Үндэсний шигшээ багийн тамирчин ОУХМ С.Жамбалжамц "Tour of Sharjah" UCI2.2 олон өдрийн тэмцээнд эхний гараанд хүрэл медаль хүртэж, таван өдрийн нийлбэр дүнгээр тавдугаар байрт шалгарчээ.
Арабын нэгдсэн Эмират улсад болсон “Tour of Sharjah” тэмцээнд Франц, Испани, Итали, Бельги, Нидерланд, Грек, Турк, Португал, Тайланд, Хятад, Япон, АНЭУ, Саудын Араб, Бахрейн, Ирак, Оман зэрэг 23 орны 29 мэргэжлийн багийн 174 тамирчин 5 өдөр 526.26 км замыг туулж нийлбэр дүнгээ гаргажээ.
Уг тэмцээн нь Олон улсын дугуйн холбооны хуваарьт орсон Азийн томоохон тэмцээн бөгөөд тус улсын аялал жуулчлалыг хөгжүүлэх чухал арга хэмжээний нэг юм. Тэмцээний үеэр оролцогчид Sharjah хотын хамгийн өвөрмөц тогтоцтой, байгалийн үзэсгэлэнт газруудаар уралддагаараа онцлогтой.
Энэхүү тэмцээнд Үндэсний шигшээ багийн тамирчид ОУХМ С.Жамбалжамц (Burgos Burpullet BH), ОУХМ Б.Тэгшбаяр (Roojai insurance) нар өөрсдийн мэргэжлийн багаас амжилттай оролцлоо.
ОУХМ С.Жамбалжамц эхний гараанд хүрэл медаль хүртэж, 5 өдрийн нийлбэр дүнгээр шилдэг 5-р байрт шалгарчээ. Ингэснээр өмнөх жилийн амжилтаа бататгахаас гадна UCI чансааг 15 оноогоор ахиулсан бол ОУХМ Б.Тэгшбаяр нийлбэр дүнгээр 21-р байрт эрэмбэлэгдэж тэмцээнээ дуусгасан байна.
