Монгол Улсын 34 дэх Ерөнхий сайд Г.Занданшатарын гаргасан хүсэлтийн дагуу Үндсэн хуулийн цэцийн их суудлын хуралдаан болж байна. Энэ үеэр УИХ-ын дарга Х.Булгантуяа дараах мэдээллийг өглөө. 

Тэрбээр "Ерөнхий сайдыг огцрох эсэх асуудлыг хэлэлцэх үед бид нар ингэж ярьж байсан байна. Ирцийн хувьд би үнэхээр санаа зовсон. Энэ бол 10 хоногийн дотор УИХ хэлэлцэж шийдвэрлээд, тогтоолоо гаргах ёстой. Цаг хугацаатай. 126 гишүүнээс даргалах хүн байна уу гэхэд, “Би даргалъя” гэж гараа өргөөд даргалаагүй. УИХ-ын тухай хуулийн хүрээнд, чиг үүргийнхээ дагуу тухайн өдрийн хуралдааныг даргалсан гэсэн үг. Хэрвээ тэр өдөрт багтаан 10 хоног дотроо хэлэлцэн шийдвэрлээгүй бол хуралдаан даргалагч би бас Үндсэн хууль зөрчсөн болоод энд дуудагдах байсан байх. Хуралдаанд би даргалагчийн хувьд тухайн үед чиг үүргээ хэрэгжүүлж, 10 хоногийн дотор хэлэлцэх Үндсэн хуулийн заалтыг хуулиа хүндэтгээд хэрэгжүүлэхийг зорьсон. Гэтэл хэлэлцэх гэж байсан асуудал дээр Ерөнхий сайд өөрөө энэ томъёоллыг “Үндсэн хууль зөрчсөн байна” гэсэн дүгнэлт гаргаж өгөөч гээд хүмүүсээр хаа сайгүй яриулж байна. Мөн “Энэ бол Үндсэн хууль зөрчих гэж байна шүү” гэж УИХ-ын гишүүдийн бие дааж шийдвэр гаргах эрхэд халдсан. Би тэгж үзэж байна.

Энэ үгнээс маш олон УИХ-ын гишүүн айсан. Нээрээ би Үндсэн хууль зөрчих гээд байгаа юм болов уу гэх айдас бий болсон. Би аргаа бараад индэр дээрээс тайлбарласан.  

Ж.Эрдэнэбатын, Н.Алтанхуягийн Засгийн газрыг огцруулахдаа ТББХ-ны санал дүгнэлтийг үндэслэж байсан. Тэгвэл яагаад Г.Занданшатар гэдэг хүн яг энэ Үндсэн хуулиар явахад ийм нөхцөл байдал үүсэв гэдгийг та бүхэн маань сайн бодож үзээрэй. Шууд дамжуулалт байхгүй байгаа учраас би үүнийг гараад олон нийтэд ярих ёстой юм байна гэж бодлоо. Хууль ижил тэгш үйлчлээсэй гэж би бодож байна. Үндсэн хууль зөрчсөн гэдгийг нэг алх тогшиж шийдээд, албан тушаалаас нь чөлөөлөөд ард түмний дайсан болгох шийдвэр гаргах гэж байхад харамсалтай нь би өөрөө өмгөөлөхөөс өөр аргагүй нөхцөл байдалд байна" гэв.