АТГ-ынхан “акул”-уудыг барьж эхэллээ, төрд шургалсан хээл хахуульчдыг илрүүлж байна гэх мессеж олон нийтэд тарсан. Гэтэл сүүлийн үед АН-ын “шүхэр” доор байгаа гэх томчуудын хэрэг замхрах тийшээ хандах боллоо. МИАТ-ын хэрэг тэр чигээрээ хэрэгсэхгүй болсон бол саяхан шуугиан тариад авсан “Хөтөлийн цемент, шохой” төрийн өмчит компанийн захирал А.Шоовдор гэгчийн асуудал олон нийтийн хараанаас мултарч эхэлж байх шиг.

   А.Шоовдор 2004 оноос хойш буюу 9 жил энэ компанийн захирлаар ажиллахдаа “Хөтөлийн занар” компанийг байгуулж, давуу байдлаар “Хөтөлийн цемент, шохой”-д бараа нийлүүлдэг байсан гэх. Түүнийг өөр бусад зургаан хүний хамтаар шалгаж эхэлсэн ч саяхан батлан даалтад гаргалаа. Ер нь А.Шоовдор гэгч МАН-ын ч тэр, АН-ын ч тэр аль ч Засгийн газрын үед албан тушаал дээрээ ганхдаггүй нэгэн аж. Ямартаа түүнд улс төрийн шуурганд өртдөггүй гэж “Босоо Шоовдор” гэсэн нэр өгсөн байх вэ.

    Энэ есөн жилийн хугацаанд түүнийг олон тендерийг өөрийн болон өрөөлийн компанид будилантайгаар өгсөн гэх мэдээллийг АТГ-ынхан шалгаж эхэлсэн ч тэрбээр батлан даалтад гармагцаа “Хөтөлийн цемент, шохой”-н даргаа хийж байгаа гэх мэдээлэл байна. Он гараад өөрийнх нь хээл, хахуультай холбогдсон хэрэг намжисны дараа хийх ажлаа төлөвлөж суугаа сурагтай. “Хөтөлийн цемент шохой” бол олон жил нийтийн хараанаа хол байж чадсан, ашиг орлого сайтай газар. Тиймээс ч А.Шоовдорын оронд томилогдох хүсэлтэй хүн олон байдаг аж. Ялангуяа АН засаг барьж байгаа тул тус намын гишүүд А.Шоовдорын орыг залгах хүсэлт цөөнгүй гаргадаг байна. Тухайлбал, УИХ-ын гишүүн А.Мурат “Хөтөлийн цемент шохой” компанийн захирал болъё гэж саналаа өгсөн байна. Гэсэн ч АН-ынхан энэ асуудал дээр хоёр хуваагдсан байна. Нэг хэсэг нь нэгэнт А.Шоовдор шалгагдаж эхэлсэн тул оронд нь өөр хүн томилох ёстой гэж. Харин нөгөө хэсэг нь А.Шоовдорыг суудал дээр нь үлдээгээд намдаа хандив авах санал гаргасан гэж эх сурвалж хэлж байна.
     Хэрэв энэ мэдээлэл баттай бол батлан даалтад гараад буй А.Шоовдор дахиад л “босоо” нэрээ хамгаалж үлдсэн, ажлаа үргэлжлүүлэн хийсээр байх бололтой. Уг нь түүнийг тендер будлиантуулсан хэрэгтэй холбоотой байж болох цөөнгүй баримтууд байгаа гэх...