайлтыг илүү ашигтай болгох технологи юм. 

Зарим Андройд утсан дээр Google-д ханддаг гар утасны хэрэглэгчид удахгүй ухаалаг утасныхаа дэлгэцэн дээр гарч ирэх зүйлсийг дугуйлж, тодруулж нэмэлт мэдээлэл оруулах, зураг эсвэл текстийн талаар төвөгтэй эсвэл нарийн ширийн асуултуудыг асуух боломжтой болно. Тус компани өнгөрсөн жилээс эхлэн ChatGPT зэрэг вирусын чатботуудыг дэмждэг хиймэл оюун ухааны тусламжтайгаар хайлтыг хэрхэн илүү хувийн, мэдрэмжтэй, нарийн болгох талаар судалж буй.

Эдгээр функцуудыг энэ долоо хоногийн эхээр Samsung-ийн Unpacked арга хэмжээний үеэр танилцуулсан бөгөөд энэ сарын сүүлээр нээлтээ хийх Galaxy S24 ухаалаг гар утасны цувралд нэвтрэх ажээ. Мөн Pixel 8 болон Pixel 8 Pro зэрэг бусад өндөр чанартай Android ухаалаг гар утаснууд дээр ашиглагдах гэнэ. 

"Circle to Search" буюу "Хайхын тулд дугуйл" нэртэй эхний функц нь Андройд хэрэглэгчдэд сошиал сүлжээн дэх зарим тоймтой зүйлсийн талаар илүү ихийг мэдэх, зураг, бичлэг эсвэл текстийг дугуйлах, товших, тодруулах, сараачлах замаар дэлгэрэнгүй мэдээлэл олж авах боломжийг олгоно. 

Түүнчлэн, пүрэв гаргаас эхлэн хүмүүс гар утасныхаа камерыг чиглүүлж эсвэл зураг, дэлгэцийн агшинг байршуулан Google апп-аас асуулт асууж мэдээлэл авах боломжтой болно. 

Олон жилийн турш Google хайлтын системд сайжруулалт хийсний хүчинд дуу хоолой болон текстээр хайлт хийх зэрэг технологийг бид ашиглаж байв. Харин одоо та ухаалаг утасныхаа камераар дамжуулан, мөн зүгээр хүссэн зүйлээ дугуйлаад дүрс таних технологийн тусламжтай эргэн тойрныхоо талаар илүү ихийг олж мэдэх боломж бүрдлээ. 

Майкрософт, Амазон, Мета болон бусад томоохон технологийн компаниуд ижил төстэй технологийг нэвтрүүлэхээр уралдаж байгаа билээ. 

Л.Сайнаа