"GenZ-ийн нүдээр улстөрчид" буланд тавтай морил. Энэ удаад УИХ-ын гишүүн Х.Тэмүүжингийн тухай өгүүллээ. GenZ-д түүний тухай эргэцүүлэл байна.

Үнэний ортой шүү гэж бодох. Ер хэн ингэж хэлэхээс шалтгаалаад худал байтугай үнэн хүртэл олон нүүртэй болдог.

Манай улсын шинэхэн бүрэлдсэн 126 гишүүнтэй парламентад үг нь үнэн сонсогдох, дүр нь шударга харагдах гишүүн Х.Тэмүүжин л байх шиг санагдана. Эсвэл зүгээр л Монголын ууган их сургуульд хуульчдыг бэлтгэж, багшилж явсан 10 гаруй жилийнх нь замнал надад нөлөөлөөд байна уу. Юмс хэдий хөгжсөн ч хүний сэтгэлийн төрхийг бидэнд харуулж чадах биш. Уг нь УИХ-ын гишүүн Х.Тэмүүжингийн хийдэг "Reel" сонирхол татахуйц байсан юм. Одоо бол АН-ын жагсаалтаар УИХ-ын гишүүн болоод контентоо үргэлжлүүлэх завгүй болсон байх л даа. 

Хууль тогтоох дээд байгууллагад есөн жорын хүмүүс цуглачихсан шивэр авир гэж буй цаг дор мэргэжлийн хүмүүс л тэдэн дундаа шигтгээ болж харагдах арга ч үгүй юм шиг. Х.Тэмүүжингийн улс төрийн ид үе нь 2000-аад оны хамгийн шарх сорвитой үе юмдаг уу даа. 2008 оны долдугаар сарын цуст өдрийг бичсэн цагдаагийн алба хаагчийн дэвтэр өөрт нь байгаа гээд л шуугиулж, эрх баригч намыг мэдээлэл хийтэл нь сандаргаж явсан түүхтэй л юм билээ. Одоо УИХ-ын гишүүдийн орлого яаж нэмэгдэж эсвэл буурч байгааг бид нүдээрээ харж байгаа биз. Энэ нь Х.Тэмүүжингийн оролцсон хуулийн төслөөс эхлэлтэй зүйл байжээ. Тухайн үед Сонирхлын зөрчлийн хуультай болсноор албан тушаалтнууд АТГ руу мэдүүлгээ хүргүүлдэг болсон аж. Парламент хуульчтай байхын давуу талыг монголын ард түмэн үзээгүй биш үзсэн. Н.Алтанхуягийн тэргүүлж байсан Шинэчлэлийн Засгийн газрын үед Хууль зүйн сайдаар Х.Тэмүүжин томилогдож, улмаар Эрүүгийн хууль тэргүүтэй олон хуулийг шинэтгэж басхүү гацаанаас гаргаж, хөдөлгөж чадсан юм билээ. Гэвч анаж байдаг нүдэт, араа шүд нь яралзаж байдаг өрсөлдөгчид хаана мундах вэ. Тэр цэвэрхэн нэртэй улстөрч бас хуульч, бас багш байхаа больж, янз бүрийн хов гэдэг яг л гав дөнгө мэт түүнийг дагах болсон байна. Тэгээд л яах вэ? удахгүй шүү дээ. Шинэчлэлийн Засгийн газар ч унасан. Ийнхүү тэрбээр 2008-2016 он хүртэл УИХ-ын гишүүн байж, зарим нэг УИХ-д домог болтлоо сууж байгаа гишүүдийг бодвол 2024 он хүртэл буюу 8 жил сул чөлөөтэй "иргэн" болж үзжээ. 

Толгой өндийх завгүй тэмцлээс ангижирч Хууль тогтоох байгууллагын гадна үлдсэнээрээ тэр нийгмийн зүдүүрийг анзаарч чадсан болов уу.

Монголын төр "гажсан" гэдгийг тэр хэлж байгаа. Монгол Улс төрийн гурван өндөрлөг гэдэг хаана ч байхгүй хаантай болсон талаар шүүмжилсэн. Ерөнхий сайдын сандлыг парламентын толгой дээрээс авч хаях санаачлага ч гаргаад амжсан. Энэ нь угтаа зүгээр нэг сандал буулгаж байгаа асуудал бус эрэмбэ, тогтолцооны шугам л даа.

Одоо АТГ түүнийг чиглэж байна. Бүрэн эрхийн асуудал нь хүртэл хөндөгдөөд ирнэ. Чухамдаа шударга харагдах, үнэн сонсогдох Х.Тэмүүжин гэж яг ямар хүн бэ? Яагаад онилогдов? 

М.Гал