Орхон аймаг 2025–2026 оны хичээлийн жилийн элсэлтийн ерөнхий шалгалт болон олон улсын стандарт шалгалтад өндөр амжилт гаргасан сурагчид, тэднийг бэлтгэсэн багш нарыг нийт 100 сая төгрөгөөр урамшууллаа. Энэ жилийн элсэлтийн ерөнхий шалгалтад Орхон аймгийн долоон сурагч монгол хэл, газар зүй, англи хэл, орос хэлний хичээлээр 800 оноо авсан байна.

Мөн IELTS, Кембрижийн олон улсын математик, физикийн шалгалт, их, дээд сургуульд элсэхэд ашигладаг SAT зэрэг олон улсын стандарт шалгалтад өндөр амжилт үзүүлж, элсэлтийн ерөнхий шалгалтын 800 оноотой дүйцэхүйц үнэлгээ авсан 38 сурагч урамшуулал хүртжээ.

Эрдэнэт хотын элсэлтийн ерөнхий шалгалтын аймгийн дундаж хэмжээст оноо 2025 онд 516.85 байсан бол 2026 онд 527.04 болж, 10.19 оноогоор өссөн байна. Энэ өсөлтийг боловсролын чанарыг сайжруулах, сурагчдын өрсөлдөх чадварыг нэмэгдүүлэхэд чиглэсэн бодлого, хөрөнгө оруулалтын үр дүн хэмээн онцолжээ.

Л.Баяр