УИХ-ын чуулганы нэгдсэн хуралдаан үргэлжилж байна. Энэ үеэр ЭЗХ-ийн сайд Л.Гантөмөр асуултад хариуллаа. 

Тэрбээр "Төрийн албаа цомхтгоцгооё. Хувийн хэвшлийн үйл хэрэг сайжирч байж, баялаг бүтээж байгаа хүмүүс олигтойхон орлоготой болж байж л цалин хөлс нэмэгдэнэ. Энэ бол хууль. Тиймээс татварын өргөн дэлгэр боломж олгохоор ЗГ тодорхой шийдэлд хүрсэн. Өнгөрсөн долоо хоногт МАН-ын бүлэгт танилцуулсан байх гэж би бодож байна. Энэ замаараа эргэлзээгүй алхах хэрэгтэй. Ингэж чадвал эдийн засаг өсөлт авна, ингэж байж орлого нэмэгдэнэ. Боловсролд анхаарах асуудалд санал нэгтэй байна.

Гадны банк байгуулах ажил бол Төв банкны л мэдлийн хүрээнд байна. Үүнийгээ хийх хэрэгтэй, УИХ шахах хэрэгтэй. Цөөхөн банкны гарт бид зээлийн хүүг үлдээж болохгүй. Гэхдээ нөгөө талдаа зээлийн хүү буурах ганц нөхцөл бол инфляц буурах. Инфляц буурах гол нөхцөл бол төр өөрөө худалдан авалтан дээрээ дамын наймаанаас салах явдал. Төр дамын наймаанаас салж хиймэл оюун ухаанд өгчих юм бол аяндаа үнэ буурна. Улмаар иргэд дээр очих үнэ буураад явдаг жамтай. Засгийн газар их дээд сургуулийн үнэ дээр ямар зохицуулалт хийхээ гаргачих хэрэгтэй. Хязгаарлаж чадвал аяндаа зээлийн хүү буурна. 

Бид чадах чинээгээрээ төлөвлөлтөө хийгээд явж байгаа. 14 мега төсөл бодит ажил хэрэг болж байж иргэдийн орлого нэмэгдэнэ" гэв