Өнөөдөр  11.00 цагт “Зууны мэдээ” сонины “Үндэсний мэдээллийн төв”-д "Дууны оюуны өмчийн эрх” сэдэвт хэвлэлийн бага хурал боллоо.  Тус төвийн судлаачид 15 мянган дууг судалж үзэхэд 14 мянга нь хуулбар дуу болохыг тогтоон чанартай гэх 1000 дуу л үлдсэн талаар мэдээлэв.

Тиймээс энэ талаар  “Монгол гүүшийн чуулган”,  Соёлын газар, Төрийн хэлний зөвлөл, Оюуны өмчийн газар, Монголын зохиолчдын эвлэл, Хөгжмийн зохиолчдын холбоо, Сэтгүүлчдийн нэгдсэн эвлэл хамтран мэдээлэл хийсэн юм. Хуралд Төрийн хэлний зөвлөлийн ажлын албаны дарга Б.Магсаржав, МЗЭ-ийн удирдах зөвлөлийн дарга Х.Чилаажав, МСНЭ дарга Б.Галаарид, МЗЭ-ийн гүйцэтгэх захирал Г.Мөнхцэцэг зэрэг хүмүүс оролцов.

Тодруулбал, “Тусгай салаа” киноны Дэндэвийн дуулснаар олны хүртээл болсон “Ааваа зорино” дуунд “...Усны толио царцахын цагт…” гэсэн мөр бий. Тос, ус хоёрын ялгаа бол царцах, хөлдөх юм. Тос хэзээ ч хөлдөхгүй, ус царцахгүй. Тиймээс энэ дуу нь логикийн зөрчилтэйд тооцогдож байна. Мөн “Гүйгүүл морь” дуунд “...Эхийнхээ хээлэнд зарагдсан унага…” гэсэн ойлгомжгүй мөрт байдаг ба хээл гэдэг нь унага гэсэн үг аж. Түүнчлэн “Богд хан уул” дуунд “Мөнгөн тоногтой хазаар ч юм шиг ээ…, ...Амалгаа сайт гаанс ч юм шиг ээ…” гэсэн мөрүүд бий. Хазаар, гаанстай адилхан уул байна гэж төсөөлөхөд бэрх болохыг хэл бичгийн ухааны мэргэжилтнүүд хэлж байгаа юм. “Толин хул” гэдэг дуунд “...Толин хулын тоосонд хийморь зүггүй наадам...” гэдэг ба эндээс харахад хийморь ч байхгүй, зүг ч байхгүй болчихож байгаа хэрэг. Ийм логик алдаатай дуу олон байна. "Бодит байдал ийм байгаа учраас оюуны өмчийн тухай хөндөхөөс өөр аргагүй болоод байна" хэмээн хуралд оролцогчид дурьдав.