Аваргуудын лигийн зургаа дахь тойргийн хамгийн сонирхолтой тулаануудын нэг Атлетик Бильбао болон Пари Сен-Жермен багуудын хооронд мөн энэ сарын 10-нд Бильбаод болно. Европын тавцанд гарч ирэх болгондоо асуудалтай тулгардаг баскийн “Арслангууд” энэ жил ч ялгаагүй бэрхшээлтэй нүүр тулж байна. Тэд Карабахыг талбайдаа 3:1-ээр буулгаж авсан ч Славия Прагатай 0:0-ээр тэнцэж, Арсенал, Боруссиа Дортмунд, Ньюкасл зэрэг том багуудад ялагдсан. Үлдсэн гурван тоглолтоос дор хаяж долоон оноо авах шаардлагатай бөгөөд үндсэн бүрэлдэхүүн эвтэйхэн үедээ тоглож чадвал тэд хэнтэй ч өрсөлдөх хүчтэй гэдгийг баталдаг. Нико Вильямс, Унаи Симон, Аюмерик Ляпорте, Дани Вивиан зэрэг ЕВРО-2024-ийн аваргуудтай болохоор багийн потенциал өндөр боловч гэмтлийн асуудал тогтмол саад болсоор байна.

Харин эсрэг талд нь аваргаа хамгаалагчид болох Пари Сен-Жермен уламжлалт аваргуудын сэтгэлзүйгээ илүү тод харуулж байна. Өнгөрсөн улиралд таван тоглолтын дараа ердөө дөрвөн оноотой байсан ч алдаагаа дүгнэж, энэ жил 12 оноо цуглуулаад байна. Луис Энрикегийн удирдсан баг Аталантаг 4:0, Барселонаг 2:1, Байер Леверкузенийг 7:2, Тоттенхэмийг 5:3-ээр буулган авч, лигийн хамгийн аюултай довтолгоог бий болгожээ. Гэхдээ тэдэнд ч асуудал бий. Ашраф Хакими болон Дезире Дуэ гэмтэлтэй дээрээс Илля Забарной, Люкас Эрнандес нар торгуулын шийтгэлтэй. Гол хаалгач Люкас Шевалье, зүүн жигүүрийн хамгаалагч Нуно Мендеш ч тоглолтод оролцохгүй. Гэсэн хэдий ч энэ улиралд олон тоглолтыг бүрэлдэхүүний дутагдалтайгаар хожсон нь Пари Сен-Жерменийг дахин том фаворит болгож байна.

Түүхийн хувьд хоёр баг 2011–12 оны Европа Лигийн хэсэгт учраа таарч Бильбаод 2:0, Парист 4:2 харьцаатай эзэн багууд ялалт байгуулж байсан удаатай. Тэр жил Атлетик Бильбао шувтаргын тоглолт хүртэл явсан бол Пари Сен-Жермен катарийн эрин үеийнхээ эхний алхмуудыг хийж байсан билээ. Энэ удаагийн тулаан хоёр багийн өөр өөр философи, өөр өөр зорилтыг илтгэн харуулах бөгөөд Парисчууд топ-8-д шалгарах эсэх нь Бильбаогийн дарамт даах чадвараас ч шалтгаалах нь дамжиггүй.