УИХ-ын чуулганы хуралдаанаар Гурилын гаалийн албан татварыг сэргээх буюу Гаалийн албан татвараас чөлөөлөх тухай хууль хүчингүй болсонд тооцох тухай хуулийн төслийг эцэслэн батлах асуудлыг хэлэлцэж, эцэслэн баталлаа.
Өнгөрсөн 2024 онд зудын хүндрэлтэй холбогдуулан гурилыг гаалийн албан татвараас чөлөөлөх тухай хуулийн төслийг ЗГ-аас УИХ-д өргөн мэдүүлж, 2024 оны тавдугаар сарын 1-нээс хэрэгжиж эхэлсэн байдаг. Харин он гарсны дараа ХХААХҮЯ-наас дотоодын үйлдвэрлэгчид хүнд нөхцөл байдалд орсон тул дээрх хуулийг хүчингүйд тооцох хуулийн төсөл санаачилж, УИХ-д өргөн мэдүүлсэн юм.
Харин өнгөрсөн тавдугаар сард гурилын гаалийн албан татварыг сэргээх тухай хуулийн төслийг эцэслэн батлах байсан ч гишүүдийн ирцээс шалтгаалж, хууль дэмжигдээгүй юм. Улмаар ХХААХҮ-ийн сайд Ж.Энхбаяр хуулийн төслөө яаралтай горимоор хэлэлцүүлэхээр өргөн мэдүүлсэн юм.
Түүнчлэн “Хууль баталсантай холбогдуулан авах зарим арга хэмжээний тухай” Монгол Улсын Их Хурлын тогтоолын төсөлд цаашид авч хэрэгжүүлэх арга хэмжээг тодорхой тусгаж өглөө. ҮҮНД:
- Өрсөлдөөний тухай хууль /Шинэчилсэн найруулга/, Худалдааны тухай болон Демпингийн эсрэг хуулийн төслийг тус тус боловсруулж, 2025 оны намрын ээлжит чуулганы хугацаанд багтаан Монгол Улсын Их Хуралд өргөн мэдүүлэх;
- Улсын стратегийн нөөцөд шаардлагатай 100.000 тонн улаанбуудайн нөөцийг холбогдох хууль тогтоомжийн дагуу бүрдүүлэх;
- Гурил үйлдвэрлэлд нийлүүлэх хүнсний улаанбуудайн чанарыг лавлагаа лабораторийн сорилтын үр дүнд үндэслэн итгэмжлэгдсэн, баталгаажуулах;
- Гурилын үйлдвэрийн суурилагдсан хүчин чадлын ашиглалтыг нэмэгдүүлж, улаанбуудайн гурил, үр тариаг татварын хөнгөлөлттэй нөхцөлөөр экспортлох боломжийг бүрдүүлэн ажиллах;
- Баруун бүс нутгийн газар тариалангийн үйлдвэрлэлийг сэргээх, гурил, тэжээлийн үйлдвэрлэл, хангамжийн тогтвортой байдлыг бий болгох, төлөвлөгөө гаргаж, “Атрын IV” аяны хүрээнд хэрэгжүүлэх;
- Алслагдсан бүс нутгийн гурил, тэжээлийн үйлдвэрлэл, хангалтыг хэвийн түвшинд хүртэлх хугацаанд үнийн өсөлтөд голлон нөлөөлж буй тээврийн зардлыг бууруулах, шаардагдах гурил, малын тэжээлийг тухайн бус нутгийн хилийн боомтоор оруулж үнийн болон хангалтын тогтвортой байдлыг бий болгох.
- Мал, амьтны тэжээл, тэжээлийн нэмэлт болон улаанбуудайн гурилын хангамж, нийлүүлэлт хомсдох, үндэслэлгүйгээр үнэ өссөнийг эрх бүхий байгууллагаас тогтоосныг үйлдвэрлэгчдэд мэдэгдэх, үйлдвэрлэгчдийн зүгээс холбогдох арга хэмжээ аваагүй тохиолдолд гурил, тэжээлийг гаалийн албан татвараас чөлөөлөх тухай хуулийн төслийг Улсын Их Хуралд яаралтай горимоор өргөн мэдүүлэхээр заасан байна.
Сэтгэгдэл (2)