Филиппиний баруун хэсэгт орших Палаван арлын ойролцоо зорчигч тээврийн усан онгоц шатсаны улмаас таван хүн амиа алдаж, 87 хүн сураггүй болоод байна. “MV June Aster” нэртэй усан онгоц лхагва гарагийн орой Манила хотоос Палаван мужийн Короны чиглэлд явж байхдаа галд автжээ. Тухайн үед хөлөг онгоцонд нийт 134 хүн, үүнээс 117 зорчигч, 17 багийн гишүүн байсан байна.

Гал Короны эргийн ойролцоо орон нутгийн цагаар 18:45 орчимд гарсан бөгөөд удалгүй хөлөг онгоцны ихэнх хэсгийг хамарсан байна. Филиппиний Эргийн хамгаалалтын албаныхан ослын дохио хүлээн авсны дараа аврах ажиллагааг эхлүүлжээ. Одоогоор 42 хүнийг аварсан бөгөөд таван хүний амь нас хохирсон нь тогтоогджээ. Үлдсэн 87 хүнийг сураггүйд тооцож, эрэн хайх ажиллагааг үргэлжлүүлж байна. Албаныхан аврагдсан хүмүүсийн тоо нэмэгдэх, сураггүй хүмүүсийн тоо өөрчлөгдөх боломжтойг мэдэгдсэн байна.

Аврах ажиллагаанд цаг агаарын таагүй нөхцөл, хүчтэй давалгаа болон далайн урсгал хүндрэл учруулжээ. Гал гарсан эхний үед хөлөг онгоц Короны эргээс ойролцоогоор дөрвөн далайн милийн зайд байсан боловч хүчтэй урсгалын улмаас цааш түрэгдэн, эргээс 7.68 далайн милийн зайд очсон байна.

Эргийн хамгаалалтын албаныхан шатаж буй хөлөг онгоцноос хүмүүсийг ус руу үсрэн гарсны дараа завиар татан авч, эрэгт хүргэжээ. Ослын газраас аврагчид амьд үлдсэн хүмүүсийг жижиг завинд шилжүүлэн авч явж буй дүрс бичлэгүүд мөн цацагдсан байна.

Одоогоор гал юунаас болж гарсан нь тодорхойгүй байгаа бөгөөд Филиппиний Эргийн хамгаалалтын алба болон холбогдох далайн тээврийн байгууллагууд хамтран шалгалт эхлүүлжээ. Эрэн хайх, аврах ажиллагаа үргэлжилж байна.

Филиппинд арлуудын хооронд зорчигч тээвэрлэхэд усан онгоц өргөн ашиглагддаг. Гэвч тус улсын далайн тээврийн салбарт цаг агаарын хүндрэл, хөлөг онгоцны техникийн байдал, аюулгүй ажиллагааны стандарттай холбоотой асуудлууд өмнө нь ч осол аваар гарах шалтгаан болж байсан юм.

Л.Баяр