Энэ  сарын 15-наас 16-нд шилжих шөнө буюу 00:58 минутад Чингэлтэй дүүргийн 10-р хорооны нутаг дэвсгэрт 30-35 орчим насны эрэгтэй хүн гаднаа гэмтэл шархгүй нас барсан талаарх дуудлага мэдээлэл цагдаагийн байгууллагад иржээ. Эргүүлийн үүрэг гүйцэтгэсэн цагдаагийн албан хаагчид гудамжинд ухаангүй хүн байгааг олж харсанаар дуудлага өгсөн аж. Тухайн нас барсан хүн харахад гэмтэл шархгүй байсан боловч цогцсонд хийсэн задлан шинжилгээгээр гадны нөлөөтэй амиа алдсан болох нь тогтоогджээ. Тиймээс Чингэлтэй дүүргийн цагдаагийн хоёрдугаар хэлтсийн алба хаагчид хэрэгтнийг илрүүлэхээр шуурхай ажиллагаа зохион байгуулж, мэдээлэл цуглуулсаны үр дүнд гэмт хэрэг үйлдсэн этгээдийг олж тогтоожээ.

Улмаар хэргийг шалгах явцад түүнийг үл таних этгээд зодож,  аминд нь хүрсэн нь тогтоогдсон байна. Тодруулбал, хэрэг болсон тэр шөнө 16-18 насны таван залуу гудамжинд архидан согтуурч, хоорондоо маргалдаж, улмаар хоёр нь хоорондоо зодолдож байсан байна. Гэтэл таван залуугийн нэг болох 1995 онд төрсөн Т гэгч хажуугаар явж байсан хохирогч болох, 1972 онд төрсөн Б гэгчийг цохиж, газар унаган, боож улмаар халаасанд нь байсан гар утас, түрийвч зэргийг нь дээрэмдэн авсан аж. Тухайн үед хамт байсан дөрвөн хүүхэд нь хараад зогсож байсан гэдгээ одоогийн байдлаар мэдүүлээд байгаа аж.