АН-ын ҮБХ 2025 оны наймдугаар сарын 25-нд хуралдаж намын даргаараа УИХ-ын гишүүн О.Цогтгэрэлийг сонгосон. Энэ дагуу түүнийг АН-ын даргаар бүртгүүлэх өргөдлийг өмнөх дарга Л.Гантөмөр Улсын дээд шүүхэд 4 хоногийн дараа гаргасан байдаг юм. Гэсэн ч Улсын дээд шүүх энэ асуудлаар хуралдах тов өдийг хүртэл гаргаагүй байна. Шүүхийн тухай хуульд зааснаар Дээд шүүх нь улс төрийн намыг бүртгэх, бүртгэхээс татгалзах, идэвхгүй болон идэвхтэйд тооцох, татан буулгах, тамга тэмдгийн хяналтын, регистрийн, хувийн хэргийн дугаар, гэрчилгээ олгох, хүчингүй болгох, эдгээртэй холбогдсон бүртгэл болон намын нэрийн сан хөтлөх, лавлагаа олгох зэрэг эрхийг хэрэгжүүлдэг. Намын даргаар О.Цогтгэрэлийг бүртгүүлэх өргөдлийг өгснөөс хойш хагас сар шахам хурлын товыг зарлаагүй байгаа нь АН-ын ерөнхий нарийн бичгийн даргатай холбоотой байх магадлалтай байна. О.Цогтгэрэл намын даргаар сонгогдохдоо генсекийг өөрчлөхгүй гэсэн тохироо хийсэн ч түүнийг Дээд шүүх батламжлахгүй байгаа нь ерөнхий нарийн бичгийн даргыг солих бас нэгэн сонгуулийг АН дотор явуулах шахалтаас үүссэн байж мэдэхээр байгаа юм. Улс төрийн хүрээнд нисээд эхэлсэн “бор шувуу”-гаар бол АН-ын ерөнхий нарийн бичгийн даргаар С.Баярцогтыг “томилбол” О.Цогтгэрэлийг Улсын дээд шүүх намын даргаар батламжилна.

А.Болдбаатар