ОХУ-ын Холбооны аюулгүй байдлын алба (ФСБ) Украины тагнуулын байгууллагын захиалгаар Оросын өндөр тушаалын цэргийн албан тушаалтны амь насанд халдахыг завдсан хэрэгт Молдавын 21 настай иргэнийг баривчилснаа мэдэгджээ.
Оросын талын мэдээлснээр, Молдавын иргэн Николай Кочу нь есдүгээр сарын 3-нд Саратов мужийн Энгельс хотын ойролцоох Пробуждение сууринд Оросын Батлан хамгаалах яамны өндөр тушаалын цэргийн албан хаагч руу буудсан байна. Тэрбээр дор хаяж зургаан удаа буудсан бөгөөд халдлагад өртсөн албан тушаалтан амьд үлдэж, эмнэлэгт хүргэгдэн эмчилгээ хийлгэж байгаа аж.
Сэжигтэн 2025 онд Украины тусгай албанд элссэн бөгөөд 2026 оны эхээр Киевт галт зэвсэг болон тэсрэх хэрэгслийн сургалтад хамрагдсан гэх мэдээллийг Оросын тал гаргажээ. Улмаар зургадугаар сард ОХУ-д нэвтэрч, халдлага үйлдэх бэлтгэлээ хийсэн гэж мөрдөн шалгах байгууллага үзэж байна.
Оросын Мөрдөн шалгах хорооноос мэдээлснээр, сэжигтэнд уг албан тушаалтны нэр, гэрийн хаяг, зэвсгийг хаана байрлуулсан талаарх мэдээлэл болон халдлагын дараа хэрхэн зугтах зааврыг өгсөн байж болзошгүй байна. Түүнчлэн халдлагын төлөө 70 мянган ам.доллар авахаар тохирсон гэж Оросын мөрдөн байцаагчид мэдэгджээ.
Халдлага үйлдсэнийхээ дараа Молдав руу буцахаар оролдож байх үед нь сэжигтнийг ОХУ-ын Астрахань мужид саатуулсан байна. Түүнд хүн амины хэрэг үйлдэхийг завдсан болон хууль бусаар зэвсэг эзэмшсэн гэх үндэслэлээр эрүүгийн хэрэг үүсгэсэн гэж ФСБ мэдээлжээ.
Оросын эрх баригчид уг халдлагын цаана Украины тусгай алба байгаа гэж мэдэгдсэн боловч Украин болон Молдавын эрх баригчид уг мэдээлэлд албан ёсны тайлбар өгөөгүй байна. Тиймээс сэжигтэн үнэхээр Украины тагнуулын байгууллагын даалгавраар ажилласан эсэх нь Оросын талын мэдэгдэлд тулгуурласан мэдээлэл хэвээр байна.
Энэ хэрэг нь Украины дайнд оролцож буй Оросын цэргийн албан тушаалтнууд болон бусад холбоотой хүмүүсийн эсрэг ОХУ-ын нутаг дэвсгэрт гарч буй зорилтот халдлагуудын ээлжит тохиолдол болж байна. Сүүлийн жилүүдэд Оросын цэргийн болон батлан хамгаалах салбарын албан тушаалтнууд руу халдсан хэд хэдэн хэрэг гарсан бөгөөд Москва заримыг нь Украины тусгай албатай холбон тайлбарлаж ирсэн юм.
Сэтгэгдэл (1)