2026 оны долдугаар сарын 18-ны өглөө Өвөр Монголын Өөртөө Засах Орны 36 дахь удаагийн аялал жуулчлалын Наадам Шилийнгол аймгийн Шилийнхот хотын Наадам соёлын цэцэрлэгт хүрээлэнд нээлтээ хийжээ. Үүнтэй зэрэгцэн Өвөр Монголын биет бус соёлын өвийн бүтээгдэхүүний сарын аян эхэлсэн байна. Энэ удаагийн Наадмыг “Өвөр Монголоор аялж, Наадамтай учиръя” уриан дор зохион байгуулж байна.

Үндэсний хэмжээний биет бус соёлын өвд бүртгэгдсэн Наадам нь тал нутгийн соёлын үнэт өв төдийгүй Хятадын олон угсаатны нэгдэл, соёлын харилцан уялдааг илэрхийлдэг чухал уламжлал хэмээн онцолжээ. 

Энэ жилийн арга хэмжээнд уламжлалт зан заншил, спортын тэмцээн, орчин үеийн аялал жуулчлалын шинэ туршлагыг хослуулсан байна. Морин уралдаан, сур харваа, бөхийн барилдаанаас гадна хөгжим, мотоцикл, хоол хүнс, гэр бүл, нисэхийн чиглэлээр тусгайлан зохион байгуулсан Наадам, жуулчдад зориулсан дөрвөн төрлийн тэмцээн багтжээ.

Мөн биет бус соёлын өвийн урлан, үндэсний тоглоом, уламжлалт хувцас өмсөн зураг авахуулах зэрэг 20 гаруй интерактив үйл ажиллагаа зохион байгуулж, жуулчдад тал нутгийн соёлтой биечлэн танилцах боломж бүрдүүлсэн байна. Нээлтийн ёслолд Өвөр Монголын 12 аймаг, хотын төлөөлөл оролцож, үндэсний хувцсаар гоёсон олон үндэстний төлөөлөгчид дуу хуур, бүжгээрээ тал нутгийн олон талт соёлыг харуулжээ. Мөн 100 контент бүтээгч, 100 олон улсын жуулчин хүрэлцэн ирж, Наадмын үйл явдлыг дэлхий нийтэд сурталчлах юм байна.

Нээлтийн тоглолт “Тал нутгийн дуугаар дэлхий дахиныг угтах”, “Умард хилийн шинэ өнгө аясаар шинэ замд гарах”, “Энх цагийн дор хамтдаа ирээдүйг бүтээх” гэсэн гурван хэсгээс бүрджээ. Тоглолтын үеэр уртын дуу, морин хуурын аялгуу, морьт үзүүлбэр зэрэг үндэсний урлагийн тоглолтууд толилуулсан байна.

Энэ жилийн Наадмын хүрээнд мөн аялал жуулчлалын 13 тусгай маршрут гаргажээ. Арга хэмжээг Өвөр Монголын Соёл, аялал жуулчлалын газар болон Шилийнгол аймгийн захиргаа хамтран зохион байгуулж байгаа бөгөөд наймдугаар сарын сүүл хүртэл үргэлжилнэ.

Л.Баяр