БАРИМТ 1
Түүнийг Цэрэндашдоржийн Магалжав гэдэг.
БАРИМТ 2
1977 оны 10 дугаар сарын 2-нд төрсөн.
БАРИМТ 3
Сүхбаатар аймгийн Мөнххаан сумын харьяат, Монгол Улсын заан цолтой бөх юм.
БАРИМТ 4
1996 онд Аймгийн арслан цол хүртсэн.
БАРИМТ 5
2001 оны АХ-ын 80 жилийн ойн баяр наадамд улсын начин Ж.Чулуунаар дөрөв, улсын начин Б.Адъяахүүгээр тав давж "Монгол улсын начин" болжээ.
БАРИМТ 6
2004 оны АХ-ын 83 жилийн ойн баяр наадамд аймгийн арслан Ж.Оргилоор дөрөв давж, улсын харцага Г.Ганхуягт тавын даваанд өвдөг шорооджээ.
БАРИМТ 7
2006 оны АХ-ын 85 жилийн ойн баяр наадамд аймгийн арслан (улсын харцага) Ш.Мөнгөнбаатараар дөрөв, улсын начин Д.Лхагвадоржоор тав, улсын харцага Т.Мөнгөнцоожоор зургаа давж, долоогийн даваанд улсын харцага (улсын гарьд) Д.Рагчаад өвдөг шороодон шөвгөрч "Монгол улсын харцага" болсон.
БАРИМТ 8
2016 онд 2006 оны наадмаар улсын гарьд Д.Рагчаа сэргээш хэрэглэсэн байсан тул АХ-ын 95 жилийн ойн баяр наадмын өмнөхөн давааг нь нөхөн олгож "Монгол улсын заан" цолыг хүртсэн.
БАРИМТ 9
2016 онд мөн 2004 оны наадмаар улсын харцага Г.Ганхуяг сэргээш хэрэглэсэн байсан тул АХ-ын 95 жилийн ойн баяр наадмын өмнөхөн давааг нь нөхөн олгожээ.
БАРИМТ 10
Ц.Магалжавыг Сүхбаатар аймгийн Мөнххаан сумын харьяат Буянтогтох аваргын удам гэдгийг хүмүүс тэр бүр мэддэггүй.
БАРИМТ 11
Тэрбээр бага насаа өвөө, эмээ дээрээ өнгөрүүлсэн болохоор нутгийн хөгшчүүдээс өвөг эцгийнхээ тухай олон сайхан дурсамж сонсож өссөн гэдэг. Тиймдээ ч бяцхан хөвгүүн байхаасаа л өвөг эцэг шигээ мундаг бөх болохсон гэж мөрөөддөг байсан хэмээн дурссан байдаг.
БАРИМТ 12
Эрдэнэт хотод нэгдүгээр ангид орсон тэрээр “Хангарьд” клубын багш, дасгалжуулагч Раднаабазарын нүдэнд өртсөнөөр бөх болох гараагаа эхэлж байжээ.
БАРИМТ 13
Бөхийн өмсгөл өмсүүлэн зургийг нь дарсан багш нь “энэ хүү бөх болноо” хэмээсэн нь түүнийг бөхийн амьдралд эргэлт буцалтгүй оруулсан хамгийн том урмын үг байсан гэдэг.
БАРИМТ 14
Түүнээс хойш арван жилийн дараа үндэсний бөхийн Улсын аваргад орж аравдугаар байр, УБИС-д оюутан болсныхоо дараа Улсын аваргад хүч үзэж тавдугаар байранд орсон нь түүнд ихээхэн урам зориг, итгэл найдвар өгчээ.
БАРИМТ 15
Тэрбээр өвөг эцэг Буянтогтохынхоо эдэлж хэрэглэж байсан дээл, хувцсыг нь нандигнан хадгалж, сайн бөхийн удам гэдгээрээ бахархаж явдаг нэгэн.
БАРИМТ 16
Түүний аав Цэрэндашдорж уг нь Архангай аймгийн Баян-Уул сумын харьяат. Гэвч тэрээр Архангайн Баян-Уулын бус Сүхбаатарын Мөнххааны харьяат гэж зүлэг ногоон дэвжээнээ дуудуулдаг нь учир жанцантай.
БАРИМТ 17
Цэрэндашдоржийн Магалжав гэгдэн аавынхаа нэрийг дуурсгаж яваа болохоор аварга өвөөгийнхөө нэрийг бөхийн ногоон дэвжээнээ үл мартуулах үүднээс Сүхбаатар аймгийн Мөнххаан сумын бөх хэмээн дуудуулж барилддаг түүний бөхийн удам ингээд ч дуусдаггүй.
БАРИМТ 18
Зууны манлай заан Д.Долгорсүрэн түүний ээжийн талын хамаатан. Анх түүнийг УАШТ-д оролцоход нь Д.Долгорсүрэн зааны хүү гэж гэцгээж байсан нь бөх сонирхогчдын санамсаргүй дүгнэлт биш байв. Тэрбээр улсын начин Д.Сэржбүдээтэй ихрүүд шиг адилхан харагддаг нь аргагүй.
БАРИМТ 19
Арван найман настайгаасаа чөлөөтийн Ганбаатар багшийн удирдлаган дор хичээллэж эхэлсэн тэрээр Их спортод чамгүй амжилт үзүүлжээ. 2006 онд Монголд болсон Чөлөөтийн сонгомол бөхийн Дэлхийн Оюутны аваргаас алт, Азийн аваргаас хүрэл, энэ жилийн улсын аваргаас мөнгөн медаль тус тус хүртсэн юм.
БАРИМТ 20
2000 оны цагаан сарын барилдаанд А.Сүхбатыг өвдөг шороодуулж, Б.Бат-Эрдэнэ аваргатай үзүүр түрүүнд үлдэхэд нь бөх сонирхогчид түүнийг улсын цолонд хүрэх бөх гэцгээж, тааварт оруулах болсон юм.
БАРИМТ 21
Харамсалтай нь Магалжав тэр жилийнхээ наадмаар начин болж чадсангүй. 1999 онд бэлтгэл хийж байхад нь хажууд нь барилдаж байсан улсын начин И.Ёндонсамбуу тахиман дээр нь хажуу талаас дарж унаснаас түүний хөл нэлээд хүнд бэртсэн бөгөөд энэ бэртэл нь төгс эдгэхгүй байсны улмаас олигтой бэлтгэл, сургуулилт хийж чадахгүй байлаа.Ингээд улсын аварга Д.Сумьяабазарт амлагдан унасан юм.
БАРИМТ 22
2000 оны наадмаар улсын цолгүй есөн залуу бөх барилдсанаас ганц Ц.Магалжав л ийнхүү цолгүй хоцорчээ. Харин дараа жилийн наадмаар түүнийг улсын цолонд хүргэнэ гэж байсан бөх амнаасаа буцаж, хадам ах улсын начин Б.Адьяахүү нь түүнийг начин цолны босгоор алхуулсан байдаг.
БАРИМТ 23
Тэрбээр бөхийн өргөөнд хоёр үзүүртэй.
БАРИМТ 24
2000 оны сар шинийн барилдаанд тэрбээр Улсын начин Д.Сэржбүдээ, И.Доржсамбуу, Б.Одгэрэл, Улсын заан Ц.Баярсайхан, Улсын аварга О.Балжинням, Улсын заан А.Сүхбат нарыг хаян үзүүрлэж байв. Түрүү бөх Дархан аварга Б.Бат-Эрдэнэд унасан.
