Өнгөрсөн долоо хоногийн даваа гарагт УЕПГ-ын Ерөнхий прокурор Д.Дорлигжав гэнэт хурал зарлаж сэтгүүлчидтэй уулзлаа. Тэрбээр уулзалтын гол зорилгоо санхүүгийн асуудал буюу мөрдөн байцаалт шалгалт явуулахад зардал, төсөв хүрэхгүй байна гэх зүйлүүдээр тодорхойлов.  Гэвч сэтгүүлчид энэ асуудлаас илүү цагаан захтнуудын хийгээд дуулиант хэргүүдийн мөрдөн байцаалтын явц, илрүүлэлтийг сонсохыг хүсч байв. Тэрч үүднээс Д.Дорлигжав прокуророос улс төрчид хийгээд УИХ-ын гишүүдийг шалгаж байгаа эсэх, авлига, албан тушаалын болоод мөнгө угаасан хэргүүд яагаад нам жим болоод байгаа зэрэг асуултуудыг "чулуудаж" байв. Харин Ерөнхий прокурор яг тэр хэрэг, энэ хэр тийм ийм түвшинд шалгагдаж  явж байгаа гэж нарийн тоочихгүй байсан ч сэтгүүлчдийн харцнаас бултаж чадсангүй. Тиймээс нэгэн амлалтыг амлаад орхив.

 Тодруубал, тэрбээр "Нийслэлийн прокурор дээр хянагдаж байгаа хэргүүдтэй танилцаад ирэх долоо хоногт мэдээлэл хийе. Та нарын хэлээд буй томоохон гэх хэргүүдийн тэр үед тодорхой түвшинд дэлгэе" гэв.

Тэгвэл томоохон хэргийн талаар ирэх долоо хоногт мэдээлнэ гэж хэлсэн Д.Дорлигжав прокурорын үг цаанаа нэг утгыг илэрхийлээд байна гэх шум гадуур тархах боллоо. Өөрөөр хэлбэл, түүнийг ямар учиртай томоохон хэргийн талаар мэдээлнэ гэж олон нийтийн мэдээллийн хэрэгслээр зарлав?. Ер нь хэний талаар мэдээлэх болоод ийн нухацтай ярив гэх мэтчилэн хүмүүс янз бүрийн асуудал дэвшүүлж эхэллээ.

Зарим эх сурвалжийн үзэж буйгаар Д.Дорлигжав прокурор Засгийн газрын нэгэн сайдын  хууль бус үйлдлийнх нь талаар дэлгэх  гэнэ. Хэрэв энэ үнэн бол яг хэний талаар мэдээлэх бол гээд л асуудал цааш ундрах юм.

Юутай ч эх сурвалжийн хэлээд буй энэ таамаг үнэний ортой ч байж мэдэх юм. Учир нь Д.Дорлигжав прокурор улс төрчдийн хууль бус үйлдэл шийдэгдэж шалгагдахгүй өнгөрч байгаад ихэд бухимдалтай яваагаа тухайн үед сэтгүүлчдэд хэлж байсан юм. Тодруулбал "Мөнгө угаахтай холбоотой УИХ-ын гишүүд, Үндсэн хуулийн цэцийн гишүүдийн хэргүүд явахгүй байгаа нь үнэн. УИХ-ын гишүүдийн тухайд асуудал тавьдаг. Гэвч Халдашгүй байдлын хуулийг өмнөөс ярьдаг. Энэ хүний бурууг тогтоогүй учир энэ хүнийг түдгэлзүүлэхгүй гээд зогсоочихдог. Тиймээс хуулиар хамгаалагдсан эрх бүхий албан тушаалтнуудын хувьд бүх хэргүүд зогсож байгаа. Энэ бол нуугаад байх зүйл биш. Удаа дараа энэ асуудлыг Ерөнхий прокурорын хувьд хэлсэн. Өндөр албан тушаалтай байна гэдэг жирийн ард иргэдээс илүү эрхтэй байхыг хэлэхгүй. Хэрэг хийсэн бол шалгагддаг байх ёстой" гэсэн юм.

Энэ бүхнээс харахад ирэх долоо хоногт Ерөнхий прокурор нэлээн ноцтой, дуулиан дэгдээж мэдэх хэргүүдийг задлах нь ээ.