Монгол Улсын Их Хурлын гишүүн, Төрийн байгуулалтын байнгын хорооны дарга Ж.Бат-Эрдэнэ Улсын Их Хурлын 2024 оны сонгуулийг ажиглаж, гарсан үр дүнгээ танилцуулахаар хүрэлцэн ирсэн Европын аюулгүй байдал хамтын ажиллагааны байгууллага /ЕАБХАБ/-ын Ардчилсан институт, хүний эрхийн алба /АИХЭА/-ны Сонгуулийн асуудал хариуцсан ахлах зөвлөх Ксения Дашуцина, зөвлөх Горан Петров нарыг өнөөдөр /2025.06.18/ хүлээн авч уулзлаа.
Байнгын хорооны дарга Ж.Бат-Эрдэнэ, Сонгууль нь Монгол Улсын ардчилал, улсын хөгжил, цаашдын хувь заяанд чухал нөлөөтэй хэмээн онцлоод сонгуулийн үйл ажиллагаанд ажиглалт хийж, дүгнэлт гарган, зөвлөгөө өгч буйд талархаж байгаагаа илэрхийлэв.
Тэрбээр, ЕАБХАБ-ын Ардчилсан институт, хүний эрхийн албаны сонгуульд ажиглалт хийх аргачлал нь ардчилсан, шударга сонгууль явуулах гишүүн орнуудын хүч чармайлтад дэмжлэг үзүүлж байгаагийн том илрэл гэдгийг тодотгоод, сонгуульд ажиглалт хийлгэснээр ард иргэдийн сонгуулийн байгууллага, түүний тогтолцоонд итгэх итгэл үнэмшлийг нэмэгдүүлдгийг онцолсон. Тийм учраас Монгол Улс АИХЭА-ны сонгууль ажиглах үйл ажиллагааг өндрөөр үнэлдгийг тэмдэглэв.
Түүнчлэн ЕАБХАБ-ын АИХЭА хамгийн анх 2013 оны Ерөнхийлөгчийн сонгуулийг ажиглахаар Сонгууль ажиглах баг илгээж байсныг дурдаад, сонгууль ажиглах багаас гаргасан тайлан, зөвлөмж чухал ач холбогдолтой байсныг тэмдэглэсэн юм. Монгол Улс АИХЭА-ны Сонгууль ажиглах багаас гаргасан тайлан, зөвлөмжийг ажил хэрэг болгоход анхаарч ажиллахын сацуу энэ хүрээнд үргэлжлүүлэн идэвхтэй хамтран ажиллана гэдгийг илэрхийлсэн.
Мөн тайланд тусгасан санал, зөвлөмжүүд нь сонгуулийн эрх зүйн орчныг улам бүр боловсронгуй болгох, иргэдийн сонгох, сонгогдох эрхийг бүрэн дүүрэн хангах чухал ач холбогдолтой гэлээ.
ЕАБХАБ-ын Ардчилсан институт, хүний эрхийн албаны Сонгуулийн асуудал хариуцсан зөвлөх Горан Петров, Энэ удаа Монгол Улсад ажиллахдаа сонгуулийн ажиглалтын тайлан, зөвлөмжийг төрийн олон байгууллагын удирдлагад танилцуулсан хэмээгээд, Сонгуулийн ерөнхий хороо болон бусад байгууллагууд санал, зөвлөмжийг таатай хүлээн авсныг тодотгосон. Сонгуулийн ерөнхий хорооноос 2027 онд зохион байгуулах Ерөнхийлөгчийн сонгууль, 2028 оны УИХ-ын сонгуулиас өмнө холбогдох хуулиудад нэмэлт, өөрчлөлт оруулах талаар саналаа УИХ-д хүргүүлэхээр төлөвлөж буйг тэрбээр дурдаад, хуулийн төслүүдийг хэлэлцэн батлахад анхаарал хандуулан ажиллахыг хүссэн.
Уулзалтын үеэр сонгуулийн хуулийн өөрчлөлт, хууль хэлэлцэн батлах үед үүсдэг бэрхшээл, хууль хоорондын зөрчил, сонгуулийн зардлыг багасгах, сонгуулийн тогтолцоо, тойрогтой холбоотой асуудлаар санал солилцож, тус байгууллагаас гаргасан зөвлөмжийн талаар ярилцлаа хэмээн Улсын Их Хурлын Хэвлэл мэдээллийн газраас мэдээллээ.
