Өчигдөр 07:40 цагийн үед Төв аймгийн Эрдэнэ сумын нутаг, Баяндавааны адаг замд Сүхбаатар аймгаас Улаанбаатар хотын чиглэлд явсан хот хоорондын зорчигч тээврийн үйлчилгээний “Дайчин сүх” ХХК-ний "Hyundai Bus" маркийн 0522 СҮА дугаарын автобус замын хажуу руу онхолдсон зам тээврийн ноцтой хэрэг гарсаныг бид мэдээлсэн. Ослын улмаас 6 хүн нас барж, 44 хүн гэмтсэн. Одоогоор ослын шалтгааныг тогтоох, хохирогчдын эрүүл мэндийг анхаарах ажлын хэсэг байгуулагдан ажиллаж байна. Энэхүү ажлын хэсэг дөнгөж сая хуралдаж дуусчээ. Ажлын хэсгээс эхний ээлжинд ослоос болж гэмтсэн иргэдийн биеийн байдалд анхаарлаа хандуулж, эрүүл мэндийн яаралтай тусламж авах талаар ярилцсан байна.

Энэ талаар Авто тээврийн үндэсний төвийн Захиргаа удирдлагын хэлтсийн дарга М.Мөнхбаяр “Энэ ажлын хэсэг хохирогчдын эрүүл мэндийн талаар ямар арга хэмжээ авах вэ гэдэг тал дээр ажиллаж байна. Цагдаагийн байгууллага нь ослын шалтгааныг тодруулахаар ажиллаж байгаа. Ажлын хэсгээс гэмтсэн иргэдийн талаар ямар арга хэмжээ авах талаар ярилцаж эхний ээлжинд хохирогчдын даатгалын асуудлыг яаралтай шийдвэрлэхээр боллоо. Гэмтэл, согог судлалын үндэсний төвд хэвтэж байгаа иргэдийн биеийн байдал сайн, эмнэлгийн зүгээс шаардлагатай арга хэмжээг авч ажиллаж байна” гэв.

Мөн осолтой холбоотой нэгэн яриа газар авч байна. Өнгөрсөн дөрөвдүгээр сард Налайх орчмын замыг засварлаад эхэлчих ёстой байсан. Тэгтэл мөнгө нь бэлэн байхад өгөлгүй удааж зургадугаар сард олгосон байна. Хэрвээ дөрөвдүгээр сард мөнгийг нь өгсөн бол осол гарсан замыг засчихсан байх байж. Тиймээс замын ажилд хэрэгтэй мөнгийг нь өгөлгүй түгжээд байсан Зам тээврийн яамны төрийн нарийн бичгийн дарга Б.Батзаяаг хүмүүс ихээхэн буруутгаж байна. Уг асуудлаас болж Ерөнхий сайд түүнтэй хариуцлага тооцсон гэсэн сураг байдаг билээ.