Хаврын чуулган эхлэхийн өмнө Монгол Улсын гурав дахь Ерөнхийлөгч Н.Энхбаяр УИХ-ын 58 дугаар тогтоол, түүний дагуу БНХАУ-ын Харбин хотноо байгуулагдсан хэлэлцээрүүд Монгол Улсыг 35 их наяд төгрөгийн алдагдалд оруулж байна хэмээн мэдэгдсэн. /Өмнөх мэдээг унших бол/

Тэгвэл УИХ-ын гишүүн, Хууль зүйн сайд асан Б.Энхбаяр өчигдөр “Лхагвын тойм” нэвтрүүлэгт орохдоо энэхүү хэлэлцээрийг байгуулахаас өмнө ажлын хэсгүүдийн уулзалтын протоколоос “Чайна энержи” компанийн тавьсан саналуудыг ил гаргасан юм. Түүний үзүүлсэн протоколоос харвал ажлын хэсэг долоон удаа уулзалт хийсний эцэст Хэлэлцээр байгуулжээ.

Энэ протоколд дурдсанаар БНХАУ-ын “Чайна Энержи” компани урт хугацааны худалдан авах, худалдах гэрээ хийх гэж байгаа учир Уул уурхайн бүтээгдэхүүний биржийн тухай хуульд заасны дагуу жигнэсэн дундаж үнээр Монгол Улсаас нүүрс худалдан авах хүсэлтээ удаа дараа илэрхийлж харин энэ үнээс 5 хувийн хөнгөлөлт эдлэх сонирхлоо илэрхийлсэн байна.

Үүнийг тодруулж хэлбэл нүүрсний үнэ тонн тутам нь өнөөдрийнх шиг 100 ам доллар байлаа гэж тооцоход “Чайна энержи” 95 ам.доллараар худалдан авах санал манай улсад тавьсан гэсэн үг.

Харин Харбины хэлэлцээрээр энэ үнийг 40 хувь орчим бууруулж нэг тонн нүүрсийг 16 жилийн турш 53 доллараар худалдах гэрээг Аж үйлдвэр, эрдэс баялгийн сайд Ц.Туваан хийсэн байдаг юм. Үүнийг л Монгол Улсын гуравдахь Ерөнхийлөгч Н.Энхбаяр Монгол Улсад 35 их наядын алдагдалтай гэрээ хийсэн гэж байсан ажээ. Юутай ч ийм сураг ажиг төдий байсан зүйлийг УИХ-ын гишүүн Б.Энхбаяр протоколоор баталлаа. “Чайна Энержи” нүүрсний жигнэсэн үнээс 5 хувийн л хөнгөлөлт эдэлье гэж байхад нь Монгол Улсын ямар албан тушаалтан 40 хувийн хөнгөлөлт эдлүүлсэн бэ гэдэг нь харин дараагийн сэдэв болж үлдэж байна.

А.Болдбаатар