Айлын гал голомтыг уландаа гишгэж, орон байраар нь луйвар хийдэг этгээдүүд  олширч байна гэх хардлага нийгэмд бий болоод байна. Өөрөөр хэлбэл, зээл чөлөөлөх нэрийн дор хуулийн дагуу юм шиг хэрнээ ёсзүйгүйгээр иргэдийг мэхэлж хөрөнгөждөг “гарууд” цөөнгүй байгаа нь саяхан болсон нэгэн үйл явцаас тод томруун харагдлаа.

Тэд хүний итгэлийг олохдоо амархан. Гэвч цагаа тулахаар “хүний арьс нөмөрсөн араатан” мэт хайр найргүй цөлмөж оддог. Энэ байдлыг хууль шүүхийнхэн даваргасаар байх уу?. Эсвэл хуулийн дагуу нэрийн дор тэдний гар, хөл болцгоосон байдаг уу?

Ганцхан жишээ дурдахад л ,   ХӨСҮТ-ийн захирал асан Д.Нямхүү  хөгшин ээж, хэдэн дүү нартайгаа амьдардаг Д.Батдэлгэр гэгч эмэгтэйг залилж, орох оронгүй болгожээ.

Д.Нямхүүгийн хууль бус үйлдлээс болоод Д.Батдэлгэр гэгч эмэгтэй  дүүгийнхээ, ээжийнхээ байрыг алдсан гэдгээ хэлж, хууль хяналтынхны шийдвэрийг эсэргүүцэж судсаа хүртэл ханаж явна. Нэгэнт өөрийгөө ч өрөөлийг ч орон гэргүй болгож, амьдрах итгэлгүй болсон энэ эмэгтэйгийн дараагийн алхам юу ч байж болох юм.

Харин хүний амьдралыг орвонгоор нь эргүүлж чаддаг Д.Нямхүү энэ эмэгтэйгээс “хууль ёсны дагуу”  орон гэрийг нь “цэвэрхэн” гэгчийн луйвардчихлаа.

Уг  нь Япон, Солонгос улсад  бусдыг зовлонгоос нь салгаж, зээл чөлөөлж байгаа нэрийдлээр хялбархан залилчихдаг энэ төрлийн бизнес “цэцэглэсэн” байдаг. Өөрөөр хэлбэл, эдгээр улсуудад мөнгө хүүлэгчид гэж айхтар улс бий. Тэдэнд ямар ч аргагүй болсон иргэд ханддаг. Харин тэд хүний  зовлонг өөрт ашигтай болгож хувиргадаг. Товчихноор хэлбэл, ирээдүйд үнэ хүрэх газар, орон байр, эд зүйл юу ч байсан бүгдийг нь барьцаалж бус өөрийнхөө нэр дээр шилжүүлж авдаг.  Улмаар багахан мөнгөөр өрийг нь барагдуулаад, төд удалгүй шилжүүлж авсан хөрөнгөө үнэ хүргэж борлуулдаг.

Тэгвэл энэ мэт гадны улсад байдаг хууль ёсны юм шиг хэрнээ бохир луйвар манай улсад цэцэглээд эхэлчихсэн гэж үү?
Д. Батдэлгэр гэгч эмэгтэйн  хувьд банкинд 2 өрөө байраа тавьчихсан, өртэй байсан. Улмаар банкны өрөө барагдуулахын тулд зээл барагдуулж өгнө гэсэн Д.Нямхүүд хандсан байгаа юм.  Гэхдээ Д.Нямхүүг тэрбээр өөрөө сонгосон юм биш. Тус банкны ажилтан зааж өгсөн гэж байгаа юм. Ингээд  Д.Нямхүүгээс 26 сая төгрөг зээлж байраа барьцаанд өгсөн. Харин Д.Нямхүү хуурамч гарын үсэг ашиглаж байрыг нь залилсан байгаа юм. Төд удалгүй Д.Нямхүү Алимаа гэгч эмэгтэйд уг байраа шилжүүлж өөрөө Англи явсан.  Нэг ийм хүн чанаргүй, ёс зүйгүй луйвар хэд хэдэн хүмүүсийн амьдралыг баллаад орхижээ.

Энэ мэт бусад оронд мафийн сүлжээ маягаар хөгжсөн бизнес манай улсад цэцэглэвэл цөөхөн хэдэн ядуу иргэд ийм төрлийн хүмүүст маллуулсаар байгаад  нэг, нэгээрээ судсаа ханаж зулын гол болох биз.

Тиймээс хар бизнес буюу хар гартай наймаачдыг газар авахаас нь өмнө зогсоох арга тал, дүрэм журмыг батлах цаг болсоныг Төр засгийн эрхэм түшээдүүд тунгаах нь зүйтэй биз ээ.

Д.Батдэлгэр:  Төрийн өндөр албан тушаал эрхэлдэг, бас нэртэй төртэй хүн ийм луйвар хийнэ гэж хэн бодох вэ дээ
Тэрбээр “ХӨСҮТ-ийн захирал Д.Нямхүү зээл чөлөөлдөг гэдгийг сонсоод 2006 оны 9 дүгээр сард очсон. Түүнийг зээл чөлөөлдөг гэж Анод банкны эдийн засагч Н.Оюун-Эрдэнэ зааж өгсөн. Тэгээд нэгдүгээр хорооллын 2 өрөө байрны зээлийг чөлөөлүүлсэн. Төрийн өндөр албан тушаал эрхэлдэг, бас нэртэй төртэй хүн ийм луйвар хийнэ гэж хэн бодох вэ дээ. Анх Д.Нямхүүгээс 26 сая төгрөг зээлээд хүүтэй нь хамт 50 сая төгрөг өгөхөөр очиход надаас 80 сая төгрөг нэхсэн. Ямар учраас ийм их мөнгө нэхэж байгааг лавлахад “Би шүүгч нарт маш их мөнгө зарцуулсан” гэж хэлсэн. Энэ асуудлыг найман жилийн турш хөөцөлдөж явна. Ямар ч үр дүнд хүрсэнгүй.  Энэ хэрэгт Д.Нямхүүгээс гадна БГД-ийн шүүхийн шүүгч О.Номуулин, Улсын дээд шүүхийн Иргэний хэргийн танхимын тэргүүн асан Ц.Амарсайхан, шүүгч Б.Ундрах мөн прокрорын газрын нэр бүхий албан тушаалтанууд бүгд хуйвалдсан. Д.Нямхүүд би ээж, дүүгийнхээ хоёр байрыг алдсан. Тэр хэлэхдээ байрыг чинь зээлээс чөлөөлсөн юм чинь байраа барьцаа болгож үлдээ гэж хэлээд үлдээсэн юм. Тэгээд миний байрыг хуурамч гарын үсэг дуурайлгаж зураад орон сууцны бэлэглэлийн журамаар луйвардаж авсан. Яг үүнийг Прокрорын байгууллагад шалгуулах гэхээр шалгаж өгөхгүй байгаа” хэмээн ярилаа.