ӨМӨЗО-ны Шилийн гол аймагт жил бүрийн хаврын тэргүүн сард уламжлал болгон зохион байгуулагддаг “Алтан бүс”-ийн төлөөх шилдэг бөхчүүдийн барилдаан болох гэж байна. Энэ жил уг барилдаанд Монголоос 16 бөх хүч үзнэ. 

Барилдах бөхчүүдийн 10 нь улсын цолтой, 6 нь аймгийн цолтой бөх байна. Тодруулбал, Улсын заан Б.Бат-Өлзий, Д.Анар, Б.Серик, С.Сүхбат, Улсын харцага Т.Баасанхүү, Улсын начин Ч.Батчулуун, Ж.Ням-Эрдэнэ, Т.Дүгэрдорж, Т.Түвшинтөгс, Д.Тогтохжаргал, Аймгийн хурц арслан Д.Алтанцоож, Б.Өсөхбаяр, Аймгийн арслан Ө.Батсуурь, Ц.Төмөрцоож, Аймгийн заан Н.Ширчинхүү, Аймгийн начин Б.Гончигсүрэн нар барилдана. 

Уг барилдаан нь анх 2008 онд “Хасар” нэртэй зохион байгуулагдаж эхэлсэн бөгөөд 2019 оноос “Алтан бүс” нэртэй болсон түүхтэй. Энэ жил “Алтан бүс” нэрийн дор 7 дахь удаагаа зохион байгуулагдаж байна.

Өнгөрсөн хугацаанд энэхүү нэр хүндтэй барилдаанд Монгол Улсын дархан аварга Н.Батсуурь, улсын аварга П.Бүрэнтөгс, Ч.Санжаадамба, О.Хангай, улсын арслан Р.Пүрэвдагва нар түрүүлж байжээ.

“Алтан бүс” нэртэй болсноос хойших 6 удаагийн барилдааны 4-т нь Монгол Улсын бөхчүүд түрүүлсэн бол Өвөр Монголын бөхчүүдээс Цагаанзаан, Өлзийбаатар нар аваргалж байв.

Л.Баяр