Монголын уул уурхайн үндэсний ассоциациас стратегийн орд газруудыг төрд авах асуудлаар мэдээлэл өглөө. Энэ үеэр Бизнесийн холбоодын нэгдсэн зөвлөлийн гишүүн, Монголын үнэт цаасны арилжаа эрхлэгчдийн холыооны Удирдах зөвлөлийн дарга Г.Энхбат дараах байр суурийг илэрхийлэв.  

Тэрбээр "Засгийн газар, УИХ-ын бодлогыг харахад хөрөнгө оруулалтын орчныг хэт их оролдож, хэт их эвдээд байна уу даа гэсэн эмззэглэл байна. Монгол Улсын эдийн засгийн 30 хувь, дам нөлөөгөөр 70 орчим хувь нь уул уурхайгаас хамаарч байгаа. Ийм эмзэг үед том шийдвэр гаргаж, гадаад дотоодын хөрөнгө оруулагчдад мессеж өгөх нь эрсдэлтэй.

Бизнес нь томорчихвол төр хурааж авах эрсдлээс айгаад бизнесүүд үйл ажиллагаагаа хумих, зогсоох явц ажиглагдана. Төгрөг бол олон улсад хөрвөдөг вальют биш. Бид гадаадын хөрөнгө оруулалтыг татаж байж л цаашаа явна. Манай улсын иргэд ААН-үүдээсээ 2 дахин их зээлтэй байна. Энэ нь цаанаа бизнес явахгүй байгааг л харуулж байгаа. Уул уурхайг дагасан бизнесүүд өргөжихөд гадаад хөрөнгө оруулалт чухал. Гэтэл төр эргэж буцсан, гэнэтийн шийдвэр гаргах нь том эрсдэл дагуулна.

Гадаадын хөрөнгө оруулалтын 70 орчим хувийг татаж байгаа уул уурхайн салбарт хэт ширүүн хандах нь зохимжгүй. Үндэсний баялагийн санг бол дэмжиж байгаа. Энэ нь татвараар байх уу, ногдол ашгаар байх уу гэдэг нь өөр асуудал. Харин ордуудын 34 хувийн эзэмшил гэхгүйгээр тодорхой хуулиудад өөрчлөлт оруулаад авчхаж болох асуудал. Аливаа бизнест хувь эзэмшил гэдэг маш эмзэг зүйл. Төрийн эзэмшил орж, хувийн хэвшилтэй хэт зууралдаж, хувийн хэвшлийн үйл ажиллагааг боомилох нь зохимж муутай гэж үзэж байгаа. Төр 34 хувийг эзэмших гэхээсээ илүү хүн бүрд нээлттэй Монголын хөрөнгийн зах зээл болон бусад бирж дээр арилжаалах юм бол ирээдүйд банкны системтэй өрсөлдөхүйц хүчирхэг хөрөнгийн зах зээл бий болно. Санхүүгийн зах зээл ч тэгш хүртээмжтэй болох том боломжууд харагдаж байгаа" гэв.