Өмнөд Солонгосын кино, телевизийн салбар хиймэл оюун ухааны (AI) технологийг өргөн ашиглаж эхэлснээр бүтээл туурвил, продакшны арга барилд томоохон өөрчлөлт орж байна. Сүүлийн үеийн чиг хандлагаар AI нь кино үйлдвэрлэлийн зардлыг бууруулах, зураг авалтын зарим процессыг хурдасгах, мөн дүрслэлийн эффект, дижитал контент бүтээхэд өргөн ашиглагдаж байна. Гэвч энэ нь уран бүтээлчдийн ирээдүй, ажлын байр болон бүтээлч эрх чөлөөнд хэрхэн нөлөөлөх талаар маргаан дагуулж эхэлжээ.

K-кино, телевизийн экспорт 2019-2024 оны хооронд хоёр дахин өссөн бөгөөд өнгөрсөн жил тус улсын аудиовизуал салбар дотоодынхоо эдийн засагт 16.4 тэрбум ам.доллар нэмж, 291,100 ажлын байрыг дэмжиж байгаа судалгаа гарчээ. 

2026 оны Каннын кино наадмын үеэр AI ашигласан бүтээлүүд болон AI-тай холбоотой хэлэлцүүлэг гол сэдэв болж, салбарын томоохон уран бүтээлчид хоёр хуваагдсан байр суурь илэрхийлсэн байна. Зарим найруулагчид AI-г “шинэ хэрэгсэл” хэмээн дэмжиж байгаа бол нөгөө хэсэг нь хүний бүтээлч байдлыг сулруулна гэж анхааруулжээ.

Өмнөд Солонгосын зүгээс мөн AI технологийг кино болон контент үйлдвэрлэлийн стратегийн чухал салбар болгон хөгжүүлж байгаа бөгөөд засгийн газар, хувийн хэвшил хамтран хиймэл оюун ухаанд суурилсан чип, программ хангамж, продакшны шийдлүүдэд ихээхэн хөрөнгө оруулж байна. Мэргэжилтнүүдийн үзэж байгаагаар Өмнөд Солонгосын кино салбар сүүлийн жилүүдэд дэлхийд өрсөлдөх чадвараа нэмэгдүүлж, “Squid Game” зэрэг олон улсын амжилттай бүтээлүүдийн дараа AI технологи нь дараагийн хөгжлийн гол хөдөлгөгч хүч болох төлөвтэй байна.

Гэсэн ч зарим найруулагчид AI ашиглалт хэт нэмэгдвэл уран бүтээлийн “хүний сэтгэл хөдлөл, бодит мэдрэмж” алдагдаж болзошгүй гэж анхааруулж, зохицуулалт, ёс зүйн стандарт шаардлагатайг онцолжээ.

Л.Баяр