Эрх баригчид жиргээчдийн амыг барих хуулийн төслийг санаачилахаар зэхэж эхэлжээ. Тодруулбал, УИХ-ын цөөн хэдэн гишүүн энэ төрлийн хуулийг санаачилж өргөн барихаар болсон сурагтай байна.

Саяханы нэг өдөр улс төрийн намуудын гол хүмүүс нууцаар уулзалдаж, Эдийн засгийн ил тод байдлын тухай хуулийн талаар ярилцжээ. Эдийн засгийн өршөөл үзүүлэх агуулгатай Эдийн засгийн ил тод байдлын тухай хууль батлагдаж араас нь Өршөөлийн тухай хууль гарвал эрх баригчидтай холбоотой олон хүн өршөөгдөж шоронгоос гарах аж. Тодруулбал улсын өмчийг хувьдаа шамшигдуулсан, авлига өгч, авсан, гадаадад хөрөнгөө нуусан, хууль бусаар хөрөнгөжсэн нөхдүүд аврагдана гэсэн үг.

Харин үүнийг нь ойлгоогүй МАН-ынхан эдгээр хуулийн төслүүдийг шүүмжилсэн жиргээг твиттерээр цацаад амар заяаг нь үзүүлэхгүй байгаа аж. Тэгэхээр олон нийтийн хандлагыг өөрсдийнх нь эсрэг чиглүүлж буй МАН-ын жиргээчдийн амыг таглахын тулд яах ёстой талаараа нилээн удаан ярилцжээ.

Бүр баттай болгохын тулд хуулийг нь баталсан ч болох талаар ярилцсан байна. Бүр уг хуулиа “Цахим ертөнцийн тухай хууль” гэж нэрлэхээр шийджээ. Уг хуулиар зохицуулагдах бас нэгэн асуудал нь нууц хаягуудыг ил болгох гэнэ. Тухайлбал Танхай эмээ, Марзан шарав, Гурван үг гэх мэт нууц хаягаас жиргэдэг хүмүүсийг ил болгох эрх зүйн орчныг бий болгох юм байна. Ингэснээр бүх хүн өөрийн нэр ус, ажил албан тушаалаа тодорхой болгоод жиргэдэг болно гэсэн үг. Сүүлийн үед нууц хаягаас худал мэдээллийг цацаж олон нийтийг үймүүлчихээд хариуцлага хүлээхээ болсон. Тиймээс хариуцлагатай, хяналттай болгохын тулд ил, тод байлгах нь зөв гэж үзсэн байна. Саяхан л гэхэд нэр бүхий гурван жиргээчийг нэр төрд халдсан, худал мэдээлэл цацсан хэргээр шалгуулжээ.  Жиргээчид бол хэнээс ч айхгүйгээр үзэл бодлоо илэрхийлдэг хүмүүс. Тэд ардчилсан нийгмийн ач тусаар эрх чөлөөтэйгээр жиргэж байна гэж ярьдаг. Тэгвэл АН-ын үед тэдний үг хэлэх, үзэл бодлоо илэрхийлэх эрх нь хааж боогдож магадгүй боллоо.

 Үүнээс үзвэл жиргээчид тэдний хувьд үнэхээр том асуудал болж байгаа бололтой. Дэлхий дээр Хятад, Турк, Египет зэрэг цөөн хэдэн оронд цахим ертөнцийг зөвшөөрдөггүй. Бусдад нь цахим эрх чөлөө утгаараа нээлттэй. Тэгвэл энэ удаа манайх Турк, Егитетийн араас орвол олон нийтийн ширүүн шүүмжлэлтэй тулгарах нь ойлгомжтой юм.