Зүүн Азийн Супер Лигийн ээлжит тоглолтод МУГТ Б.Билгүүн 31 оноо авч багаа тэргүүлсэн ч “Хасын Хүлэгүүд” баг хоёр дахь ялагдлаа амсав. Монгол улсын Үндэсний Дээд Лигийн аварга “Хасын Хүлэгүүд” баг Зүүн Азийн супер лигийн тэмцээнд эх орноо төлөөлөн анх удаа оролцож буй.

Тэд өнөөдөр БНСУ-ын "Чанвон" хотноо зочилж, БНСУ-ын дээд лигийн аварга “Changwon LG Sakers” багийн эсрэг ээлжит тоглолтоо хийлээ.

“Хасын Хүлэгүүд” баг арваннэгдүгээр сарын 5-ны өдөр Улаанбаатар хотноо болсон өмнөх тоглолтод 105:77 харьцаатайгаар хожоод байсан ч, энэ удаа 98:83-аар ялагдал хүлээлээ. Ингэснээр "Хасын Хүлэгүүд" баг хэсгийн 5 тоглолтоос 2 дахь ялагдлаа амсаж байна.

Энэхүү тоглолтод МУГТ Б.Билгүүн сэлгээнээс 31 оноо аван багаа тэргүүлсэн бол Ян Миллер 19, Б.Барсболд 12, О.Жонсон 11 оноо тус тус авчээ. “Хасын Хүлэгүүд” энэхүү тоглолтод хожигдсон ч тэмцээний С хэсгийг Тайванийн “New Taipei Kings” багийн адил 3 хожил, 2 хожигдол амжилтаар тэргүүлж байна.

Зүүн Азийн Супер Лигийн хэсгийн тоглолтын хүрээнд 6 тоглолт хийгдэх бөгөөд Үндэсний Дээд Лигийн аваргууд маань зочлон тоглолтуудаа 1 хожил 2 хожигдолтойгоор өндөрлүүллээ. Харин тэд хэсгийн сүүлийн тоглолтоо ирэх оны хоёрдугаар сарын 11-нд Улаанбаатар хотноо Япон улсын “Alvark Tokyo” багийн эсрэг хийх юм. Тухайн тоглолтын үр дүнгээс хамаарч "Хасын Хүлэгүүд" баг цааш хасагдах шатанд шалгарах эсэх нь тодорхой болно.